«وطن منه اوغول دئسه نه دردیم

مامیر اولوب قایالاردا بیتردیم»

(ممد آراز)

سیامک کیمدیر؟

اوزون ایللردیر کی فاشیست ایمپئریالار یؤنوندن سوی‌قیریم ائدیلمیش تالان اولموش، دیده‌رگین و سورگون دوشموش ائلیمیز و میللتیمیزین آزادلیغی یولوندا قوتلو یولا آیاق باسمیشدیلار آتالاریمیز و ایندییه‌دک‌ده بؤیوک اوغورلارلا داوام ائتمکده‌دیر و ألبت کی اوزون یولدور، زحمت ایسته‌ییر، گؤز قیرپمادان چالیشماق ایستر، ایگید اوره‌کلر، آییق بئیین‌لر و اینانج‌ ایسته‌ییر.

گونوموزده و نئچه‌ ایللر بویو آییق ویجدان و صاف صادیق میللت و وطنیمیزین اؤزگورلوک یولوندا چالیشان اینسانلاریمیزدان بیری سیامک میرزایی دیر. اورتا تحصیلات دؤنه‌مینده، عالی تحصیلاتدا، موغاندا و ائله‌جه‌ده باشقا شهرلریمیزده چئشیدلی مدنی یوللارلا آییق میللتیمیزین أصیل آنلامدا اویانماسینا و‌ یوردوموزون آزادلیغینا چالیشمیشدیر. ‌او قدر ظالیم‌لر گؤزونه اوخ کیمی سانجیلمیش‌کی ایندی ایگیدجه‌سینه دوستاقدا یئنه یورولمادان چالیشماقدادیر.

طبیعی کی، هر یولدا بیرسیرا أنگللر اولور، زیندان دوستاق بیز اؤزگورچولره أنگل دئییل بلکه یول وئره‌ن بیر ویصال کؤرپوسودور. بیزه أنگل اولان اؤز ایچیمیزدن دیمدیکلرینه وورغون اولوب و او دیمدیکلری‌ایله طمع‌له‌نیب حاکیمیته یئم اولانلاردی و بیزده کسین اولاراق قارشیلاریندا دوروب دیز چؤکدوره‌جه‌ییک نئجه‌کی سیامک یولداشیمیز دوستاقلا أییلمه‌دی و عکسینه ایگیدلیک و حاققی ساووناراق أیدی ظالیم‌لری دؤنه‌لرجه.

سیامک بودور دوستلار، ایگیدلیک اولگوسودور.

بو قیسا یازیدا سیامک‌ین ایزینده اولان وطن سئوه‌رلیک، دوستاقلیق و اؤزگولوکله باغلی دانیشاجاییق.

قؤومیت‌چیلیک (Qövmiyyətçilik)، میلییت‌چیلیک (Milliyyətçilik)، میللت‌چیلیک (Millətçilik) ندیر؟ اؤنجه‌لیکله قؤومیت، میللیت و میللت آنلاییشی‌نین کئیفییت فرقلریندن دانیشاق. طبیعی کی، بیز بو مسأله‌یه آذربایجان تورک توپلومو چرچیوه‌سیندن باخاجاییق. چون‌کی فرقلی یئرلرده بو حال ایجتیماعی-سیاسی گئدیشاتا اویغون اولاراق دییشه بیلر. گئنل قبول اولونموش فیکیر اولاراق محمد‌امین رسولزاده‌نین‌ده أثرلرینده (میللی دیریلیک) ائتنیک بیرلیک‌لرین اوچ پیلله‌لی بیر اولوشوم و اونلارین ایجتیماعی فرقلیلیک‌لری وئریلمیشدیر. رسولزاده‌نین فیکرینجه قؤومییت یالنیز نسیل و دیل بیرلیگینی ایحتیوا ائدیر. یعنی بیر آتا-بابادان یارانان و بیر دیلده دانیشان کیچیک بیر طایفا قؤومییت مفهومونو عاید ائتمک اولار. میللیت‌ده ایسه آرتیق قان قوهوملولوغو عامیلی اؤز اؤنمینی ایتیریر، دیل و مدنییت بیرلیگی اؤن پلانا کئچیر. میللته گلینجه ایسه میللت، دیل، عادت و أخلاق، تاریخی و دینی بیرلیگین توپلانتیسی‌دیر.

