یورد دئدیکده ایلک اؤنجه هر بیر انسان ین دوغولدوغو یئر ٬ توپراق پارچاسی و جوغرافیا بؤلومو آنلاشیلیر. آنجاق یورد بونلارمی دئمک دیر؟

بیلدیییمیز کیمی هر بیر مسئله نین ائوریمله شمه سینده و بوتؤو بیچیم ده دوغرو آنلاما وارماسیندا عینیت لرله برابر ذهنیت لرده یارانمالی دیرلار.

بیزیم دوغولدوغوموز٬ بویا-باشا چاتدیغیمیز و یاشادیغیمیز توپراق و اقلیم یورد دئدیگیمیز آنلاییشین عینی فاکتورلاری دیرلار. آنجاق او توپراق اقلیم و جوغرافیا ایله باغلی اولان دوشونجه٬ سئوگی ٬ دویغو٬ منیمسه مه و بیلینج ذهنی فاکتورلار اولاراق یورد آنلاییشی نین یارانیب بیچیمله نمه سینی کامل لشدیریر.

بئله لیک له عینیت له ذهنیت٬ دوغرو بیر ایلگی و باغلار لا بیر-بیرینه باغلانیب٬ بوتؤو بیر آنلاییشین یارانماسینا ندن اولورلار.

بونودا وورغولامالی ییق هر بیر عینی مسئله ایله باغلی چئشیدلی ذهنیت لر یارانا بیلر. مثال اوچون یوخسوللوق لا باغلی ظالم ین ظولمه قارشی ساواشان موباریزلرین و یوخسوللوق دا بوغولوب جان وئرن لرین ذهنیت لری اوست- اوسته دوشمورلر. بورادا دوغرو ذهنیت و آنلاییشین یوخسوللارین دورومونو یاخشی لاشدیران و اونلارین چیخارلارینی یانسیدان ذهنیت دن عبارت دیر.

یورد آنلاییشی چئشیدلی ندن لر اوجباتیندان یارانمازسا بو آنلاییش باشقالاری طرف یندن اورتایا قویولا بیلر؛ و بو قوندارما و یالنیش آنلاییش یالنیز باشقالارینین چیخارلارینی ساغلایاجاق دیر.

بئله اولان بیر دوروم دا ایسه ایللر بویو بیر بؤلوم توپراق اوزه رینده اوشاق-قوشاق یاشاییب ٬ اسگی لردن باش قالدیریب ایندی لیگه آیاق باسان ٬ آغلی - قارالی گون لر گؤره ن ٬ آجی - شیرین خاطره لر یاشایان انسان توپلولاری اؤز دوغما توپراق لاریندا و آنا یوردلاریندا یاد انسان لار و بعضأ غریب لر کیمی یاشاماغا مجبور اولمالی دیرلار.

بئله لیکله یالنیز توپراق وار اولماسی ایله یورد آنلاییشی یارانماز. یورد آنلاییشی او توپراغی٬ کندی توپراغی٬ او جوغرافیانی اؤز دوغما ائوی - ائشیگی بیلیب٬ اونو سئویب٬ منیمسه ییب و گؤز ببه گی کیمی قورودوقدا یاراناجاق دیر. ائله او اوزدنده یورد آنلاییشی هر بیر ائتنیک اوچون ان اؤنملی مسئله لردن بیری سیدیر و بو نقطه ده ایسه میللی آیدین لارین گؤرولری و تاریخ سل یوردلارینین نه درجه ده اؤنملی اولدوغو آچیق - آیدین گؤز اؤنونده دیر.

یورد آنلاییشی عینی فاکتورلارا دایاناراق دوغرو بیچیمده یارانیب٬ بوتؤوله شمه سینده میللی آیدین لار بؤیوک اؤنم داشی ییرلار.

میللی آیدین لار یورد آنلاییشی نی اورتایا قویوب انسان لار آراسیندا سرگی له ییب٬ یاییم لادیقدا و او آنلاییشی دوغرو-دوزگون شکیلده ساووندوقلاریندا انسان لارین چوخونلوغو بو آنلاییش لا یاخشی جا تانیش اولوب و اونو قاورایاجاق لار.

بئله اولدوغو بیر حالدا ایسه انسان لار اؤز کیملیک لرینی ٬ دوغما یوردلاری نی و بیر سؤزله میللی وارلیق لارینی قوروماق اوچون یئترینجه یاراقلاناجاق لار.

سیامک میرزایی - اوین زندانی ( 1396/09/21 )

 سه‌شنبه 12 دسامبر2017