Guardian: Hörmüz boğazının mərkəzi hissəsi hələ də 80 dəniz minası ilə bağlıdır

SON XƏBƏRLƏR

Guardian: Hörmüz boğazının mərkəzi hissəsi hələ də 80 dəniz minası ilə bağlıdır

2026.06.20, 22:35

Gunaz.tv

Dəniz minaları Hörmüz boğazında tam hərəkəti hələ də mümkünsüz edir.

Gunaz TV-nin məlumatına görə, Böyük Britaniyanın “The Guardian” qəzeti cümə günü Beynəlxalq Tanker Sahibləri Assosiasiyası – “İntertanko”nun rəhbərlərindən birinə istinadən yazıb ki, Hörmüz boğazının mərkəzi hissəsi hələ də 80 dəniz minası ilə bağlıdır və gəmilər bu su yolunda şimal və cənub marşrutlarından istifadə etməyə məcburdurlar.

Məlumata əsasən, dünyanın ən mühüm enerji nəqli marşrutlarından biri hesab olunan Hörmüz boğazı ABŞ və İsrail ilə İran arasında müharibə başladıqdan qısa müddət sonra SEPAH tərəfindən bağlanmışdı. Bundan sonra ABŞ da buna cavab olaraq İran limanlarına qarşı dəniz blokadası tətbiq etmişdi.

İran və ABŞ arasında anlaşma memorandumunun imzalanmasından sonra ABŞ ordusu İran limanlarına tətbiq edilən dəniz blokadasına son verdiyini açıqlayıb. Lakin Hörmüz boğazında hərəkətlə bağlı problemlər hələ də davam edir.

İranın Ali Milli Təhlükəsizlik Şurası cümə axşamı yaydığı bəyanatda Hörmüz boğazının sularında dəniz minalarının mövcudluğunu təsdiqləyib və bildirib ki, “xüsusi şərait və bəzi təhlükəsizlik riskləri” nəzərə alınaraq gəmilər İranın müəyyən etdiyi marşrut və vaxt cədvəlinə uyğun hərəkət etməlidirlər ki, “gediş-gəliş imkanları tədricən artırılsın”.

Bəyanatda həmçinin qeyd olunub ki, digər məsələlər, o cümlədən “minaların təmizlənməsi” ilə bağlı tədbirlər İran-ABŞ anlaşmasının beşinci bəndi əsasında həyata keçiriləcək.

Guardian qəzeti “İntertanko” rəhbərlərindən Fil Belçerə istinadən yazıb ki, iki ölkə arasında atəşkəs davam etsə belə, dəniz minaları və digər maneələr səbəbindən Hörmüz boğazının müharibədən əvvəlki vəziyyətə qayıtması müəyyən vaxt tələb edəcək.

Anlaşma memorandumunun imzalanmasından və ABŞ-ın dəniz blokadasını dayandırmasından əvvəl müxtəlif məlumatlara görə, Hörmüz boğazının hər iki tərəfində təxminən 2 min ilə 3 min 200 arasında gəmi və 20 minə yaxın heyət üzvü ilişib qalmışdı.

Anlaşmadan sonra bəzi gəmilər İran sahillərinə yaxın marşrutlardan ödəniş qarşılığında keçib, digərləri isə ABŞ ordusunun dəstəyi ilə Oman sahilləri yaxınlığındakı “cənub magistralı” adlandırılan marşrut vasitəsilə Hörmüz boğazını keçə biliblər.

GünAzTV
R.G

GUNAZ.TV

SON XƏBƏRLƏR