آذربایجان تورک میللتی نین میللی حقلرینی رسمیته تانیماقدان امتناع ائدن ایران اسلام جمهوریتی حاکمیتی، آزادلیق و عدالت سئوه ر آذربایجان میللی چالیشقانلارینا قارشی و حق سسلرینی بوغماقدان اؤترو، اونلارا آغیر-آغیر هزینه لر تحمیل ائتمیشدیر و ائدیر و بو عدالت سیز سیاست و داورانیشین داوامیندا اؤزگوز و عدالت سئوه ر انسانلارین سسینی بوغماق ایسته ییر. آنجاق بو هامییا آیدین دیر آزادلیق، عدالت و حق بایراغی هئچ زامان یئرده  قالماییب و قالماز! اگر بیر میللی فعال دایاندیریلسا، مین بیری آیاغا قالخاجاق!

 

بو حق سیز و عدالت سیز باسقیلار نتیجه سینده بو گونه قدر، دینج و خشونتدن اوزاق یوللارلا حق، آزادلیق و عدالت اوغروندا چالیشان مینلرجه میللی فعالی یاخالاییب، گؤز آلتینا آلیب، دوستاغا سالیب و سورگونه گؤنده ریبلر.

 

حال حاضرده ده بیر چوخ آذربایجانلی تورک میللی فعال، قانونا ضد و مختلف بهانه لرله دوستاقدا و سورگون حالیندادیرلار او جومله دن:

 

۱-توحید امیرامینی_(اردبیللی-اوین زیندانی)

دنیاسل آنا دیلی گونو ایله ایلگیلی تهراندا یاخالانیب و ۵ ایل حبسه محکوم ائدیلیب.

 آیا بیری اؤز آنا دیلینی سئوسه، آنا دیلینین مدرسه لرده تدریس اولماسینی ایسته سه گرک اونو حبسه سالالار؟

 

۲-اکبر نعیمی-(خوی لو- اوین زیندانی)

اتهاملارینین بیری اؤز آنا دیلینی سئویب و بو مناسبته قورولان بیر مراسیمده آنا دیلینین حقینده داشیماقدیر.

سیز گؤرون آنا دیلینی سئومک اوچون اونو یاخالاییب ۹ ایل ۷ آی حبسه محکوم ائدیبلر !

آیا بو عدالت دیر یوخسا زوراکیلیق؟!

بوآزادلیق و عدالت ایسته ین بیر شخصین سسینی بوغمادیر!

دیشلری زینداندا آغیرییر آنجاق معالجه اوچون اونا مرخص لیک وئرمیرلر!

 

۳-روزبه پیری- (تبریزلی_ تبریز زیندانی)

۴ ایل ۸ آی حبسه محکوم ائدیبلر، اتهام ووروبلار ۱۳۹۸ اعتراضلاری ایله ایلگیسی واردیر.

ایندیلیکده برک خسته دیر. آنجاق معالجه اوچون مرخصلیک وئرمیرلر.

 

۴-جعفر اسماعیل زاده- ( تبریزلی- تبریز زیندانی)

وطن سئوه رلیگه خاطر اؤزونو ده یاخالاییرلار، اوغلونودا یاخالاییرلار! هرایکیسین قول-قولا باغلاییب زیندانا آپاریرلار و.... ایندی نئچه آی دیر آیریدان یاخالانیب و زیندا دیر.

 

۵-محمد عینی-(رشت تورکلریندن-رشت زیندانی)

بیرچوخ شهرده تورک توپلوملاری باشقا ائتنیکلرله بیرگه یاشاییرلار. اوشهرلرین بیری ده رشت شهری دیر. میللی چالیشقان محمد عینی، رشت شهرینده دینج و خشونتدن اوزاق اولاراق، تورکلرین  میللی حقلری اوغروندا چالیشیر.

کئچن ایل بهمن آیینین ۳-نده امنیتی قوّه لر طرفیندن توتوقلانیب و بوگونه دک تاسفله باسقیلاردان دولایی، هابئله عایله سی و یاخینلاری علیهینه ایشلنمیش تهدیدلر نتیجه سینده محاکمه سینین گئدیشاتیندان هئچ بیر خبر یاییلماییبدیر. حتی آغیزدان آغیزا دئییلنلر اساسیندا بو عزیز میللی فعالیمیزه وئریلن آغیر حُکمدن ده دقیق بیر بیلگی الده یوخدور.

 

۶-شُـکرالله قهرمانی-(خودآفرینلی-گؤز آلتینا آلینیبدیر= بازداشت)

تزه لیکده بئش – اون نفر امنیتی قوه خبرسیز و هئچ بیر محکمه حُکمو گؤسترمه دن، عایله سینین دورومونو نظره آلمادان زوراکیلیقلا ائولرینینه تؤکولوب، یاخالاییب، گؤز آلتینا آلمیشدیلار. هابئله بیر سیرا شخصی وسایلینی ده ضبط ائتمیشدیلر.

