بو فضا یا بو بحران بیر حالت یارادیب کی اینسان گلیشمه ییندن اوزاق اولوب چالیشماغیندان اوزاق دوشوب راحات اولا بیلمیر. آدی بیر تاپدالیق دیر، آدی بیر سرکوب تعریفله نیب کی اینسانین دوراجاق یئری و جایگاهینی تاپدالاییر. او بشری تحقیر ائدیب، یوخسول ائدیب، فیکیردن،عمل دن، دانیشماقدان و حس ائتمکدن قیراق سالیب بیر چیخماز یولدا قرار وئریب قابلیت لرینی الیندن آلیب، پتانسیل لرینی بوشالدیب و انرژی سیز بیر موجودا تبدیل ائدیب بوراخیر. او اراده آدلی بیر عنصرو فلج ائدیر آدی بیر دپرم دیر آدی بیر زلزله دیر.

او بشری ایچری دونیاسینین دؤیوش تیکینتیسینی اوچوراندان سونرا بشری چؤل دونیاسیندا همن توپلومدا یوواسیز و اوچوق بیر فضادان اوزبه اوز ائدیرکی اونون روانی قاتلاریندا چوخ تهلوکه لی بیر تاثیرلری قویور، او یاشامدا خالیق اولماق قابلیتینی سندن آلیر، آدی گوجسوزلوک دور آدی ضعف دیر. سنی بوتون قدرت لرین قارشیسیندا تسلیم ائدیر، سنی بیر تانینمامیش و غریب بیر دونیادان اوزبه اوز ائدیر، سنی او غریب دونیادا سرگردان قویوب آدرس سیز بوراخیب، اوزاق اولور. بیر دونیاکی سنین کیملیگیندن، کولتوروندن هئچ بیر تانیشلیغی و اوخشارلیغی یوخدور آدی نهلیزاسیون دور، یانی بوشلوق، آدی نهلیزم دیر یانی بوشا چاتماق.

قورخولو بیر آد، زهیرلی بیر فضا، آدرس سیز بیر محیط، آناسیز بیر اوشاق. بو حاکیم اولاندا نه تکجه سن و سنین یاشامین بلکه ده تاریخده اؤز مشروعیتینی الدن وئرمیش اولور، او سنی سندن غریب ائدیب اوزاق ائده جک و او قدر سنی تحقیر، تخریب و تهدید دیدرگین قویاجاق کی چئوره-نده اوز وئرن اولای لارا تفاوت سیز قالارسان و سنی آپاراجاق اوچوروما طرف تا سن نؤکر اولماغا باش اییب کنش و واکنش دن اوزاق اولوب قارانلیق یئرلری آختاریب اؤزونو یئرلشدیریب گیزلی قالماغی سئچه سن، آدی بوش اولماق دیر آدی بوشلوغا یئتیشمک دیر، آددیم قویسان بوشا گئدیب بوغولاجاقسان، آدی نهلیزم دیر.

ایندی سؤزوم سنینله دیر، ایسترسن بو غریب دونیادا، بو بوش دونیادا، بوشونا یاشاییب، بوشونا کئچینیب، ایتمیش بیر اینسان اولوب، اؤلموش بیر موجود اولاسان یا ایسترسن بیر اینسان کیمی یاشایاسان اوندا آددیم آت و چیخ او بوش دونیادان و ایچینده کی اومودونو الدن وئرمه، آددیم آت، ییرت بو قارانلیق لحظه لرین و فضالارین اوره یینی، ائش سنینله گونش آراسیندا اولان دووارلاری و داغلاری، تاپ گؤزه نه یی و آددیم آت آیدینلیغا دوغرو، دایانما، یورولما، اودوزما، سوسما، سوستالما و اؤزونو الدن وئرمه.

آج و سوسوز قالسان دا، یوخسول و یوواسیز قالسان دا, آت آددیم لارینی، حیاتین گؤزل و شیرین آنلارینی تاپماق اوچون آت آددیم لارینی، اؤز اصیل جایگاهینی و دوراجاغینی تاپماق اوچون آت آددیم لارینی. اگر تضادلی و قارانلیق لحظه ده قرار تاپسان آت آددیم، اینجیمه بونو آنلاکی گئجه نین ان قارانلیق چاغی گونشین دوغولان چاغی دیر. آت آددیم لارینی، پوز بو قارانات چاغلارینی، گولوش لره باخ اوتورور پوزغونلوغون یئرینه، ایشیغا باخ اوتوروب قارانلیغین یئرینه، آت آددیم منیم آنام، منیم آتام، منیم باجیم و قارداشیم، منیم گنج یاشیندا یاشایان کسیم، باخ دونیانین قورتاراجاق چاغی بوردا تعریف اولماییب.

باخ هله گئجه گوندوز اؤز مسیرلرینده و اؤز محورلرینده قرار تاپیب لار. آت آددیم ایچینده کی هایقیران اومودلا آت آددیم، وئرمه اؤلچولرینی الدن، قرار تاپما بو بوشلوغا چاغریلان اورتادا، آت آددیم وئرمه اومولارینی الدن، آت آددیم، باغیشلا گولوش لرینی و ایچینده اولان سئوگینی، چئوره-نده اولان اینسان لار سنین اومودلارینا، گولوش لرینه گره یی وار. آت آددیم لارینی، قورخما دور آیاغا، قالخ ان شیرین و ان دادلی آنلار ان چتین آنلارین باغریندان دوغولور. دور آیاغا پوز بو نهلیزمی، بو بوشلوغا چاغیران منبرلرین سسینی، دور آیاغا پوز بو نهلیزمی، دور آیاغا.

توحید امیرامینی

ائوین زیندانین ۴_ینجی بندی ۱۴۰۱/۱۰/۱۵

گوناز تی وی

E