Bakıdan qovulan İran mollasına yüksək vəzifə verildi

SON XƏBƏRLƏR

Bakıdan qovulan İran mollasına yüksək vəzifə verildi

2024.10.14, 14:59

Günaz.tv xəbər verir ki, 2021-ci ildə Bakıdan qovulan İranın ali dini liderinin Azərbaycandakı nümayəndəsi Əli Əkbər Ocaqnejad, İran rejimi tərəfindən yüksək vəzifəyə gətirilib.

Gunaz.tv

Mövzu ilə bağlı Musavat.com geniş araşdırma paylaşıb.

Ocaqnejad Cəmkəran adlı nəhəng maliyyə qaynağı olan məscidin rəhbəri kimi çıxış edib. Bu çıxışda Bakı qaçağı Livana dəstək yerinə yavan çörək vəd edir: “Livanlılar bilsinlər ki, iki çörəyimiz olsa, birini ailəmizə, digərini livanlılara göndərəcəyik. Bütün imkanlarımızla Livan və Fələstini qoruyacağıq!”

Livan və Fələstini qırğına verən, İsrailə qarşı döyüşən Həmas və Hizbullah təşkilatlarının xarizmatik liderlərinin aradan götürülməsində iştirak edən Qum mollakratiyası sadəcə sözdə əsib - gurlayır. Molla rejimi özünü qorumaq üçün proksi güclərini qurban verir və bu xətt aydınca görünür.

Ocaqnejad, 20 il ərzində İranın ali lideri Xameneyinin Azərbaycandakı nümayəndəsi kimi fəaliyyət göstərib. Azərbaycanda da İran kimi gerilikçi bir rejim qurmaq üçün yorulmadan çalışıb. Minlərlə soydaşımızı "verbovka" edərək, Qum nökərinə çevirib. Sonda da bu cür təxribat xarakterli fəaliyyəti səbəbilə ölkədən çıxarılıb. Onun Bakıdakı fəaliyyətləri sırasında ekstremist meyilləri yaymaq və yerli dini dairələrdə təzyiq yaratmaq kimi addımlar var idi.

Görünən budur ki, onun Azərbaycandakı pozucu fəaliyyəti Tehranda yüksək qiymətləndirilib. Yoxsa hər adamı İranın dini həyatında mühüm rol oynayan Cəmkəran məscidinə rəhbər qoymazdılar. Bu məscid, "İmam Mehdinin zühuru ilə əlaqəli müqəddəs bir məkan hesab olunur və İran dindarları, eləcə də dünyadakı şiələr üçün böyük dini əhəmiyyət" daşıyır. Məscidə hər il milyonlarla zəvvar gəlir, nəhəng məbləğlərlə ifadə olunan nəzir və ianələr toplanır. Bu təsis İranın dini-siyasi strategiyalarında xüsusi yerə malikdir və "örtülü ödənək"i maliyyələşdirən axın xətlərindən biridir.

Xatırladaq ki, Ocaqnejad Azərbaycanda diplomatik statusla, İran səfirliyinin əməkdaşı kimi qeydiyyata düşməsinə baxmayaraq, öz statusuna uyğun fəaliyyət göstərməyib.

Belə ki, onun ofisinin yerləşdiyi Hüseyniyyə məscidi İran Mədəniyyət Mərkəzi kimi təqdim edilsə də, orada mədəniyyət təbliği üçün deyil, Azərbaycana qarşı dini-ideoloji və siyasi mübarizə və gizli şəbəkənin yaradılması üçün istifadə olunduğu müəyyən edilib.

Məlum olub ki, burada mütəmadi olaraq Azərbaycanın dövlət quruluşu, idarəçiliyi və hakimiyyətinə qarşı təbliğat aparılıb, dini düşmənçilik, dini radikalizm və fanatizm zəminində milli, irqi, sosial və dini nifrətin, düşmənçiliyin təbliği işi qurulub.

Azərbaycanın müvafiq dövlət orqanlarının bütün bu faktlar, qanunsuzluqlar haqda məlumat əldə etdiyindən xəbər tutan Əli Əkbər Ocaqnejad 2021-ci ildə gizli yolla Azərbaycanı tərk edib. Yəni o, faktiki olaraq, ölkədən qaçıb.

Şahin Elxanoğlu

GünazTV