Beş il ərzində Üçüncü Dünya Müharibəsi riski artıb

SON XƏBƏRLƏR

Beş il ərzində Üçüncü Dünya Müharibəsi riski artıb

2026.02.13, 15:45

Gunaz.tv

“Politico”nun yaydığı yeni sorğunun nəticələrinə görə, Qərb ölkələrində əhalinin böyük hissəsi dünyanın yeni qlobal müharibəyə doğru getdiyini düşünür. Sorğu ABŞ, Kanada, Böyük Britaniya, Fransa və Almaniyada keçirilib.

Məlumatlara əsasən, ABŞ, Kanada, Böyük Britaniya və Fransada respondentlərin əksəriyyəti yaxın beş il ərzində Üçüncü Dünya Müharibəsinin baş verməsini “ehtimal olunan” hesab edir. Yalnız Almaniyada əksəriyyət qısa müddətdə qlobal müharibəni real saymır.

Böyük Britaniyada 43 faiz, ABŞ-da isə 46 faiz respondent 2031-ci ilə qədər dünya müharibəsinin mümkün olduğunu bildirib. Bu göstərici ötən illə müqayisədə ciddi artım göstərib. ABŞ, Britaniya, Fransa və Kanadada azı hər üç nəfərdən biri yaxın illərdə nüvə silahının istifadə olunacağını mümkün sayır.

Sorğuda Rusiya Avropada sülh üçün ən böyük təhdid kimi göstərilib. Fransa, Almaniya və Britaniyada ABŞ ikinci əsas təhlükə kimi qeyd edilib. Kanadada isə bir çox respondent ABŞ-ı birinci təhlükə hesab edir.

Bununla yanaşı, əhalinin əksəriyyəti müdafiə xərclərinin artırılmasını prinsipcə dəstəkləsə də, vergilərin artırılması və ya sosial xərclərin azaldılması hesabına bunu maliyyələşdirməyə isti yanaşmır. Almaniya və Fransada hərbi büdcəyə əlavə vəsait ayrılmasına dəstək ötən illə müqayisədə xeyli azalıb.

Sorğu nəticələri göstərir ki, Qərb ictimaiyyəti müharibə riskindən ciddi narahatdır, lakin bunun iqtisadi yükünü daşımağa hazır deyil.

GünAzTV

GUNAZ.TV

SON XƏBƏRLƏR