گوناز تی وی: آذربایجانین تانینمیش میللی و مدنی فعالی عباس بئی لسانی، جناب عبدالعزیز عظیمی قدیم ین مناظره یه چاغریشینا جاواب وئرمیشدیر و بو مناظره یه هر هانکی بیر مکاندا حاضیر اولدوغونو بیلدیر میشدیر.

 

عباس بئی لسانی نین جوابیه سینین متنی آشاغیداکی کیمی دیر:

 

"اولو تانرینین آدی ایله

 

سایین عظیمی قدیم جنابلاری

 

سالاملا‌ر و سایقیلار

 

هر نه دن اؤنجه بیر باشدان سئوینج، بیر باشدان تعجب و بیر باشداندا اوزونتومو بیلدیرمک ایسته ردیم. نییه کی سیزین طرفدن عادت و سنت-ه چئوریلن بیر داورانیش، هر ندنه گوره بو گون سینمیش دورومدادیر. بئله کی جنابیز معمولا توتولمالار و دوستاقدان اؤزگورلوگه چیخاندان سونرا اوزون بیر زامان دینجه لیش سوره جینده اولوردونوز. البته بو سوسقونلوغو سون گونلرده سیندیرمانیز، کسینلیکله چوخ اؤنملی بیر ضرورت اساسیندادیرکی اونون نه اولدوغون سیز داها یاخجی بیلیرسینیز و اوزونتوم بونا گوره کی: اؤنوموزده گلن گون میللت یمیزین معاصر دؤورده ایلک میللی حوکومت ینین قورولدوغو گونونون عرفه سینده بو تورلو حاشیه لرین قاباردیلماسین کسینلیکله یانلیش بیر آددیم بیله رک سیزه هئچ یاراشدیرا بیلمه دیم.

 

جناب عظیمی، سیز سون یازینیزدا بیر سیرا افترالار، تهمتلر و تملسیز ادعالار بیزه یؤنه لیک اورتایا آتیبسینیز و نه یازیق کی دایاندیغیر استدلال لارا،《تبادر- احساس اولونوب- بعضی فعاللار ادعا ائدیرلر》 آلدیغیز نتیجه لره و وئردیینیز حؤکملره، منطیق بیلیمینده مغالطه دئییلیر، بو اوزدن بو یازینیزدا ایره لی سوردوگوز ادعالار هئچ بیر سند، دلیل و مدرکه دایانمادیغی ایچین، اخلاق دیشی بیر افترا و تهمت دن باشقا بیر زاد دئیل و عملا محتواسی نین باطل اولدوغونا گوره بو یازییا دئتاییلی اولاراق جاواب وئرمگی گرکسیز گؤرورم.

 

البته بو تورلو توتوملار اوچ ندندن گؤزه له نه بیلر: غرض- جهالت- یانلیش آنلاشیلما. اومود ائدیرم سیزین بیزه بو الطافیز سون مورده شامیل اولسون.

 

البته مسئله نی داها بوروشوق حالا گتیرن بو اولورکی: تکجه سند( آمریکا سسی ایله موصاحیبه) کی یازیزدا اشاره ائدیبسیز، یا اصلا قولاق آسماییب و دئییللره اینانیبسیز، کی بو بؤیوک مسئولیت سیزلیکدیر و یا عمدأ آبجئکتیو بیر سندی تحریف ائتمکله بیزی موضع دیفاع دا قویماق ایسته ییبسیز.

 

هر حالدا سیزین بو تورلو یاناشماز زامان و متد باخیمیندان تام یانلیش اولسادا بیر توفیق اجباری اولدو میللی حرکته تا بیر سیرا قابیقلار سویولا و ایچ اوزوموز اورتایا چیخا، اؤزللیکله گنجلریمیز داها آییق توشه لر.

 

جناب عظیمی، بیلمیرم ندنسه ایجازه وئریلمیر حرکت دوغال گئدیشینده اولسون و هر فورصت و آراجلا حاشیه لرین متنه غالیب گلمه سی بعضی لرینین طرفیندن اؤنمسه نیر.

 

جناب عظیمی آیلارجا میللی حرکته حاکمیت طرفیندن پلانلی اولاراق ان ایرنج ادبیاتلارلا هجوم اولور میللی حرکت ین تانینمیش شخصلرینه حقارتلر اولور. تهمتلر و افترالارا دایاناراق انسانلار بیر طرفلی اولاراق مجازی فضادا محاکمه اولوب و علیه لرینه حکم وئریلیر و تاسسوفله سیزین ده بو یازینیزین جنسی اونلارلا توک وورمور.

 

نهایت بنده بو اخلاقسیز اویونلارا دور دئمک ایچین بیر چاغریش وئردیم (یا گلیم قوللوغونوزا، یا تشریف گتیرین قوللوغونوزدا اولوم) آنجاق بیر نفر مدعی لردن  تشریف گتیرمه دی! جناب عظیمی اگر یازدیغیز مسائل سیزه بو قدر اؤنملی ایدی سه ندن او چاغیریش اساسیندا مناظره یه تشریف گتیرمه دیز؟

 

ندن آرالیق بیر آزدا اولموش اولسا توختاقلیغا ساری گئدرکن لاپدان بئله بیر توتوملا اورتایا چیخدینیز؟ و داها شاشیرجی بوکی سیزین احساس مالکیت ائتدیگیز فراکسیونو چیرپانلار و اوزونوزه هجوم (سسلی و یازیلی) ائدنلرله، سون زامانلار ایچری ده گوروشمکلر یئتمه میشکیمی، ائشیکده کی لره ده سئوگی دولو یازیلار رد بدل ائدیرسینیز، بویورون بو جمع اضدادی اورتایا چیخاردیب بیرلشدیرن هانسی مشترک دوشمندیر؟؟؟