بو آنلاییشلاری اونلارین داشیدیغی آنلامی سؤزله ایفاده ائتسک و پئشه، یولچولوق و اینانج بیلدیره‌ن شکیلچی علاوه ائتسک قؤومیت‌چی، میللیتچی، میللتچی سؤزلری اورتایا چیخاجاق. او زامان هانسی دوغرو؟

بعضن بیز هانسینی ائتدیگیمیزی بیلمیریک و یا ائتدیگیمیز ایشین سوییه‌سینی بیلسک بئله آدینی دوغرو دوزگون ایفاده ائتمیریک. دؤولتی اولان و گئنیش دؤولت ایدئاسی‌نین- توران، بوتؤو آذربایجان- داشییجیسی اولان شخص میللییتچی اولا بیلمز. بو آنلامدا کی، بو علمی یؤندن دوغرو ساییلمیر. اؤزونو میللتچی آدلاندیرا بیلر. میللت سؤزو میلییت سؤزوندن داها گئنیش و بؤیوک‌دور. بو حاقدا م.ا. رسولزاده قئید ائدیر: میللت، میللییت اؤیه‌لرینین أکثریتی‌نین اؤز مدنی و میللی دیرلیگینی درک زامان یارانیر. بیرده قئید ائدیرکی، «توپلوم یالنیز دؤولت اولماق عزمینی گؤسته‌ردیگی و بوندا ایصرار ائتدیگی زامان میللت اولور.»

ایسارتده اولان توپلوم ایلک اؤنجه ایسارتدن و ظولومدن آزاد ائتمه‌لیدیر اؤزونو و ایستیقلالینا گئدن یولدا طبیعی کی دوستاقلیق واردیر چونکو ظالیمین ایشکنجه‌دن سونرا ظولمدن سونرا هئچ بیر شئیی یوخدور بونا گؤره کی تمل‌سیزدیر بیلیم‌سیزدیر و یالنیز گوج منفعتی وار اوندا، اؤزگورچولرسه اینانجلا ایره‌لیله‌یییرلر و بونا گؤره‎ده ایشکنجه‌لره دایاناراق ساواشیرلار. بوگون سیامک میرزایی میللییتچی‌لیگینه و اونون تملینده دایانان اینانجینا دایایاناراق دوستاغا آلینیر و اؤزو دوستاقدان مئساژ گؤنده‌ره‌رک جناب عباس لئیسانلی‌نین سؤزونو تکرارلایاراق و تأکید ائده‌رک دئییرکی، موباریزه دوستاقلارلا توکنمیر، بلکه باشقا بیر فازا و موحیطه کئچیلیر. یعنی بودور قوتسال روح و قوتسال اینانج.

یولوموزدا أنگل اولان دوساقلیقلار دئییل دئدیک. أنگل اولان شئی حاکیمییته یئم اولانلاردیر یعنی ساتقین‌لار و ظالیمله بیر مووازی خطده یول گئدن‌لردیر. حتتا بوگونده دوستاقدا اولان سیامک میرزایینی آجیماسیزجا و ویجدانسیزجا تخریبه چالیشانلار وار. دئمک لازیم‌دیر کی او تخریبه چالیشانلار حاکیمییت یئمینه آلدانیبلار و تورا دوشوبلر.. ائلده بیر مثل وار- « قوش دیمدیگیندن تورا دوشر» دئییرلر. یعنی قوش اوولاناندا هئچ‌ده هئچ کیم اونون دیمدیگی ایله قارماق سالمیر. دنه-یئمه آلدلنان قوش تورا دوشر آنلامی داشییر بو مثل. بودا یالنیز ایندی دئییل آیری-آیری چاغلاردا اؤزونون موباریزه یولونا، ائله‌جه‌ده بیر-بیرینه خیانت ائدیب « دیمدیگیندن تورا دوشنلر» (حاکیمییتین یئمینه، یئملمه‌یینه ساتیلانلار) گؤرونوب کئچمیشدن بوگونه قدر و ائله‌جه‌ده سونلاری و پئشمانلیقلاریدا گؤرونوب. آنجاق یئرینده دیم-دیک صاف صادیق و ایگیدلیکله دوران سیامک میرزایی‌لریده گؤرور زامان.

سون سؤز

سیامکین یولو و ایزی و عینی حالدا دوستاقلیقدان ائشیدیلن سسی اؤزگورلوک سسی‌دیر، وطن سسی‌دیر و ألبته موباریزه سسی‌دیر. گونئیین بوغازینداکی هایقیریش سسینین دوگونلرینی آچان اؤزگورلوک پنجه‌سی‌دیر. سیامک وطن سئوردیر اونون اوره‌یی یورد و آزادلیغا دؤیونور. قیساجاسی، منیم أن دوغرو اولگومدور.

 کیومرث ایسلامی 16 ژانویه 2018