Müctəba Xamənei Fars Dili Günü ilə bağlı müraciət yayıb

SON XƏBƏRLƏR

Müctəba Xamənei Fars Dili Günü ilə bağlı müraciət yayıb

2026.05.16, 10:30

İran rəhbəri Müctəba Xamənei 15 may Fars Dili Günü və Əbülqasim Firdovsinin anım günü münasibətilə müraciəti yayılıb.

Gunaz.tv

Bu barədə İran mediası məlumat verib.

İran rəhbəri müraciətində fars dili və ədəbiyyatınin qorunub inkişaf etdirilməsinin vacibliyini vurğulayıb, bu dilin "iranlıların birlik vasitəsi" olduğunu söyləyib:

"Fars dili danışıq və yazı vasitəsi olmaqdan əlavə, iranlıların mahiyyət sərhədləri, təfəkkür qovşağı sahəsi və idrak formasını təşkil edir. Fars dili və ədəbiyyatı, İslami İranın zəngin mədəniyyəti və sivilizasiyasının dünya miqyasında yayılması üzrə ən böyük imkanlardan biridir".

O, atası Əli Xaməneinin də fars dili ilə bağlı tövsiyələrini xatırladıb, ona istinadən "fars dilinin gücləndirilməsi və irani-islami sivilizasiyanın qüdrət yolunun çırağı" olduğunu bildirib.

İrqçi şair Əbülqasim Firdovsinin anım gününə toxunan İran rəhbəri, onun Şahnamə əsərindəki epik dastanların müharibələrdə İran xalqının müqavimət ruhunu yüksəltdiyini söyləyib.

Qeyd edək ki, İran Ali Mədəni İnqilab Şurası Əbülaqsim Firdovsinin anım günü 15 mayı rəsmi olaraq Fars Dili Günü elan edib.

Bu gün münasibətilə geniş və təntənəli tədbirləri keçirilməsi ölkədə yaşayan və dillərinin tədrisi qadağan olan qeyri-fars xalqların nümayəndələrinin narazılığı ilə qarşılaşır.

Onlar həm də, İranı "İslam Respublikası" adlandıran ölkə rəhbərliyinin, din xadimlərinin başqa dillərə qarşı qadağalar tətbiq etdikləri halda, irqçı şair Firdovsini təbliğ etdiklərini, "fars dilini ölkənin birlik rəmzi" kimi qələmə vermələrini, dini əqidələrinə də zidd və qeyri-səmimi yanaşma hesab edirlər.

Xatırladaq ki, İran Konstitusiyasının 15-ci maddəsinə əsasən qeyri-fars dillərinin öyrənilməsi və mediada istifadəsinin azad elan edilməsinə baxmayaraq, İran hökuməti 47 ildir ki, bu prinsipin həyata keçirilməsinə mane olub və başqa qeyri-fars xalqlar kimi on milyonlarla azərbaycanlını da ana dilində təhsil hüququndan məhrum edib.

GünazTV

GUNAZ.TV

SON XƏBƏRLƏR