 

جناب عظیمی، زامانلاماز چوخ یانلیشدیر، ان آزی دؤزوردوز میللت یمیزین ان اؤنملی گونلریندن اولان ۲۱ آذر عرفه سینده میللی فعاللار حاشیه سیز و دغدغه سیز اولاراق بو حؤرمتلی گونو آغیرلاییردیلار سونرا ایچیزی ائشیگه تؤکوردوز.‌

 

هر حالدا سیزین ایستگیزی جاوابسیز قویمایاراق، اعلام ائدیرم یا بیر یئر بویورون و هر کیمی ده کی سیز صلاح بیلیرسیز اولسون، من گلیم قوللوغونوزا. یادا تشریف گتیرین اردبیلده قوللوغونوزدا اولوم. کسینلیکله بو مناظره نین سونو میللی حرکت ین یارارینا اولاجاق.

 

آچیق و کامئرا قاباغیندا ادعالاریزی اثبات ائدین و ایسته دیگیزی سوروشون و سورولارادا جاواب وئرین.

 

لوطفا تئزلیکله هارا گله جییمی یا سیزین تشریف گتیره جگیزی افکار عمومی یه دقیق زامان و مکانلا اعلام ائدین.

 

اولو تانری میللی حرکتی عُجب، کبر و حسادتدن قوروسون چون قارشیداکی دوشمنله باش ائتمک چوخ قولای دیر.

 

سایقیلارلا عباس لسانی"

 

سایین حجت الاسلام عظیمی قدیم نین، سایین عباس بئی لسانی‌ یه مناظره مناظره اوچون گوندردییی دعوتیه آشاغیداکی متن ده گتیریلمیشدیر.

 

"بسم الله الرحمن الرحیم

 

سایین عابباس لیسانی جنابلاری

 

سلاملار و سایقیلار

 

کئچن گونلرده و آیلاردا سیزین اؤزونوزون و اطراف فیکیرداشلارینیزین طرفیندن بیر پارا سؤال یارادان اظهارلار و موضع توتمالار بیزیم، فیکیرلریمیزین و هابئله فعالیت قایدالاریمیزین علیهینه احساس اولونوب.

 

بو اتفاقلارین بیر حیصصه‌سی حقیر زیندانی اولاندا سیزدن صادیر اولوب

(او جمله‌دن سیزین رادیو آمئریکا ایله فراکسیون علیهینه مصاحیبه نیز.) کی او مصاحیبه ده فراکسیونو بیر حاکمیت پروژه‌سی کیمی تحلیل ائدیب و فراکسیونا ایشله‌ین‌لره (معلوم الحال شخص لر!) لقب وئریبسیز.

 

کئچن گونلرده ائوینیزده اولان جلسه‌دن و بو جلسه عنوانی ایله یازیلان ایکینجی بیانیه نیزدن بئله تبادر اولور کی بیزیم فعالیتلریمیزی و سئچگی‌لر عرصه سیندن یارارلاندیغیمیز اؤنملی فرصت‌لر قازانجلارینی بیر حکومتی پروژه و یا اونا تای اتهاملارلا وورقولاییرسیز.

 

بئله نظره گلیر سیز «عقلانیت» کلمه‌سینی واقعی و غیر واقعی بولوملره تقسیم ائتمک‌له اؤزونوزدن سئوای عقلانیت‌دن دانیشماغی غیر واقعی عقلانیت آدلاندیریب و کلمه‌لردن بیزیم علیهیمیزه شائبه و منفی شانتاژ یارانیب.

 

بونلارا علاوه ائتمه‌لی موارید وار کی بعضی فعاللار ادعا ائدیرلر سیز بیزیم توتوقلانماغیمیزی بیر اویون آدلاندیریبسیز و بئله اظهار ائدیبسیز کی«عظیمی نی وزارت اطلاعات هتل ده ساخلاییر و عظیمی اونلارا مشاوره وئریر»!!

 

البته سیزدن بیر مکتوب آچیقلاما ایسته‌ییریک بلکه کئچمیش ده آپاردیغیمیز رویه داوام تاپیب تام سایقی ایله متقابیل داورانیشلاری ایدامه وئرک.

 

سایین عابباس بی اگر صلاح بیلدیز بیر آچیقلاما ایله مسئله‌نی تلطیف وئردینیز الحمدلله فبهاالمراد. و اگر اظهاراتیزدان یارانان شبهه‌لری یئرلی بیلیرسیز و یا بیزیم سیاسی داورانیشلاریمیزا آرتیق نظر و تنقیدینیز وار بیر مجمل و یا مفصل  مناظره اوچون اونری نیزی قبول ائدیرم.

 

اومود ائدیرم سیزین آچیقلامانیز بیزی بو مناظیره‌دن مستغنی ائله‌سین و حقیقت‌لری آچیقلاماق یولوموز مناظره و یا مکاتبه‌یه چکمه‌سین.

 

چوخ سایقی ایله

عظیمی قدیم"

 

گوناز تی وی اولاراق هر ایکی طرفه سایقی لاریمیزی بیلدیره رک، آذربایجان میللی حرکتینین بویوک لریندن ایسته ییریک بو ایشلره سون قویولسون، بونون اوچون کی دشمن بو ایشلردن حرکتیمیزه قارشی ایستیفاده ائدیب و آغیر ضربه لر وورا بیلر.

 

گوناز تی وی

E.H