آنا دیلیمیزین(آذربایجان تورکجه سینین) مکتبلرده تدریس اولماسینا مانع اولورلار. دیلیمیز- ادبیاتیمیز عَملده یاساق دیر. آذربایجان تورکجه سینده یازانلار چئشیتلی تضییقلرله قارشیلاشیرلار.

 

فاشیست قوّه لر ایللردیر چالیشیرلار دیلیمیزی اؤلدوروب، یئرینه اؤزگه بیر دیلی، ملّتیمیزه تحمیل ائتسینلر!

 

پلانلی ایشسیزلیک یارادیرلار. ملتیمیزین چالیشان قوه لری، اؤز معیشتینی تأمین ائتمک اوچون، غربت ولایتلره مهاجرت ائتمه یه مجبور اولورلار. اصلینده اعلان اولمامیش بیر سورگونه گؤندریرلر. بئله لیک له ده ملّتیمیزه آسیمیلاسیون و هویت دییشیک لیگی نی تحمیل ائدیرلر.

 

یاشام چئوره میزی(محیط زیستیمیزی) تخریب ائدیب، 30 میلیونلوق نفوسو اولان بیر ملّتیمیزین حیاتینی محو اولماق تهلکه سییله قارشیلاشدیریبلار، هله ده داها آرتیق تَهلُکه ایله قارشیلاشدیرماغا چالیشیرلار.

 

وطنیمیزین یئر آلتی و یئر اوستو ثروتلرینی تالان ائدیرلر.

مئشه –اورمانلاریمیزی قارات ائدیرلر.

غنی معدنلریمیزی قازیب ، سؤکوب آپاریرلار.

چایلاریمیزین، بولاقلاریمیزین سویونو تصاحب ائدیب ساتیرلار  و....

امّا بونلارین گلیریندن آذربایجانیمیزا هئچ  بیر پای یوخدور.

 

آلتی مین کیلومئتر-مربع وسعتینده اولان گونئی آذربایجانین ماوی اؤرگینی، یعنی اورمو گؤلونو قوُروتماغا چالیشیرلار. گؤله آخان سولارین قارشیسینی آلیبلار. سویونون یوزه دوخسان بئشی قورویوبدور، قورودولوبدور و مین ایللردن بَری، گؤلده یئرلشن دوزلار اوزه چیخیبدیر. بو دوزلار نورمال بیر دوز دئییللر! متخصصلرین نظرینجه لاپ آزی 20 نوعدان آرتیق مختلف ترکیبلی دوز و فیلیز(مئتال)  بو  دوزلارین ترکیبینده واردیر و قورودوقدان سونرا چوخ تَهلُـکه لی بیر دوروما گلیب چیخیرلار. حزین بیر یئل اسدیکده ده، گؤیه سوورولا بیلیرلر. حال بو کی، اورمو گؤلو بؤلگه سینده اَسن یئللر و قوپان فیرتینالار چوخ برک اَسیرلر! حتّا تهرانا قدر ده گلیب چیخا بیلیرلر.

 

یئرلی اهالی ائله ایندی ده بو زَهَرلی دوز فیرتینالاری ایله قارشی-قارشییادیرلار.

اورمو گؤلونه آخان چایلارین اوزه رینه یئتمیش ایکی (72) بند-باراژ و سدّ تیکیبلر....

 

کربلا واقعه سینده اشقیالار، امام حسین(ع)-ی تسلیمه مجبور ائتمک اوچون، سویو اونون و آزادلیق – عدالت سئوه ر یار- انصارینین اوزونه باغلادیلار. آنجاق او اؤزگور انسانلار ذلّته باش اَیمه دیلر. نتیجه ده شریر اشقیالارین قلینجی، یئتمیش ایکی آزادلیق – عدالت سئوه ر انسانی شهید ائدیب، باشلارینی حقسیز یئره کـَسدی.

 

ایندی اورمو گؤلو بؤلگه سینده یئتمیش ایکی (72) بند-باراژ و سدّ، شریر اشقیالارین قلینجی کیمی عمل ائدیر. هر سدّ بیر شریر قیلینجی دیر و گونئی آذربایجان تورک ملّتی نین ضدینه عمل ائدیر! بو فرق ایله کی، کربلا دا 72 شریف انسانی شهید ائدیب  عایله لرینی ظالیمجه سینه اسیر ائتدیلر. امّا بو گون آذربایجاندا 30 میلیونلوق بیر ملّتی اوشاقدان بؤیوگه محو ائتمک ایسته ییرلر.(دؤرد، 2/7 میلیون نفر=دؤرد دنه یئددی میلیون ایکی یوزمین نفر)

 

بو گون گونئی آذربایجانین آزادلیق و عدالت سئوه ر انسانلاری بئله بیر جنایتلری افشا ائتمک ایسته ییرلر. آنجاق شدّتله تاپدالانیرلار، باسقی و تضییق آلتینا آلینیرلار. جریمه، زیندان، تبعید(سورگون) و ایشکنجه ایله قارشیلاشیرلار.

 

آذربایجان ملّی چالیشقانی هئچ بیرکسین علیهینه دئییل، آنجاق اؤز ملّتینی و ملی کیملیگینی قوروماغا جهد ائدیر. طبیعی دیر هرکس آذربایجانین وارلیغینین علیهینه اقدام ائتسه، آذربایجان ملی فعاللاری اونون تالانلارینی، قارات ائتمه لرینی، باسقیلارینی و تضییقلرینی افشا ائده جکلر.

 

اکبرآزاد – 1401/05/20

 

گوناز تی وی

 E