İranda benzinin bahalaşdırılması müzakirə olunur, parlament nümayəndəsi xəbərdarlıq edib

SON XƏBƏRLƏR

İranda benzinin bahalaşdırılması müzakirə olunur, parlament nümayəndəsi xəbərdarlıq edib

2026.07.21, 12:34

İran parlamentinin Enerji Komitəsinin sözçüsü Rza Sepəhvənd bildirib ki, ölkədə benzin qiymətlərinin artırılması məsələsi müzakirə olunsa da, bununla bağlı hələlik parlamentə rəsmi təklif təqdim edilməyib.

Gunaz.tv

Sepəhvənd bu barədə ILNA agentliyinə danışıb, məsələ hökumət və Planlaşdırma və Büdcə Təşkilatı daxilində müzakirə edilir. Lakin onun sözlərinə görə, İranın müharibə və yüksək inflyasiya şəraitində olduğu bir vaxtda yanacaq qiymətlərinin artırılması "heç bir halda məqsədəuyğun deyil."

Onun sözlərinə görə, hökumətin enerji daşıyıcılarının qiymətlərini dəyişmək üçün hüquqi səlahiyyəti var və bu həftə Neft Nazirliyi ilə İran Milli Neft Məhsullarının Paylanması Şirkətinin rəsmilərinin məsələni parlament üzvləri ilə müzakirə etməsi gözlənilir.

"Benzin qiymətlərinin artırılması yeni bahalaşma dalğasını sürətləndirə və insanların dolanışığına əlavə təzyiq göstərə bilər," – deyə Sepəhvənd bildirib.

O, hökuməti müharibə və yüksək inflyasiyanın iqtisadi təsirləri altında yaşayan əhalinin vəziyyətini nəzərə alaraq benzin qiymətlərini dəyişməməyə çağırıb.

2019-cu ilin etirazlarının kölgəsi

Benzin qiymətləri İran hakimiyyəti üçün ən həssas iqtisadi məsələlərdən biri hesab olunur. Rəsmilər yaxşı bilirlər ki, yanacağın bahalaşması nəqliyyat, ərzaq və digər məhsul və xidmətlərin qiymətlərini sürətlə artırır, əhalinin real gəlirlərinin azalması isə insanların yeni iqtisadi yükü daşımasını çətinləşdirir.

Bu ehtiyatlı yanaşmanın əsas səbəbi 2019-cu ilin noyabr etirazlarıdır. Həmin vaxt hökumət subsidiyalı benzinin qiymətini bir gecədə 50 faiz artırmış, aylıq kvotadan artıq satılan benzinin qiymətini isə üç dəfə bahalaşdırmışdı. Qərardan bir neçə saat sonra İranın müxtəlif şəhərlərində geniş etirazlar başlamış, sonradan aksiyalar siyasi şüarlarla müşayiət olunmuşdu.

Hakimiyyət etirazlara cavab olaraq ölkəni təxminən bir həftə qlobal internetdən ayırmış və təhlükəsizlik qüvvələrindən istifadə etmişdi. Amnesty International təşkilatının məlumatına görə, həmin hadisələr zamanı 321 nəfər öldürülüb. Reuters agentliyi isə İran Daxili İşlər Nazirliyindəki mənbələrə istinadən ölənlərin sayının təxminən 1 500 nəfər olduğunu yazmışdı.

- Cəfər Cəfərli

GUNAZ.TV

SON XƏBƏRLƏR