Sergey Lavrovun ikibaşlı bəyanatı "Əslində o, Azərbaycan və Moldovaya dolayı xəbərdarlıq edir və onlara heç vaxt gücdən istifadə etməməyi "məsləhət görür" Rusiyanın xarici işlər naziri Sergey Lavrov ikibaşlı fikirlər söyləyib. O vəd verib ki, Dağlıq Qarabağ və Dnestryanı münaqişələr Cənubi Osetiya və Abxaziya ssenariləyrilə inkişaf etməyəcək, çünki həmin münaqişələrin həlli üçün danışıq aparan şəxslər Mixail Saakaşvili deyil: "Moldova və Azərbaycanda Mixail Saakaşvili kimi ağlını itirmiş, güc yolu ilə münaqiş həll edən liderlər yoxdur". Əslində bu bəyanat həm də o anlamı verir ki, əgər Dağlıq Qarabağ və Dnestryanı münaqişələrin güc yoluyla həllinə çalışılarsa, Cənubi Osetiya və Abxaziya ssenariləri təkrarlanacaq. Sergey Lavrovun açıqlamasıyla bağlı fikirlərini öyrəndiyimiz politoloq Qabil Hüseynli deyir ki, bu, çox məntiqsiz bir bəyanatdır. Rəvan Məmmədli Dünyada hadisələrin inkişafının, həllinin obyektiv qanunauyğunluqları, beynəlxalq hüquq normaları, indiyə qədər formalaşmış ictima praktika var. Bütün bunların hamısı obyektiv xarakter daşıyan amillərdir. Onun sözlərinə görə, subyektiv xarakterli, yəni ayrı-ayrı şəxslərdən, fərdlərdən asılı olan amillər də var. Lakin obyektiv amillər həmişə aparıcıdır, hadisələrin əsas meyllərini müəyyən edən tərəfdir: "Ona görə də "Mixail Saakaşvili var olduğu üçün Gürcüstanı parçaladıq" deyəndə bu heç də Rusiyanın imperialist siyasətinə haqq qazandıra bilmir. Yaxud "filan hadisələr filan hadisələrdən fərqli ssenariylə inkişaf edəcək, çünki onların arxasında filankəslər durur" söyləmək də məntiqdən kənardır. Çünki hadisələrin hamısına mahiyyətinə, səbəb-nəticə əlaqələrinə görə yanaşılır və həll edidir". Politoloq bildirdi ki, Sergey Lavrovun söylədikləri sırf subyektivizimdir və Rusiya elitasının şəxsi görüşlərini əhatə edir. Bu o demək deyil ki, həmin baxışlar sabah hansısa formada başqa bir mahiyyətdə təkrarlanmayacaq: "Serjey Lavrovun söylədikləri sadəcə, bu gün üçün siyasi manevrdir". Qabil Hüseynli də hesab edir ki, Rusiyanın xarici işlər naziri Azərbaycan və Moldovaya dolayı xəbərdarlıq edir və onlara heç vaxt gücdən istifadə etməməyi "məsləhət görür". Politoloq onu da vurğuladı ki, Sergey Lavrov Dağlıq Qarabağ və Dnestryanıda hadisələrin danışıqlar ssenarisiylə cərəyan edəcəyini söyləsə də, nəticədən danışmır: "Bizə nəticə lazımdır. Rusiyanın xarici işlər naziri birbaşa desəydi ki, bu ölkələrin ərazi bütövlüyü dəyişməyəcək, Dağlıq Qarabağ Azərbaycanın, Dnestryanı Moldovanın ayrılmaz hissəsi kimi onun tərkibində qalacaq, o halda daha aydın və birmənalı danışmış olardı. Amma indiki halda onun söylədikləri sadəcə, başaldadıcı və hazırkı dövrdə Rusiyanın nəfəs alması, soluğunu dərməsi üçün bir diplomatik gedişdir. Sergey Lavrov uğursuz diplomatik gediş edib, ona görə də inandıra bilmir". Yeri gəlmişkən, Gürcüstanda baş verənlərdən sonra ermənilərin də dili açılıb. Xatırldaq ki, Rusiya son olaylardan əvvəl Tiflisin Cənubi Osetiya və Abxaziya ilə güc tətbiq etməmək barədə saziş imzalamasını təkidlə tələb edirdi. Azərbaycan və Ermənistan prezidentlərinin Sankt-Peterburq görüşündə də tərəflərə Dağlıq Qarabağ münaqişəsinin güc yolüdla həllinə çalışılmayacağını əks etdirən bir sənədin imzalanması təklif olunurdu. İndi isə ermənilər bu məsələni yenidən gündəmə gətirirlər. Erməni politoloqu Levon Məlik-Şahnazaryan bildirib ki, İrəvan Azərbaycanla Dağlıq Qarabağ erməniləri arasında güc tətbiqinin yolverilməzliyi barədə sənəd imzalanana qədər münaqişənin tənzimlənməsiylə bağlı danışıqlar prosesini dondurmalıdır. Azərbaycanda bu bu məsələyə yanaşma birmənalıdır. Politoloq Qabil Hüseynli bunu ermənilərin baş tutması mümkünsüz xülyası sayır. Politoloq Vüqar Seyidov isə bildirir ki, Dağlıq Qarabağ erməniləri beynəlxalq hüququn subyektləri deyillər, dünyada özlərini müstəqil elan edən minlərlə qrup var: "Güc tətbiq etməmək barədə sazişi Azərbaycan işğal olunmuş rayonlar, o cümlədən Qarabağdan Ermənistan qoşunları çıxarıldıqdan, vilayətdəki qanunsuz hərbi birləşmələr buraxıldıqdan, azərbaycanlı qaçqınlar geri qayıtdıqdan sonra BMT üzvü olan Ermənistanla imzalaya bilər. Əgər Bakı və İrəvan indiki situasiyada güc tətbiqinin yolverilməzliyilə bağlı saziş imzalardarsa, bu, konfliktin bundan sonra da dondurulması demək olacaq. Bu, Ermənistanın arzusudur, Azərbaycan isə konfliktin dondurulmasında yox, tezliklə həllində maraqlıdır". xalqcebhesi