بو زوراکیلیقلارا دا هئچ بیر دلیل ده ارائه ائتمه میشدیلر.

یعنی هرکسه شک ائتسه لر اول یاخالاییرلار و باجارسالار قارا یاخیب بوینونا جرم یازیرلار...

 

۷-اکبر ابولزاده – (اهرلی- تبریز زیندانی)

تبریز زیندانیندا ساخلاییرلار.

تهران تئلئویزیونون فیتیله آدلی برنامه سینده عمومن تورکلره و اؤزللیک له آذربایجان تورکلرینه چیرکین و رذیلجه سینه اهانتلر ائتمیشدیلر! اتهام بودور کی، نییه بو رذیل اهانته لره اعتراض ائدیبدیر. بو نئجه بیر اویون دور کی، انسانلاری ملی اهانت قارشی سیندا سوسماغا مجبور ائتمه یه چالیشیرلار!؟

آنجاق من معتقدم رشید آذربایجان تورکلری هئچ بیر اهانته سوسماز و هئچ بیر تحقیره دؤزمزلر!

 

۸-بهنام زارعی-(ورزقانلی_گؤز آلتینا آلینیبدیر=بازداشت-اهر زیندانی)

تخمینن بیر آی اولار یاخالاییبلار. بهنام زارعی یاشام چئوره سینی(محیط زیستی) قورویوب ساغلام ساخلاماق اوچون چالیشیر و بو موضوع ایله ایگیلی یاخالانمیشدی.

ورزقان شهری اهرین یاخینلیغیندا دیر و آذربایجانین بؤیوک، غنی و دولغون مس معدنی بو شهرین یاخینلیغیندا یئرلشمیشدیر.

 

-عباس لسانی-(اردبیللی-اردبیل زیندانی–هله لیک استعلاجی مرخصی لیکده)

دفعه لرله یاخالانیبدیر. حبس و تبعیده محکوم ائدیبلر. سون دفعه تبریز ده محکمه دن(دادگاهدان) چیخاندا اردبیلین امنیتی قوه لری طرفیندن یاخالانیب، اردبیل اطلاعاتینا آپاریلیب و بیر آی اوردا باسقیلار آلتیندا ساخلانیلدیقدان سونرا، زیندانا آپاریبلار. بیرینجی محکمه ده ۸ ایل حبسه محکوم ائدیلمیشدیر! و اعتراض ائتدیکده ۱۵ ایل حبسه و ایکی ایل سورگونه( یزد شهرینده) محکوم ائتمیشدیلر. البته ۱۰ آی دا تبریز محکمه سینده حبسه محکوم ائدیلیب. دفعه لرله قانونسوزجا و زوراکیلیق لا یاخالاندیغی زامان  بئلینین اومورغاسینین مینجیقلارینا(ستون فقرات مُهره لرینه) صدمه دیمیشدیر. ایندی تقریبن آلتی آی دیر محکمه حکیمی(پزشکی قانونی)-نین نظری ایله استعلاجی مرخصلیگه گلمیشدیر. دوکتورلارین مستند نظرینه گؤره اگر کامل شکیلده معالجه اولونماسا آللاه ائتمه سین فلج اولا بیلر. بو گونلر مرخصلیگی قورتارماق عرفه سینده دیر و احتمالی وار محکمه حکیمی(پزشکی قانونی)-نین نظرینین عکسینه، زیندانا قایتاریلا.

گؤره سن بئله زواکیلیقلارین قارشیسیندا کیمسه مسئولیت حس ائدیر یا یوخ؟!

 

۱۰-علیرضا فرشی  -(مرندلی- تهران بزرگ زیندانی- هله لیک استعلاجی مرخصی لیکده-پابندله=ائلئکتئرونیک آیاق باغی ایله)

۱۳۹۲ –جی ایلده آنا دیلی گونو مناسبتی ایله ایلگیلی قورولان بیر مراسیمده اشتراک ائتدیگی اوچون حمید منافی، بهنام شیخی و اکبر آزاد ایله بیرلیکده یاخالانیب، اول ۱۰ ایل حبس و ایکی ایل سورگونه محکوم ائدیلمیشدیلر. سونرا حُکم سیندیریلیب ایکی ایل حبس وایکی ایل سورگون حکمو وئرمیشدیلر.  داها سونرالار زینداندا اولارکن باشقا بیر اتهام اساسیندا مجموع دا ۵۰ آی زیندان حکمو ده وئرمیشدیلر.

علیرضا فرشی خبرسیزجه یاخالاندیغی زامان گؤزلرینه ضربه دیمیشدیر و سول گؤزونون قارا گیله سینه شدتله صدمه وورولموشدور. آللاه ائتمه سین، گؤزو کور اولماق خطری ایله قارشی-قارشییا اولدوغو اوچون ایندیلیکده استعلاجی مرخصلیکده دیر.

