Monarxizm hərəkatının tərəfdarı olan İran Beynəlxalq Televiziyası (Iran International) “Günün Hesabatı” proqramında Zəngəzur dəhlizi və Azərbaycanla İran arasında olan münasibətlərlə bağlı son prosesləri təhlil edib. Hesabatın məzmunu onu göstərir ki, bu şəbəkə də son zamanlar Azərbaycana qarşı (quzey və güney) media, iqtidar və müxalifət hərəkatlarının geniş və koordinasiyalı hücumları dalğasına qoşulub və göstərib ki, mövzu Azərbaycan və türklərin müzakirəsi olanda hətta İran İnternasional belə rejimin yanında yer alır.

Proqram adı “İranın ərazi bütövlüyünün boğazında bıçaq” olaraq seçilib. Zəngəzur dəhlizinin əsas etibarı ilə ərazi bütövlüyü ilə əlaqəsi olmadığı və reallaşacağı təqdirdə, İranın Ermənistanla quru əlaqəsinin kəsilməsi demək olmamasını deməsinə, Azərbaycanın bu dəhlizin gündoğarla günbatar, quzey ilə güney arasında iqtisadi kəsişmə rolunu oynaya biləcəyini və bundan bütün tərəflərin faydalana biləcəyini dəfələrlə vurğulamasına baxmayaraq, aydındır ki, bu hesabatın və ümumən bu dəhlizi tənqid edənlərin ərazi bütövlüyü məsələsini vurğulamaqda məqsədi, təbii ki, fars/tacik millətçiliyi prizmasından təqdim olunan Ermənistanla quru əlaqəsi deyil, Azərbaycan və Türkiyə arasında quru əlaqəsinin yaranmasından duyduqları narahatlıqdır.

Heç bir fakta söykənməyən bu hesabat İslam Respublikasından olan mənbələrə istinad edir və İnad Cəbhəsi sözçülərinin və ikiüzlü iranlıların 12 günlük müharibədə Azərbaycanın İsraillə əməkdaşlığı və ya İbrahim Rəisinin öldürülməsi ilə bağlı gülünc iddialarını dilə gətirir. Çıxış edən məruzəçi, Qarabağ münaqişəsində Ermənistana İslam Respublikasının yardımını yetərsiz hesab edir və Əli Xameneyinin Azərbaycanın ərazi bütövlüyü ilə bağlı bəyanatlarına etiraz edirlər. Halbuki, Əli Xameneinin bu bəyanatı  savaşın taleyi həll olandan çox sonra gəlmişdi.

Məruzədə İlham Əliyevin İslam Respublikası rejimini devirməyə çalışması kimi qaynaqsız iddialar irəli sürülür və Məsud Pezeşkianla İlham Əliyev arasında olan “xüsusi münasibətlər”ə, “isti münasibətlər”ə diqqət çəkilir və əlavə edilir ki, Azərbaycan Respublikasında media Pezeşkianı tərifləyərkən Əli Xameneiyə hücum edir. Aydındır ki, bu məruzənin məqsədi İran hökuməti daxilində Azərbaycan Cümhuriyyəti ilə isti münasibətlərə çalışan Güney Azərbaycanlı türk çevrəni SEPAH və Nümayəndələr Palatasının hədəfinə çevirməyə çalışır. Çünki heç kimə sirr deyil ki, istər İranşəhri, istərsə də şuhubi tipli, istər rejim daxilində, istərsə də xaricdə olan fars/tacik millətçilərinin hakimiyyət daxilində Pantürk hərəkatı adlandırdıqları hərəkatın güclənməsindən narahatdırlar.

Maraqlıdır ki, adətən “rejim” və “İslam Respublikası” sözlərini “İran”dan ayrı istifadə edən İran Beynəlxalq Televiziyası bu xəbərdə “Tehran”, “İran” və “İranlılar” sözlərindən istifadə edərək, bu məsələdə rejimə qarşı deyil, onun tərəfində olduğunu göstərir.

C