OBAMANIN PREZİDENTLİYƏ NAMİZƏDLİYİ RƏSMƏN TƏSDİQLƏNDİ Demokratlar Amerikanı dərin quyudan çıxarmağa söz verir ABŞ Demokratlar Partiyasının qurultayı prezidentliyə və vitse-prezidentliyə namizədləri rəsmən təsdiqləyib. Denver şəhərində keçirilən qurultayda nümayəndələr Barak Obamanın prezidentliyə namizəd olmasını yekdilliklə dəstəkləyiblər. Qurultaya rəhbərlik edən Nümayəndələr Palatasının spikeri Nensi Pelosi telefonla onunla əlaqə yaradaraq namizəd olmağa razılığını rəsmən alıb. Obamanın sözləri zalda alqışlarla qarşılanıb. Gözlənilir ki, Obama seçicilərə müraciət edəcək və şəhər stadionunda keçiriləcək mitinqdə seçkiqabağı platformasını açıqlayacaq. Onun çıxışının bir sıra telekanallarla canlı yayımlanacaq. Obamanın seçki qərargahının baş strateqi Devid Akselrod deyib ki, prezidentliyə namizədin müraciətində amerikalıların respublikaçı Con Makkeynə səs verəcəkləri təqdirdə ciddi risklə üzləşəcəkləri barədə aydın xəbərdarlıq da olacaq. Onun sözlərinə görə, Obama öz rəqibinə qarşı kəskin tənqidlə çıxış etməkdən və ona hücum etməkdən utanmayacaq. Demokratların dörd gündür davam edən qurultayı həmin mitinqlə başa çatacaq, daha sonra Obama və onun vitse-prezidentliyə namizədi - senator Cozef Bayden avtobusla Pensilvaniya, Ohayo və Miçiqan ştatlarına seçki turlarına çıxacaqlar. Qeyd edək ki, demokratların qurultayı həm də Baydeni vitse-prezidentliyə namizəd kimi təsdiqləyib. Bayden çıxışında deyib ki, prezident Buş başda olmaqla respublikaçılar administrasiyası ABŞ-ı dərin quyuya salıb. Onun sözlərinə görə, ancaq seçicilərin Obamaya etimad göstərməsi halında ölkəni bu dərin quyudan çıxarmaq olar, Makkeynin prezident seçilməsi isə Amerikanın daha dərin quyuya düşməsi demək olardı. “Yalnız Obamanı prezident seçməklə Amerika dünyanın qalan hissəsinin etimadını qaytara və onu yenidən öz ardınca apara bilər”- deyə Bayden bildirib. Vitse-prezidentliyə namizədin sözlərinə görə, Amerikaya böyük dəyişikliklər lazımdır, belə dəyişikliyi isə ancaq Obama həyata keçirə bilər. Bayden qeyd edib ki, respublikaçıların hakimiyyətinin səhvləri sayəsində indi Rusiya azad və demokratik ölkəyə - Gürcüstana qarşı bu cür təhlükə yarada bilir. O, vəd edib ki, demokratlar hakimiyyətə gəlsə, ABŞ Rusiyanı öz hərəkətlərinə görə cavab verməyə məcbur edəcək və Gürcüstan xalqına yardım edəcək. Qeyd edək ki, demokratların qurultayında əsas vəzifə partiya sıralarında parçalanmaları önləmək və elektoratı Obamanın ətrafında birləşdirmək idi. Çünki Respublikaçılar Partiyasından fərqli olaraq demokratlarda seçkiqabağı mübarizə çox sərt gedib, keçmiş birinci ledi Hillari Klinton prezidentliyə vahid namizəd olmaq uğrunda Obama ilə son anadək mübarizə aparıb. Bu isə partiyada parçalanma meylləri yaradıb. İndi belə narahatlıq var ki, Obamadan narazı olan demokrat seçicilər səslərini Makkeynə verə bilərlər. Belə parçalanmanı önləmək üçün demokratların bütün “ağır topları”, o cümlədən keçmiş prezident Bill Klinton qurultayda çıxış edərək hamını Obamanın ətrafında birləşməyə çağırıb. Klintonun çıxışı qətiyyətli olub və heç bir şübhə yeri qalmayıb ki, o, partiya maraqlarını şəxsi və ailə maraqlarından üstün tutur. Amerika seçiciləri isə Obamaya nisbətən Makkeynin daha yaxşı ali baş komandan ola biləcəyinə inanır. Belə fikirdə olanlar 51 faiz təşkil edir, CNN-in apardığı rəy sorğusuna görə, Obamanın yaxşı ali baş komandan ola biləcəyinə cəmi 44 faiz inanır. Lakin amerikalıların əksəriyyəti hesab edir ki, Obama iqtisadi problemləri daha yaxşı həll edə bilər. Siyasət şöbəsi musavat