بوگون گونئی آزربایجان دا ۱۰۰ایله آشقیندیر، قیغیلجیم اولاراق اؤزونو گؤسته‌رن و چوخ زامان گؤرمه‌زدن گلینیب، قئیده آلینمایان بیر قادین حرکاتی باشلانمیشدیر؛ سون ۳۰ایل ایسه ادبی درنک‌لردن، بیلیم‌‌یوردو درگی‌لریندن باشلاییب میدانلارا یول تاپان بو حرکات‌ آرتیق اؤزونه عایید باغیمسیز ،دانیلماز بیر کیملیک الده ائده بیلمیشدیر.

سون ۳۰ایلین باشلاریندا گونئی آزربایجان قادین حرکاتینی آراشدیردیغیمیزدا؛ تورکجه درگی‌‌‌لرینده‌کی قادین یازارلارین یازی‌لارینی و چاغیمیزدا یاییملانمیش شعر و اؤیکو‌ کیتابلارینین دوشونجه‌ قاورامینی گؤزدن‌ کئچیردییمیزده بو اؤنجول قادینلاریمیزین تمل اینانج و اولکوسونون میللی‌ ایلکه‌لر اؤزه‌رینده اولدوغونو گؤروروک.

تورکجه‌ کیتابلارین آز اولدوغو او دؤنم‌ده تورک قادین یازارلارینین تمل‌ ایسته‌یی ایلک اؤنجه تورکجه یازی یازاراق آنا دیل ده‌یرلرینین قورونماسی‌‌ایدی، شعرلرینین و یازیلارینین ایچه‌ریینده ایسه ایران آدلانان جغرافیادا قادینا اولان آیری‌سئچکیلییه وورقولاماق‌دان‌سا داها چوخ  تورکلویونه قارشی ایره‌لی سوروله‌ن آیری‌سئچکیلییه وتاپدالانمیش میللی کیملیینه توخونمالاری اولموشدور.

آنجاق بو قیغیلجیم زامان زامان داها چوخ گؤرونمه‌ک و بیر آتش اولوب آیدینلاتماق آرزوسویلا ،آرتیق ایل‌لر بویو مدنی‌ ایله‌ری‌ سوردویو موجادیله‌سینی کیتابلاردا، درگی‌لرده، ادبی‌صحنه‌لرده، توپلومسال‌ ائتکینلیک‌لرده حصر‌اولونماسینا بوراخماییب؛ آکتیو اولاراق ایسته‌ر میللی کیملیی اوغروندا ،ایسته‌ر ایل‌لر بویو گؤرمه‌ز‌دن گلینیب ازیله‌ن قادینلیغی اوغروندا چئشیت‌لی اعتراض آکسیالاریندا بولونوب بوگون گؤروندویو کیمی اؤزونو میدانلارین اؤنجولو اولاراق تانیتدیرمیشدیر.

بوگون دانیلماز اولاراق گونئی آذربایجانین سیاسی اورتامی، چئشیتلی باسقی‌لاردان دولایی, بیلینجلی بیر شکیل‌ده میللی‌ کیملیینین فرقینده بولونان و اولکوسو اولان آیدین‌ بیر توپلوم یئتیشدیرمک‌ده‌دیر چونکو ایلک‌باشدا توپلومونون بطنین‌ده بولونان قادینلاری آیدین‌دیر، تورک پیسخولوغو "دوغان جوجل‌ اوغلونون‌"دا وورغولادیغی کیمی «بیر توپلوم آنجاق قادینلاری قدر آیدیندیر.»

گونئی آزربایجان قادینلاری ایلک باشدا اؤز ائوینده عاییله‌‌سی ایچینده آتا‌ارکیل‌ دوشونجه‌لر قارشیسیندا دیره‌نیب، اؤزونو یئتیشدیریب‌دیر. دینی اوتوریته‌یه صاحیب اولان ملا‌ رژیمی طرفیندن توپلوما‌ انژکته‌ ائدیله‌ن قادین دوشمانلیغی دوشونجه‌‌سینین قارشیسیندا ایسه یخیلما‌دان دایانیب ،گؤرمه‌زدن گلیندیی‌قدر گؤرونمه‌یه چالیشیب و ازیلدیی‌ قدر دیرنیب، باشدا وورغولادیغیم کیمی هئچ بیر ائیتیم یؤنو ساغلانمادان اؤزو اؤزونو یئتیشدیریب و آیدین بیر توپلومون تملی‌نی قویموشدور.

آردیمیزدا بوراخدیغیمیز ۲۰۲۲ ایلی ایران آدلانان جغرافیانین سیاسی دورومو‌ ایله باغلی بیر چوخ ندن‌دن دولایی کرئتیک بیر اؤنم داشیماقدادیر. بو ندن لرین بیری دونیا مئدیالارینین گوندمینده آردی-آردا ایره‌لی سوروله‌ن قادینلارین دئوریمی باشلاتدیقلاری باشلیغی‌ و آرتیق قیغیلجیم اولان قادینلارین آتشه چئوریلدیی قونوسو‌دور،آرتیق بو جوغرافیادا حاقلاری تاپدالانمیش قادینلار گؤرونمه‌ک‌ده و قیسیلان سسلری گور بیر وضعیت‌ده دونیادا ایشیدیلمه‌ک ده‌دیر.

گونئی آزربایجان‌ دا قادینلار #آزادلیق_عدالت_میللی_حکومت شعاری ایله میللی کیملیک‌لری اوچون و #قادین_یاشام_آزادلیق شعاری ایله قادین حاقلاری اوغروندا موباریزه آپارماقدادیرلار.

اؤنجول قادینلاریمیز گونئی آزربایجان دا میللی ائگه‌منلیی‌میزی الده ائده بیلمه‌دییمیز سوره‌جین ایچینده ،فردی و قادین حاقلاریمیزین دا الده ائدیله بیلمه‌یه‌جه‌یینی درین‌دن حیسس ائدیب، بوگون مئیدانلاردا موباریزه آپاران هر بیر تورک قادینینی دا قادین و میللی کیملیک موجادیله سینین یان-یانا آپاریلماسینا چاغیرماقدادیرلار.

گونئی آزربایجان ضیالی‌لاری ،اؤنجول‌لری، مئدیالاری،یازارلاری و هر بیر وطن اوغروندا ساواش آپاران اینسان ،قوروپ، تشکیلات و مئدیا؛ بوگون گونئی آزربایجان دا یارانان قادین حرکاتینی فارس اوپوزوسیونونون یالانلارینا قاپدیرماماق آماجلی قادین جبهه‌میزین داهادا آرتیق سسی اولمالیدیر.

گوناز تی‌وی

SH.A