گونئی آذربایجان میللی آزادلیق جبهه‌سی‌نین خوجا‌لی سویقیریمی ایله باغلی بیاناتی

1992-جی ایل فئورالین 25-دن 26-نا کئچن گئجه ائرمنیستان سلاح‌لی قوه‌لری، ائرمنی‌لرین داغلیق قاراباغ اراضی‌سین‌دکی غیری-قانونی سلاح‌لی دسته‌لری خانکندیده یئرلشن روس قوشون‌لارینین 366-جی موتواتیجی آلایینین بیلاواسیته ایشتیراکی ایله خوجا‌لی شهرینی ضبط ائتدی‌لر و آذربایجان خالقینا قارشی نؤوبتی سویقیریم حیاتا کئچیریلدی. بو سویقیریم نتیجه‌سینده بیر گئجه‌ده دینج اها‌لی‌دن 613 نفر، او جمله‌دن 63 اوشاق، 106 قادین ، 70 قوجا،  خصوصی آمان‌سیزلیقلا، ایشگنجه‌لرله اؤلدورولدو، 8 عائله تامامیله محو ائدیلدی، 467 نفر یارالاندی (76-سی اوشاق)، یوزلرله اینسان اسیر (1275 نفر) و گیروو گؤتورولدو، ایتکین دوشدو (150 نفر)، 1000 – دن آرتیق ائو یئرله-یئکسان اولدو.

موختلیف تاریخی مرحله‌لرده ائرمنی شووینیست‌لرین آذربایجان تورک‌لرینه قارشی داوام‌لی اولا‌راق تؤرتدیک‌لری جینایت‌لر کیمی، خوجا‌لی سویقیریمی دا خصوصی آمان‌سیزلیقلا حیاتا کئچیریلمیشدی: ائرمنی جللادلاری ساگ قالمیش اینسان‌لاری آغیر تحقیر و ایشگنجه‌یه مروز قویا‌راق اونلارین باشینین دری‌سینی سویموش، باش‌لارینی و بدن‌لری‌نین دیگر اورقان‌لارینی کسمیش، اوشاق‌لارین گؤزلرینی چیخارمیش، هامیله قادین‌لارین قارنینی یارا‌راق آنا بتنینده اولان اوشاق‌لاری دوغرامیش‌لار. قت‌لیامین خصوصی آمان‌سیزلیقلا تؤردیلمه‌سی اینگیلیس، فران‌سیز، آلمان ، آمئریکا‌لی و دیگر اؤلکه‌دن گلمیش ژورنالیست‌لری دهشته سالمیشدی. ائرمنی‌لرین حیاتا کئچیردیک‌لری بو دهشت‌لی جینایتی نتیجه‌سینده XX عصرین سونوندا باش وئرمیش خوجا‌لی سویقیریمی تکجه آذربایجان خالقینا دئییل، بوتون اینسانلیغا، بوتون سیویلیزاسیا‌لی دونیایا و بشریته قارشی یؤنلمیش ان آغیر جینایت‌دیر. بونا گؤره ده بئینلخالق تشکیلات‌لار، دونیا دؤولت‌لری ائرمنیستانین آذربایجان اراضی‌سینده تؤرتدیگی حربی-سیاسی تجاووزه، تئررور عمل‌لرینه، آذربایجانا قارشی یوروتدوگو آقرئسسیو و جینایتکار سیاسته موناسیبت بیلدیرمه‌لی و خوجا‌لی سویقیریمینا بئینلخالق سیاسی – حقوقی قیمتین وئریلمه‌سی ایستیقامتینده اوبیئکتیو مؤوقئ‌دن چیخیش ائتمه‌لی‌دیرلر.

خوجا‌لی فاجعه‌سین‌دن 20 ایل کئچیر و تأسف کی، آذربایجان اراضی‌لری هله ده ایشغال آلتیندا‌دیر. بو گون گونئی‌لی، گوزئی‌لی بوتون آذربایجان، وطن اوغروندا شهید اولان اینسان‌لاریمیزین روحو قارشی‌سیندا مسولیت داشیییر. اونا گؤره ده میللتیمیز یالنیز اؤز قوه‌سینه گوونه‌رک تورپاق‌لاریمیزین آزاد اولونماسی اوچون سفربر اولما‌لی‌دیر.

گونئی آذربایجان میللی آزادلیق جبهه‌سی بیان ائدیر کی، گونئی آذربایجان تورکو ائرمنی ترورچولاری طرفین‌دن میللتیمیزه قارشی تؤردیلمیش سویقیریم آکت‌لارینی، خصوصا ده خوجا‌لی سویقیریمینی هئچ زامان اونوتمایا‌جاق و آذربایجانیمیزین آیریلماز حیسه‌سی اولان داغلیق قاراباغ و اطراف رایون‌لارین ایشغال‌دان آزاد ائدیلمه‌سی اوچون میللی سفربرلییه قوشولا‌جاق.

گونئی آذربایجان میللی آزادلیق جبهه‌سی  21.02.2012

b.o