تورکيه‌نين عيراق کوردوستانيندان نئفت آلماسي رسمي باغدادي غضبلنديرير 

گوناذ تي‌وي: باغداد و عيراقين ياري-موختار کورد حؤکومتي آراسيندا اؤلکه‌نين ائنئرژي احتياطلاري ايله باغلي يارانميش گرگينليک تورکيه‌ني ده موباحيثه يه سوروکله‌يير. کئچن هفته عيراق رسمي آنکارايا کورد رئگيونوندان خام نئفتين قبول ائديلمه‌سيله علاقه دار خبردارليق ائتميشدي.عيراقين ياري-موختار کورد حؤکومتي قونشو تورکيه‌يه خام نئفتله اونلارلا تانکئر گؤندرمه‌يه باشلاييب. خام نئفت اعمال ائديلديکدن سونرا يئنيدن کورد رئگيونونا گؤندريله‌ده‌ک. تورکيه کئچن هفته عيراقين شيماليندان گونده 10 تانکئر قبول ائتمه‌يه باشلاييب. تانکئرلرين سايينين گونده 200-ه چاتاجاغي گؤزله‌نيلير. بو آدديمدان غضبلنميش عيراقين باش ناظيري نوري الماليکي آنکارايا زنگ ائده‌رک، راضيليغا درحال سون قويماغا چاغيريب. ايستانبولدا بين الخالق سياسي آراشديرمالار مرکزينين ديرئکتورو سينان اولگئن آنکارانين بو آدديمي آتماياجاغيني دوشوندويون دئيير.

 او دئيير کي، آنکارا بونو اساس ايکي سببه گؤره ائتمه‌يه‌جک. اونون سؤزلرينه گؤره، مليکي حؤکومتي ايله موناسيبتلر اونسوز پروبلئماتيکدير. "بونا گؤره ده آنکارا ماليکيني راضي سالماغا احتيياج اولماديغيني دوشونور، ايکينجيسي، آنکارا کورد رئگيونال حؤکومتين باغدادلا موناسيبتلرده مؤوقئعيي‌ني تهلوکه‌ده قوياجاق آدديم آتماق ايسته‌مير"-دئيه سينان اولگئن بيلديرير. کوردلر و باغداددا عربلرين باشچيليق ائتديگي حؤکومت آراسيندا شيمال بؤلگه‌لرده طبيعي احتياطلارين ايستيثماري حوقوقو ايله باغلي موباحيثه گئدير. رسمي باغداد رئگيونون بيرطرفلي اولاراق موقاويله‌لر باغلاماق حوقوقو اولماديغيني و ايخراجين دؤولته مخصوص کمرلر واسيطه‌سيله ائديلمه‌لي اولدوغونو بيان ائدير. کوردلر ايسه آنایاساسی‌نين اونلارا باغدادلا مصلحتلشمه‌دن موقاويله‌لره ايمضا آتماق حوقوقو وئرديگيني بيلديرير. فلاح موصطافا باکير کوردوستان رئگيونال حؤکومتينين خاريجي علاقه لر شؤعبه‌سينين رهبريدير. او دئيير کي، رئگيونال حؤکومت ائنئرژي سئکتورونو اينکيشاف ائتديرمک ايسته‌ييريک. "بيز گونده 175 مين تون بشکه نئفت ايستحصال ائتمه‌يه نايل اولموشوق. اوللر بير بشکه ده ايستحصال ائده بيلميرديک"-دئيه فلاح موصطافا باکير بيلديرير. مسله‌نين موباحيثه يه سبب اولماسينا باخماياراق، عيراق کوردلري آمئريکانين ائکسون موبيل شيرکتي ده داخيل اولماقلا بين الخالق نئفت شيرکتلري ايله موقاويله‌لر باغلاييب. مايکل هووارد عيراق کوردلرينين ائنئرژي ناظيرينين موشاويريدير. او، کوردلرين رئگيونال حؤکومتينين تورکييه‌يه ساتيشلارين پوتئنسياليني آنلاديغيني دئيير. او دئيير کي، تورکيه‌نين ايقتيصادياتي دورمادان اينکيشاف ائدير.

"گلن 10 ايلده تورکيه دونيانين ايقتيصادي جهتدن ان اينکيشاف ائتميش 10 اؤلکه‌سيندن بيري اولماق ايسته‌يير. بونا گؤره ده اونلار ايندي ائنئرژي تهلوکه‌سيزليگيني قونشو اؤلکه‌لرده احتياطلار واسيطه‌سيله تامين ائتمه‌يه چاليشير. تورکيه هم ده اساس ترانزيت يولودور"-دئيه مايکل هووارد بيلديرير. ايللردير باغداد و عيراق کوردوستاني هيدروکاربون قانونو آدلي قانون لاييحه‌سيني قبول ائتمه‌يه چاليشير. باغداد نئفت سيياستي‌نين فئدئرال حؤکومت سويه‌سينده آپاريلماسينا و آنا یاسا ايله موعين ائديلميش قانونلار اساسيندا اونا رعايت ائديلمه‌سينه چاليشير. بونون عکسينه اولاراق، اربيل نئفت آنلاشمالارینی اؤزو ايمضالاماق و نئفتي کمرلرله اؤز شرطلرينه اويغون نقل ائتمگي پلانلاشديرير.

 سياسي تحليلچيلر موباحيثه نين حلينه اوميدلرين آز اولدوغونو دئيير. تحليلچي سينان اولگئن يئني قانونون قبول ائديليب-ائديلمه‌مه‌سيندن آسيلي اولماياراق، آنکارانين آرتيق عيراق کوردلرينين ائنئرژي ائحتياطلارينا باشليجا منبع کيمي باخديغيني بيلديرير. اونون سؤزلرينه گؤره، تورکيه هيدروکواربون قانونو مسله‌سي حل ائديلمه‌سه‌ده، نئفت آلماغا داوام ائده‌جک. "تورکيه عيراقين شيماليندا ايمکانلارا ائنئرژي ايدخالي ايله باغلي بعضي ناراحاتليقلارين حل ائديلمه‌سي مقصديله باخير. بو پئرسپئکتيوه‌دن چيخيش ائده‌رک، تورکيه بونون گله‌جکده ايراندان آسيليليغا بير آلتئرناتيو اولدوغونو حساب ائدير"-دئيه سينان اولگئن بيلديرير. آنکارا تهرانين نووه پروقرامي ايله باغلي بين الخالق سانکسييالارا گؤره قونشو ايراندان ائنئرژي ايدخاليني آزالديب. تحليلچي‌لر دئيير کي، بو، تورکيه‌نين باغدادين نه دئمه‌سيندن آسيلي اولماياراق، عيراق کوردوستاني ايله سياسي و ايقتيصادي علاقه لريني گوجلنديرمه‌سينه تکان وئرير. م.ر