İstratov Azərbaycanı arxayın salmağa çalışır "Rusiyaya inanmaq olmaz, səfirin açıqlaması diplomatik gediş, fənddir" "Siyasətdə vədə inanmaq yersizdir, Vladimir Putin və Dmitri Medvedyev də dəfələrlə bəyanlamışdılar ki, Gürcüstanın ərazi bütövlüyünü tanıyırlar" Rusiyanın Azərbaycandakı səfiri Vasili İstratov Moskvanın ölkəmizin əarzi bütövlüyünü tanıdığını növbəti dəfə bəyanlayıb. Onun sözlərinə görə, Cənubi Osetiya və Abxaziyanın müstəqilliyinin tanınması Azərbaycanın ərazi bütövlüyünə hörmətlə yanaşılmasına heç bir təsir göstərməyəcək. Səfir bildirib ki, Rusiya prezidenti Dmitri Medvedyev və onun azərbaycanlı həmkarı İlham Əliyev arasında iyulda imzalanmış bəyannamə heç bir halda qüvvəsini itirməyəcək. Azərbaycanın Rusiyadakı sabiq səfiri Hikmət Hacızadə isə bu bəyanata inanmağı yersiz sayır. Həm də prezident Dmitri Medvedyev də az əvvəl deyib ki, Gürcüstandakılar ərazilərində münaqişələr olan dövlətlərə dərs olmalıdır. Ramiz Mikayıloğlu "Ruslar istənilən vaxt valı dəyişib, başqa melodiyanı çalacaqlar. Bakı Moskvanın dediklərini etməzsə, ruslar Qarabağın bizdən uzaqlaşdırılmasına yardım göstərəcəklər. Rusiyaya inanmaq olmaz". Vasili İstratovun indiki məqamda niyə belə bəyanatlar səsləndirməsinə gəlincə, Hikmət Hacızadəyə görə, bu, diplomatiyadır və diplomatiyada da mərhələli addımlar atılır: "Əvvəlcə Gürcüstanın başını yedilər. İndi Gürcüstanla qurtardıqdan sonra digərləriylə başlamaq istəyirlər. Hamıyla birdən-birə mübarizə, müharibə aparmaq çətindir. Səfirin açıqlaması diplomatik gediş, fənddir". Hikmət Hacızadə onu da vurğuladı ki, Vasili İstratovun prezidentlər arasında imzalamış bəyannaməni əsas kimi xatırlatması da yersizdir: "İndi sənədə baxan var ki? Min sənəd imzalamaq olar, ancaq Rusiyanın qəbul etdiyi fəlsəfəyə görə, gücü olan istədiyini edə bilər". Politoloq Zərdüşt Əlizadə də siyasətdə vədə inanmağı yersiz sayır. Siyasətdə hər şeyi qüvvələr nisbəti müəyyənləşdirir. SSRİ güclü olanda Qərb dövlətə başçılıq edən Mixail Qarbaçovu dilə tutub ki, Almaniya birləşsin, birləşmiş Almaniya NATO-nun üzvü olmayacaq. Ancaq Almaniya birləşəndən sonra da Alyans üzvü kimi qalıb. Sonra SSRİ-ni dilə tutublar ki, Şərqi Avropa ölkələrini əsarətindən burax, onlar heç vaxt NATO-nun üzvü olmayacaqlar. Lakin bu dövlətlər də artıq həmin qurumun sıralarındadırlar. Sonra Qərb söz verib ki, SSRİ parçalansa, heç bir keçmiş SSRİ ölkəsini NATO-ya qəbul etməyəcəklər. Hazırda Pribaltika ölkələri NATO-nun üzvləridirlər, iki sabiq SSRİ ölkəsi də Alyansa üzvlüyə ciddi namizəddirlər. Ərazi bütövlüyü məsələsinə gəlincə, Rusiyanın hazırkı baş naziri Vladimir Putin prezident olarkən dəfələrlə bəyanlayıb ki, Gürcüstanın ərazi bütövlüyünü tanıyır. Dmitri Medvedyev də prezident kürsüsündə əyləşən zaman anoloji bəyanat verib. Lakin indi onların hər ikisi Cənubi Osetiya və Abxaziyanın müstəqilliyini tanıyır və o ərazilərdə post quraraq qoşunlarını saxlayır, bunun uzunmüddətli olacağını söyləyirlər: "İndi Rusiya deyir ki, Azərbaycanın ərazi bütövlüyünü tanıyır. Moskva belə deyə-deyə Ermənistanı silahlandırır, Qarabağdakı oyuncaq rejimi müdafiə edir, ATƏT-in Minsk qrupunun həmsədri kimi dinc tənzimləmənin qarşısını alır. İndi biz nəyə inanaq? Onların sözlərinə, yoxsa qüvvələr nisbətinə?" Politoloq hesab edir ki, Rusiya Azərbaycanı özünün peyk dövlətlərindən biri kimi görmək istəyir. Moskva istəməz ki, NATO-nun üzvü, həqiqi müstəqil dövlət olaq. Onu da istəməz ki, Qarabağ problemi həllini tapsın və Azərbaycanın Rusiyadan aslılığı azalsın. Bu səbəbdən də Qarabağ münaqişəsinin donmuş vəziyyətdə qalmasında daha çox maraqlıdır. Zərdüşt Əlizadə həm də o qənaətdədir ki, Azərbaycan cəmiyyəti və hakimiyyət Qarabağı qaytarmaq üçün zəruri olan addımların heç birini atmır, bu da narahatlıq doğurmaya bilməz. Yeri gəlmişkən, Moskvadakı Yaxın Şərq İnstitutunun Cənubi Qafqaz və Orta Asiya problemləri üzrə baş eksperti Valentin Mesamed Rusiya üçün ideal Cənubi Qafqaz modelinin nədən ibarət olduğunu açıqlayıb. Bu, sadiq Ermənistan, konfederativ Gürcüstan və federativ Azərbaycandır. Zərdüşt Əlizadəyə görə, prinsip etibarilə belə ehtimal mümkündür: "Ancaq qonşu dövlətin istəkləri bizim üçün əsas olmamalıdır. Sadəcə, Azərbaycan yaxşı idarə edilən və demokratik bir dövlət olmalıdır ki, kənar güclərin bu cür ssenariləri həyata keçirmək imkanları yaranmasın. Yoxsa biz müstəqil oyunçu statusuna yiyələnə bilməyəcəyik". xalqcebhesi