 

۱۱-علی واثقی-(اردبیللی- اردبیل زیندانیندا- هله لیک  مرخصی لیکده- پابندله=ائلئکتئرونیک آیاق باغی ایله)

قارداشی رضا واثقی ایله بیرلیکده وطن سئوه رلیک اوجوباتیندان ایکی ایل زیندانا محکوم ائدیلمیشدیلر. ایندیلیکده مرخصی لیکده دیرلر.

 

۱۲-رضا واثقی -(اردبیللی- اردبیل زیندانیندا-هله لیک  مرخصی لیکده- پابندله=ائلئکتئرونیک آیاق باغی ایله)

قارداشی علی واثقی ایله بیرلیکده وطن سئوه رلیک اوجوباتیندان ایکی ایل زیندانا محکوم ائدیلمیشدیلر. ایندیلیکده مرخصی لیکده دیرلر.

 

۱۳-حمید منافی-(تبریزلی- ایکی ایل سورگون- هله لیک  مرخصی لیکده)

۱۳۹۲ –جی ایلده آنا دیلی گونو مناسبتینه قورولان بیر مراسیمده اشتراک ائتدیگی اوچون علیرضا فرشی، بهنام شیخی و اکبر آزاد ایله بیرلیکده یاخالانیب، اول ۱۰ ایل حبس و ایکی ایل سورگونه محکوم ائدیلمیشدیلر. سونرا حُکم سیندیریلیب ایکی ایل حبس و ایکی ایل سورگون حکمو وئرمیشدیلر. حال حاضرده حبسی قورتاریب و سورگون مرحله سینده دیر.

 

۱۴-بهنام شیخی-(اردبیللی- ایکی ایل سورگون- هله لیک  مرخصی لیکده)

۱۳۹۲ –جی ایلده آنا دیلی گونو مناسبتینه قورولان بیر مراسیمده اشتراک ائتدیگی اوچون علیرضا فرشی، حمید منافی و اکبرآزاد ایله بیرلیکده یاخالانیب، اوّل ۱۰ ایل حبس و ایکی ایل سورگونه محکوم ائدیلمیشدیلر. سونرا حکم سیندیریلیب ایکی ایل حبس وایکی ایل سورگون حکمو وئرمیشدیلر. حال حاضرده حبسی قورتاریب و سورگون مرحله سینده دیر.

 

۱۵- اصغر فرجی(تهراندا ساکین دیر- ائوین زیندانی)

۱۴۰۱-جی ایلین خورداد آیینین سون گونلرینده بئش ایللیک حبس چکمک اوچون تهرانین ائوین زیندانینین ۴-جو بندینین قرنطینه بؤلومونه آپاریلمیشدیر. بو تورک آذربایجانلی میللی فعالین اتهامی « میللی امنیتی پوزماق نیّتی ایله اجتماع و تبانی ائتمکدیر.»

البته بو اتهامی هر بیرمیللی چالیشقانا نسبت وئریرلر. هابئله هر یئریندن دورانا «تشکیلات قورماق» اتهامی وورورلار. حال بو کی اوچ نفرلیک بیرNGO –یا دا اجازه وئرمیر یارانسین!

هر منطقی اعتراضی «نظامین علیهینه تبلیغی فعالیت» کیمی دیه رلندیریرلر.

ایللردیر بو کیمی اپریمیش اتهاملارلا آذربایجان میللی حرکتینی بوغماق ایسته ییرلر. آنجاق من یقین ائدیرم بو حرکت:

بوغولان دئییل، سوسان دئییل، دوران دئییل و گونه-گوندن اؤز حق یولوندا ایره لی لییر!

 ۱۶- و ۱۷ و ....

 

یوخاریداکی زیندانیلری و اونلارا اوخشار باشقا زیندانیلر هر طرفلی باسقی آلتیندا اولورلار:

 

-شخصی وسیله لری قانوندان قیراق مصادره وضبط اولونور

 

-عایله لرینه آغیر باسقی و تضییقلر اعمال اولونور

 

-معیشت و ایش باخیمیندان آغیر-آغیر سیخینتیلارا معروض قویولورلار و مناسب بیر یئرده ایشه باشلاییب چالیشمالارینین قارشیسی آلینیر

 

-چئوره لرینده اولان انسانلار، مختلف رویه ایله تهدید اولورلار و زیندانیلردن اوزاقلاشدیرماغا چالیشیرلار-بعضن یاخالاندیقلاری زامان ویا زینداندا اولدوقدا ایشکنجه اولورلار و آغیر جسمی و روحی صدمه لره معروض قالیرلار. و....

 

سونوندا؛ بوتون وطن سئوه ر زیندانیلره، سؤز و عقیده زیندانیلرینه آزادلیق آرزو ائدیرم

و ... یقین ائدیرم: میللت قارشیسیندا،

 ظلمون عؤمرو آز اولار.

اکبرآزاد-۱۴۰۱/۰۵/۱۹

 

 

گونازتی‌وی

SH.A