Rusiya Şanxay qrupundan yarımçıq dəstək aldı Rusiyanın ümidi Tacikistan kimi ölkələrə qalıb Şanxay Əməkdaşlıq Təşkilatı Rusiyanın Qafqazlardakı hərəkətlərinə ehtiyatlı dəstəyini verib. Rusiya, Çin, Qazaxıstan, Qırğızıstan, Özbəkistan və Tacikistanı özündə birləşdirən bu təşkilatın Düşənbədə zirvə toplantısı keçirilib. Görüşdən sonrakı bəyanatda üzv ölkələr Rusiyanın Qafqazdakı "fəal rolunu" salamlayıblar. Düzdür, heç kim Rusiyanın tanıdığı Cənubi Osetiya və Abxaziyanı tanımayıb. Bəyanatda dövlətlərin ərazi bütövlüyü prinsipi təsbit edilir. Şanxay Əməkdaşlıq Təşkilatının Düşənbə sammitinin yekun sənədində Rusiyanın Gürcüstana qarşı hərbi kampaniyasını birmənalı şəkildə dəstəkləyən ifadələr də yoxdur. Burada sadəcə qeyd olunur ki, təşkilat "Rusiyanın Cənubi Osetiyada sülhün bərqərar olunmasında fəal rolunu dəstəkləyir". Bununla belə, Qərb ölkələrinin sərt tənqidləri ilə üzləşmiş Rusiya üçün bu ifadə əksər şərhlərə görə, ilhamverici bir bəyanatdır. Təsadüfi deyil ki, Düşənbə sammitində iştirak edən Rusiya prezidenti Dmitri Medvedev öz ölkəsinin minnətdarlığını bildirib: "Biz Rusiyanın apardığı sülhməramlı fəaliyyətə verilən obyektiv qiymətə görə minnətdarlığımızı bildiririk. Əminik ki, Şanxay Əməkdaşlıq Təşkilatının üzv ölkələrinin mövqeyi layiqli beynəlxalq rezonans alacaq. Mən ümidvaram ki, bu həmçinin qaranı ağ etməyə cəhd edənlər, təcavüzə bəraəit qazandırmaq istəyənlər üçün bir işarə olacaq". Prezidentin bu sözlərinə baxmayaraq Moskvadakı əksər müşahidəçilərə görə hər şey elə də birmənalı deyil. Rusiyaya dəstək kifayət qədər məhdud və çox ehtiyyatlı olub. Heç kim Rusiyanın yolu ilə gedib Gürcüstanın separatçı bölgələrini tanımaq fikrində deyil. Hətta Düşənbə bəyannaməsində xüsusi olaraq dövlətlərin ərazi bütövlüyü prinsipi bir daha təsbit olunur. Ümumən şərhlərə görə, qəbul olunmuş sənəd öz ehtiyatlı ifadələri ilə faktiki Çinin mövqeyinə çox yaxındır. Bir qədər əvvəl Çinin xarici işlər nazirliyinin sözçüsü Tsin Qan öz ölkəsinin mövqeyini belə açıb: "Çin Cənubi Osetiya və Abxaziyadakı son hadisələrlə bağlı öz narahatlığını bildirir. Biz buradakı hazırkı vəziyyət və tarixin mürəkkəb olduğunu başa düşürük. Eyni zamanda Çin oxşar məsələlərdə prinsipial mövqedən çıxış edir - bütün problemlər dialoq və məsləhətləşmələr əsasında həll olunmalıdır". Ekspertlərə görə, Çin təşkilatda getdikçə aparıcı mövqeyə yiyələnir və, məsələn, Moskvalı politoloq Aleksandr Pikayevə görə, Qərblə Rusiyanın son çəkişməsi Çini möhkəmlədir: "Məncə, Çin Rusiyanın Gürcüstan məsələsində öz dişlərini göstərməsindən məmnundur. Beləki, bu Qərbin mövqelərini zəiflədir. Ancaq bu eyni zamanda Rusiyanın da mövqeləni zəiflədə bilər. Müvafiq olaraq bu vəziyyətdə Çinin mövqeləri möhkəmlənir", - deyir Aleksandr Pikayev.bbc