اولو تانری‌نین آدییلا

سئویملی باجی‌لار، سایین قارداش‌لار؛

بیلدییینیز کیمی آزربایجان تورک میلتی هیچ بیر زامان ایشغال، ظولم و استبدادا بویون اَیمه‌ییب و هر زامان آزادلیق سنگری و آیدینلیق اوجاغی اولموشدور.... بؤلگه‌ده آزادلیق حرکتینه ایشیق ساچاراق باشقا میللت‌لرین ده بیله اومود دایاغی اولموشدور.

 آزربایجان هر زامان، آزادلیغا دؤیونن روح و هر زامان جان آتان بیر وارلیق اولموشدور. اسکندر ایشغالینا قارشی آتروپاتین موباریزه اسلوبو، عرب اشغالینا قارشی، اولو بابکین یاراتدیغی خرمی‌لر حرکتی، امیر تیمور دؤنمینده نسیمی و حروفیلیک حرکتی‌نی، یئنی چاغدا مشروطه حرکتی، خیابانی قیامی، 21 آذر حرکتی و باشقا حماسه‌لر، آزادلیق مبارزه‌سی‌نین تام آیدین اؤرنک‌لری‌دیرلر. ایندیسه ایللر بویو اؤلوم یاتاغینا سوروکله‌دیکلری اؤلمز وارلیق اودلار یوردو آزربایجانی، نه قدر یولوندان یاییندیرماغا چالیشسالاردا، آرتیق اون‌ایللردی‌ کی، میللتیمیز میللی اینسانی حاقلارینی اَلده ائتمه‌سی اوچون تام مدنی و سیویل یوللارلا ساواش آپاریب و بو حاق یولونون یولچولاری گونو- گوندن آرتماقدادیر. ایندیکی زامان، سیاسی دَییشیم‌لرین سورعت‌لنمه‌سی بیلگی و ایلیشگی دونیاسی‌نین گئنیشلنمه‌سی و هر بیر اولایا اولان ائتگی‌سی میللی شعورون، اؤیرنجی‌لر، گنج‌لر و توپلوم آراسیندا گئنیش یاییلماسی، آزربایجان میللی حرکتی‌نین بؤلگه‌ده گوجلو ائتگی‌سی، اولوس‌لار آراسیندا بللی شکیلده تانینان دوزئیی، بیزیم حاق یولوموزون یاخشی سونوج‌لاریندان خبر وئرسه ده هله ده، راسیزم سیستئمی اوز آسیمیلاسیون سیاستی‌نی بوراخماق ایسته‌میر، ایراندا یاشایان میللت‌لرین کیملییینی دانیب، میللی و دوغال حاقلارینا خور باخاراق، اونلاری اَریدیب یوخ ائتمه‌یه چالیشیر. ائله بو اوزدن ده بیزیم میلی ساواشیمیز داوام ائتمکده‌دیر و بیز، ایندیکی انرژی‌لی، بیلگی‌لی، باجاریقلی و جسارتی آزربایجان اوغول- قیزلاری آیدینجاسینا بو قوتسال ساواشی سونوجا چاتدیرماغی اوز قارشیمیزدا مقصد قویموشوق. بو یولدا بوتون گوجوموزو بیرلشدیره‌رک، یالنیز و یالنیز آزربایجان میللی چیخارلاری اوغروندا آددیم آتاجاغیق. یاد سس‌لره، یابانجی‌لارین سؤزلرینه ایش‌لرینه اویمایاراق، تکجه آزربایجان محورلی دوشونوب داورانمالی‌ییق، میللی حرکتیمیزین دیریلییینی گوجونو بیر داها ثبوت ائتمه‌لی‌ییک. اونا گؤره بیز، ساوالان هفته‌سینده بو قوتسال یئرده ناموسوموز و شرفیمیز اوزه‌رینه آند ایچیر و طلب ائدیریک:

1-      بوتون چالیشمالاردا، آزربایجان میللی چیخارلارینی، شخصی، گروهی و طیفی چیخارلاردان اوستون توتاجاغیق.

2-      شهرلر آراسیندا اختلاف سالما سیاستینه قارشی اولاراق بوتون حرکت‌لریمیزده آزربایجانی بیر بوتوو وارلیق گؤروب و تبریزی بیر تاریخی- معنوی مرکز اولدوغونو وورغولاماغی مقصده اویغون گؤروروک .

3-      بوتون میللی فعال‌لاری اؤزللیکله اؤنده گئدن چالیشقانلاری میللی سرمایه اولدوغونو گؤز اؤنونه آلاراق، اونلارین تکله‌نیب، چئشیدلی تاکتیک‌لر، بهانه‌لر و یوللارلا تاپدانیب تخریب ائدیلمه‌سینه بیر آن بیله یول وئرمه‌یه‌جه‌ییک و آرامیزدا یارادیلماغا جان آتیلان تفرقه‌لره قارشی دوراجاغیق.

4-      میللی ایراده‌میزی داها دا گوجلندیریب، عمل مئیدانلاریندا مشق ائده‌رک، اینام قایناغینا مشق ائده‌رک، اینام قایناغینا سؤیکه‌نرک، بوتون بوغونتولو اورتامی سیندیراراق، دؤنه- دؤنه حماسه لرین یارانماسینی گئرچک لشدیره‌جه‌ییک..

ایستک‌لر و طلب‌لر:

1-      تورک دیلی‌نین رسمی‌لشمه سی و آزربایجان کولتورونون قورونوب چیچک‌لندیریلمه‌سی.

2-       سانترالیسم سیستئمی‌نین آرادان قالدیرماسی و میللیت‌لرین اؤزونو ایداره ائتمه اصولونون رسمیته تانینماسی.

3-      ایراندا یاشایان بوتون میللیت‌لرین عمل‌ده برابر حقوقلو اولماسینا شراییط یارانماسی.

4-      ایرانین بوتون بؤلگه‌لرینده اقتصادی ایمکان‌لارین عدالت‌لی شکیلده بؤلوشدورولمه‌سی.

5-      تورک دیلینده بوتون ایرانا وئریلیش‌لر یایماق اوچون رادیو تلویزیون کانالی‌نین یارادیلماسی و مطبوعات آزادلیغی‌نین قورونماسی.

6-      باتی آزربایجان(اورمونون)کوردلشدیرمه سیاستی‌نین دایاندیریلماسی.

7-      بوتون توتوقلانان َسیاسی محبوس‌لاریمیزین آزادلیغا بوراخیلماسی.

8-      سیویل توپلانتی‌لارین آزاد شکیلده کئچیریلمه‌سینه شراییط یارانماسی.

9-      آزربایجانین دوغال قایناق‌لاری، یئرآلتی و یئر‌اوستو ثروت‌لری‌نین قورونوب دوزگون یوللارلا قوللانیلماسی، اؤزللیکله اورمو گؤلونون قوروماسی‌نین قارشی‌سینین و ساوالانین دونیا آلانیندا بیر دوغال قایناق اولاراق، قید اولونماسی.