İran bundan əvvəl bunu Nigeriyada həyata keçirə, “Nigeriya İslam Hərəkatı” vasitəsilə bacara bilsə də, başqa Afrika ölkəsi olan Çad bunun qarşısını almağa, İranın casus şəbəkəsini dağıtmağa nail ola bilib.

Argentinanın "İnfobae" nəşrinin də yaydığı məlumata görə, Çad təhlükəsizlik qurumları SEPAH-ın Qüds qüvvələrinin iki casus və əməliyyat şəbəkəsini ifşa edib.

Nəşrin bildirdiyinə görə, İran hökuməti ilə əlaqəli olan iki terror şəbəkəsinin bir neçə üzvünün həbsi İslam İnqilabı Keşikçiləri Korpusunun Qüds qüvvələrinin və İran İslam Respublikası Kəşfiyyat Nazirliyinin Afrikada təxribat, casusluq üçün strukturlar yaratmaq fəaliyyətini ifşa və iflic edib. Məlumata görə, Tehran dini təsir, ideoloji təlim, hərbi dəstək və əməliyyat rəhbərliyinin kombinasiyası vasitəsilə ABŞ və İsrailin maraqlarına hücum etmək və Afrika hökumətlərini qeyri-sabitləşdirmək üçün şəbəkələr yaratmağa çalışır.

Saxlanılanlardan biri olan Əli Abdullahi Məhəmmədatın etirafları göstərir ki, o, İranın siyasi-ideoloji mərkəzlərindən biri olan Qum şəhərindəki Əl-Mustafa Universitetində təhsil aldıqdan sonra kəşfiyyat agentləri tərəfindən işə cəlb edilib.

Çadda İslam Respublikası ilə əlaqəli iki şəbəkənin aşkarlanması Tehranın Afrika ölkələrinə nüfuz etmək və sabitliyi pozmaq planının yeni ölçülərini ortaya çıxarıb. Tutulanların etiraflarına görə, bu plan Qərb maraqlarına qarşı əməliyyatlar aparmaq üçün qüvvələrin cəlb edilməsini, təlim keçirilməsini və təşkil edilməsini əhatə edir.

Dindirmələr zamanı Məhəmmədat 2022 və 2023-cü illərdə İrandakı otellərdə və təhlükəsiz yerlərdə iranlı məmurlarla görüşdüyünü və bu məmurların ona Qərb hədəflərini müəyyən etmək, qüvvələr cəlb etmək, üsyançı qrupları izləmək və Çaddakı Amerika, İsrail və Fransa qüvvələrinin mövcudluğu haqqında həssas məlumatları ötürmək missiyasını tapşırdığını söyləib.

Bu, SEPAH-ın Qüds qüvvələrinin Uqanda və Seneqalda İsrail səfirliklərinə qumbara ilə hücum etmək üçün bir Uqanda vətəndaşını cəlb etməsi, ancaq terrorçunun aşkarlanaraq həbs edilməsi barədə xəbərin yayılması ilə eyni vaxta təsadüf edir.

Bununla yanaşı, Çad təhlükəsizlik məmurları xarici əməliyyatlar aparmaq, İraq və Afrikada proksi qüvvələrə rəhbərlik etməkdən məsul olan SEPAH-ın Qüds qüvvələrinin 400 saylı bölməsi tərəfindən işə götürülmüş Abdullah Əhməd Şeyx əl-Əmini də saxlayıb.

Şeyx əl-Əmin bu strukturun komandanlığının Həmid Abdullahi adlı bir şəxsin əlində olduğunu və Əbu Əli və Aydın Salahlu adlı şəxslərin də şəbəkənin idarə olunmasında rol oynadığını etiraf edib.

O, etirafında İraqdakı silah təlimi barədə məlumat verib və bildirib ki, İslam Respublikasına bağlı şəbəkə qüvvələri “dini səfər” adı altında şiə proksiləri ilə əlaqəli bazalara köçürülüb, onlara “Kalaşnikov”, qumbaraatan və başqa silahlardan istifadə öyrədilib.

O, həmçinin ekstremist şəbəkələrin keçmiş komandiri Musa Batrane Abakir əl-Miskinin İslam Respublikası üçün yeni qüvvələrin cəlb edilməsindəki rolu barədə ifşaedici məlumatlar verib.

Çad təhlükəsizlik rəsmiləri bildirirlər ki, bu şəbəkələrin dağıdılması İslam Respublikasının təsirini genişləndirmək və Afrika qitəsində sabitliyi pozmaq səylərini ən azı müvəqqəti olaraq dayandırıb.

Xatırladaq ki, 2019-cu ilin əvvəlində SEPAH-ın Nigeriyadakı Qüds qüvvələrinin 400-cü bölməsinin yüksək vəzifəli üzvü İsmayıl Məhəmməd Ciddə Səudiyyə Ərəbistanı rəsmilərinə qarşı əməliyyatlar planlaşdırmaqda və Amerika və Avropa hədəfləri haqqında kəşfiyyat məlumatı toplamaqda ittiham olunmuşdu. Bu isə İran İslam Respublikasının bir neçə il əvvəldən Afrika ölkələri, xüsusən Nigeriya və Çadda casus və terror şəbəkəsi qurduğuna dəlalət edir.

Bu hadisələrdən sonra Nigeriyada islam dövlətinin qurulmasını tələb edən İrana bağlı "Nigeriya İslam Hərəkatı"nın fəaliyyətinə 2019-cü ildə qadağa qoyulub.

Hərəkatın başçısı, bundan əvvəl terrorçuluq ittihamına görə həbs olunan İbrahim Zəkzaki İran rəhbəri Əli Xameneinin Afrikadakı mühüm nümayəndələrindən sayılır və İrana səfərləri zamanı Xamenei ilə görüşlər keçirir, məsləhətləşmələr aparır.

Qeyd edək ki, bu işlərin çoxunun mərkəzində İranın Qum şəhərində yerləşən Əl-Mustafa Cəmiyyəti dayanır. Afrika, Asiya və Avropada 50-dən çox filialı olan bu cəmiyyəti ABŞ 2020-ci ildə "xüsusi qlobal terror təşkilatı" kimi tanıyıb.

Tələbələrinin 80%-i xarici vətəndaşlardan ibarət olan bu mərkəz SEPAH və İranın Təhlükəsizlik Nazirliyinin nəzarəti və maliyyə dəstəyi ilə fəaliyyət göstərir. Həmin mərkəzdə Afrika, ərəb ölkələri ilə yanaşı, Türkiyə, Cənubi Qafqaz və Orta Asiya ölkələrinin də gəncləri təhsil və təlim alır.

Cavidan