Bir stəkan dizayna görə kafeni bağladılar

SON XƏBƏRLƏR

Bir stəkan dizayna görə kafeni bağladılar

2026.03.30, 11:33

Gunaz.tv

Gunaz TV-nin məlumatına görə, İranın məhkəmə sistemi birbaşa göstərişlə Tehranda yerləşən Lamiz kafesinin bütün filiallarını bağlayıb və möhürləyib; bu addım bir daha göstərir ki, rejim ən sadə bədii ifadəyə belə dözümsüz yanaşır.

Hadisə Lamiz kafesinin aparılma üçün istifadə olunan stəkanlarında boş stul və rəng damcıları təsvir olunan dizaynın çap edilməsindən sonra başlayıb. Bu dizayn əslində köhnə bir bədii əsərə əsaslanırdı, lakin SEPAH-a yaxın media bunu “təhqir” və siyasi işarə kimi təqdim edib.

Lamiz kafesinin stəkanında yer alan bu dizayn nəticədə bütün filialların bağlanmasına səbəb olub. Rejimə yaxın çevrələr bu təsviri Ali Khamenei-nin kreslosunun bombardman edilməsi kimi yozaraq məsələni təhlükəsizlik mövzusuna çeviriblər.

Hökumətə bağlı media bu addımın səbəbi kimi “milli təhlükəsizliyə qarşı fəaliyyət” və “şübhəli dizaynlar” göstərib; bu iddialar isə rejimin mədəni və sosial fəaliyyətlərə qarşı təhlükəsizlik prizmasından yanaşdığını bir daha ortaya qoyur.

Bu təzyiqlərin davamı olaraq, Lamiz kafesinin Instagram səhifəsi də “FARAJA ictimai təhlükəsizlik polisi tərəfindən bloklanıb” mesajı ilə bağlanıb.

Bu, Lamiz kafesinə qarşı ilk addım deyil. 2025-cü ildə Yusifabad bölgəsində filialı “qeyri-rəsmi və şən video” yaydığı üçün bağlanmışdı, həmin ilin 1inci ayında isə Instagram səhifəsi ilk dəfə bloklanmışdı.

2009-cu ildə Tehranın Təcriş bölgəsində fəaliyyətə başlayan Lamiz kafesi qısa müddətdə İran daxilində ən tanınmış qəhvə brendlərindən birinə çevrilmişdi, lakin indi sadə bir dizayna görə təhlükəsizlik qurumlarının hədəfinə çevrilib.

Gunaz TV
R.G

GUNAZ.TV

SON XƏBƏRLƏR