Contact Us

SON XƏBƏRLƏR

İranda 10 gün ərzində 5 yanğın baş verib

2025.05.05, 11:46
İranda 10 gün ərzində 5 yanğın baş verib

İranda son vaxtlar zavodlarda baş verən yanğınların artması diqqət çəkir

Gunaz.tv

GünazTV Anadolu Agentliyinə istinadla xəbər verir ki, aprelin 26-da İranın cənubunda, körfəz sahilində, Bəndər Abbas Şəhid Rəcai limanında baş verən və onlarla insanın ölümünə səbəb olan partlayışdan sonra ölkənin müxtəlif bölgələrində ən azı 5 yanğın baş verib.

Limanda baş verən partlayışda təxribatın olması iddia edilirdi. Əli Xamenei təhlükəsizlik qurumlarına partlayışda qəsd və ya səhlənkarlığın olub-olmadığını öyrənməyi əmr etdi. Liman partlayışı ilə bağlı istintaq davam edir.

Limandakı partlayışdan 3 gün sonra, aprelin 29-da İsfahanda barıt zavoduna məxsus anbarda növbəti partlayış baş verib. Partlayış nəticəsində iki işçi həlak olub, bir nəfər yaralanıb. Səlahiyyətlilər hələlik partlayışın səbəbini açıqlamayıblar.

İranda baş verən yanğınlar təkcə liman və ya barıt zavodundakı partlayış ilə məhdudlaşmayıb. Son bir neçə gün ərzində ölkənin müxtəlif bölgələrində yanğınlar baş verib.

Sosial şəbəkələrdə Əlborz əyalətinin Kərəc şəhərində əsas elektrik stansiyasında yanğın baş verməsi xəbəri yayılıb. Daha sonra İran rəsmiləri yanğının elektrik stansiyasında deyil, yaxınlıqdakı zibil toplama sahəsində və karton fabrikində baş verdiyini iddia etdi.

Sosial şəbəkələrdə yanğının elektrik stansiyasında baş verdiyinə dair görüntülər və iddialar yayılarkən, dövlət televiziyası stansiyadan görüntülər paylaşaraq stansiyada yanğın olmadığını iddia edib.

Daha sonra İlam əyalətinin qərbində ildırım vurması nəticəsində meşəlik ərazidə yanğının baş verdiyi bildirilib.

Qum şəhərində mütəşəkkil sənaye zonasındakı fabrikdə yanğın baş verib. Yanğın zamanı ikisi ağır olmaqla 5 işçi xəsarət alıb.

Bunun ardınca İranın şərqindəki Rəzəvi Xorasan əyalətinin Məşhəd şəhərindəki fabrikdə böyük yanğın baş verdiyi açıqlanıb. Yanğının baş vermə səbəbləri araşdırılır, lakin tələfat və xəsarət alanlar barədə məlumat verilmir.

Qeyd edək ki, İran rejimi baş verən partlayışlar və ya yanğınlarla bağlı dəqiq məlumat vermir, bu hadisələrdə təxribatın olub-olmamasına aydınlıq gətirmir.

 

 

Şahin Elxanoğlu

Açar Sözlər :

OXŞAR XƏBƏLƏR

SEÇİLMİŞ XƏBƏRLƏR

Çox oxunanlar