İran yeraltı raket bazalarının onlarla girişini yenidən açıb

SON XƏBƏRLƏR

İran yeraltı raket bazalarının onlarla girişini yenidən açıb

2026.05.31, 21:48

Gunaz.tv

İranın raket potensialı yenidən güclənə bilər; peyk görüntülərinə əsasən, ölkə onlarla raket tunelinin girişini yenidən istifadəyə verib.

Gunaz.tv-nin məlumatına görə, CNN peyk görüntülərinə istinadən xəbər verib ki, İran döyüşlərin dayanmasından sonra ABŞ və İsrailin hücumları nəticəsində zərər görmüş yeraltı raket obyektlərinin mühüm hissəsini yenidən istifadəyə qaytara bilib.

Məlumata görə, ABŞ və İsrail hücumlar zamanı giriş yollarını dağıtmaq və tunellərin girişlərini bağlamaqla İranın yeraltı raket bazalarına çıxışını məhdudlaşdırmağa çalışmışdı.

CNN bildirib ki, İran hədəfə alınmış 18 yeraltı raket obyektindəki 69 tunel girişindən indiyədək 50-ni yenidən açıb. Bu obyektlər arasında İsfahan və Xomeyn ətrafındakı bazalar da var.

Hesabatda qeyd olunur ki, İran girişlərin açılması ilə yanaşı, zədələnmiş infrastrukturun bir hissəsini də bərpa edib. Raket buraxılış qurğularının hərəkətinin qarşısını almaq məqsədilə bombalanmış yollar təmir olunub. Peyk görüntüləri göstərir ki, bombardman nəticəsində yaranmış çuxurların böyük hissəsi doldurulub və bəzi bazalarda yollar yenidən asfaltlanıb.

CNN-in yazdığına görə, İran hava hücumlarından qorunmaq üçün raket bazalarının geniş şəbəkəsini yerin dərin qatlarında, bəzi hallarda isə dağların altında inşa edib. Məhz buna görə ABŞ və İsrail bu obyektlərin girişlərini hədəf alaraq İranın raket imkanlarını məhdudlaşdırmağa çalışıb.

CNN sonda vurğulayıb ki, bu obyektlərin yenidən fəaliyyətə başlaması yeni hərbi qarşıdurma baş verəcəyi təqdirdə İranın ballistik raket buraxmaq imkanlarını müharibənin son mərhələsi ilə müqayisədə artırmağa kömək edə bilər.

GünAz TV
R.G

GUNAZ.TV

SON XƏBƏRLƏR