SEPAH məktəbləri və xəstəxanaları hərbi bazaya çevirir? Tehrandan və digər şəhərlərdən narahatedici görüntülər (Foto)

SON XƏBƏRLƏR

SEPAH məktəbləri və xəstəxanaları hərbi bazaya çevirir? Tehrandan və digər şəhərlərdən narahatedici görüntülər (Foto)

2026.03.04, 07:25

Gunaz.tv

İran, ABŞ və İsrail arasında hərbi gərginliyin artdığı bir vaxtda, Tehran və bir neçə başqa şəhərdə SEPAH-a bağlı qüvvələrin bəzi məktəb və müalicə mərkəzlərini yerləşmə məntəqəsinə çevirdiyi iddia olunur.

Son günlər sosial şəbəkələrdə yayılan foto və videoların Tehranın Müniriyə bölgəsində yerləşən “Həzrət Rüqəyyə” ibtidai məktəbinə aid olduğu bildirilir. Kadrlarda hərbi geyimli şəxslərin məktəbin həyətində və dəhlizlərində hərəkət etdiyi, binanın qarşısında isə hərbi nəqliyyat vasitələrinin yerləşdirildiyi görünür. Paylaşımları edən istifadəçilər məktəbin SEPAH qüvvələri üçün əməliyyat bazasına çevrildiyini irəli sürürlər.

Yerli mənbələrdən daxil olan digər məlumatlarda isə Şiraz da daxil olmaqla bəzi şəhərlərdə hərbi qüvvələrin məktəblərə köçürüldüyü bildirilir. Məlumatlarda qeyd olunur ki, hərbi kazarmaların mümkün hədəfə çevrilməsinin qarşısını almaq məqsədilə qüvvələrin bir hissəsi qeyri-hərbi obyektlərə, o cümlədən məktəb və xəstəxanalara yerləşdirilib.

Bir neçə yerli jurnalist də sosial mediada paylaşdıqları məlumatlarda bəzi təhsil müəssisələrinin müvəqqəti yerləşmə məntəqəsi kimi istifadə edildiyini yazıb. Eyni zamanda müəllim birliklərinə aid olduğu iddia edilən bəyanatda “təhsil mühitində hərbi texnikanın yerləşdirilməsi” ilə bağlı ciddi narahatlıq ifadə olunub.

İrəli sürülən iddialara əsasən, bəzi rəsmi toplantıların da məktəb binalarında keçirildiyi bildirilir. Lakin İran rəsmiləri bu məlumatlara indiyədək birbaşa münasibət bildirməyiblər.

İran daxilində informasiya məhdudiyyətləri səbəbindən yayılan iddiaların müstəqil şəkildə təsdiqlənməsi çətindir. Beynəlxalq hüquqa görə, mülki təyinatlı obyektlərin hərbi məqsədlərlə istifadəsi və mülki əhalinin risk altına salınması ciddi hüquq pozuntusu və müharibə qanunlarının pozulması kimi qiymətləndirilə bilər.

Əgər bu məlumatlar təsdiqini tapsa, bu addım həm mülki əhalinin təhlükəsizliyini ciddi risk altına qoyur, həm də bölgədə hərbi gərginliyin daha da dərinləşdiyini göstərir.

GünAzTV
R.G

GUNAZ.TV

SON XƏBƏRLƏR