MDQB Gürcüstanın ərazi bütövlüyünü birmənalı şəkildə dəstəkləyir Teyyub Qəni: "MDB-nin növbədənkənar sammitinin çağrılması tələb edilməli, Rusiyadan birmənalı zəmanət alınmalıdır ki, Gürcüstanda baş verənləri Azərbaycanda törətməyəcək" Dünən Milli Demokratik Qüvvələr Birliyi (MDQB) Sədrlər Şurasının toplantısı keçirilib. Bu barədə qəzetimizə məlumat verən Təkamül Partiyasının sədri Teyyub Qənioğlu bildirdi ki, toplantıda qərarların icra vəziyyəti, ölkədə, regionda baş verən hadisələr ətraflı müzakirə olunub, prezident seçkiləri prosesi dəyərləndirilib. Teyyub Qənioğlu xatırlatdı ki, Təkamül Partiyası bu seçkilərdə MDQB-dəki müttəfiqi BAXCP-nin sədri Qüdrət Həsənquliyevin namizədliyini dəstəkləyir. Hazırda imzatoplama kampaniyası yekunlaşmaq üzrədir. Yaxın bir-iki günə bu proses yekunlaşacaq və lazım olduğundan da artıq imza toplanacaq. Gürcüstanda baş verən olaylara da Sədrlər Şurası xüsusi diqqət yetirib. MDQB birmənalı şəkildə Gürcüstanın ərazi bütövlüyünü dəstəkləyir, Rusiyanın hərəkətlərini pisləyir. Onun sözlərinə görə, Moskvanın son addımları heç bir ölçüyə sığmır. Rəvan Rusiya MDB məkanında özünün yaratdığı separatçı oyuncaq rejimlərdən ikisini-Cənubi Osetiya və Abxaziyanı tanıyıb. Gürcüstanın bu ərazilərini faktiki Rusiya işğal edib. Yəni Moskva Cənubi Osetiya və Abxaziyanın həqiqi müstəqilliyini tanımayıb, de-fakto o əraziləri Rusiyaya birləşdirib. Artıq ruslar heç kimlə hesablaşmır. Şimal qonşumuz nə vaxt güclənib, o zaman yaxın qonşularına aqressiv münasibət bəsləyib. Bu, bir daha özünü təsdiqləyib. MDQB-ni ən çox düşündürən məsələlərdən biri regiondakı hadisələrin hansı istiqamətdə cərəyan etməsidir. Sədrlər Şurası dəfələrlə Azərbaycanın MDB-də, Rusiyanın ATƏT-in Minsk qrupunda qalmasının məqsədəuyğunluğu barədə məsələ qaldırıb. Teyyub Qənioğlu vurğuladı ki, bu məsələlərlə bağlı Azərbaycan mövqeyini, münasibətini konkretləşdirməlidir. Çünki MDB üzvlərindən biri-Ermənistan Azərbaycan torpaqlarını işğal edib. İndi isə MDB-nin lider dövləti Rusiya digər üzv dövlət olan Gürcüstanın ərazisini işğal edib. Bunlar heç bir çərçivəyə sığmır: "Nə dərəcədə belə birliyə ehtiyac var? Azərbaycan təcili surətdə MDB-nin növbədənkənar sammitinin çağrılmasını tələb etməlidir. Sammitdə Gürcüstan məsələsiylə bərabər, Azərbaycan Qarabağ məsələsini birmənalı ortaya qoymalıdır. Rusiyadan birmənalı qarantiya almalıdır ki, Gürcüstanda baş verənləri Azərbaycanda törətməyəcək. Əks təqdirdə, Gürcüstanın ardınca MDB-dən çıxmalıyıq. Çünki qurumda qalmaq heç nə vermir. Hesab edirik ki, MDB-də təmsilçiliyimiz ərazi bütövlüyünə yardımçı olacaq, amma əks proseslər başlayıb. Rusiya prezidenti bəyanlayır ki, ölkə sərhədlərinin perimetri boyunca maraqlarını gözləyəcəklər. Bu, nə deməkdir? Hər halda bu maraqlar Azərbaycanın maraqlarıyla üst-üstə düşmür. Ona görə də Azərbaycan təcili surətdə MDB-ylə, Rusiyayla bağlı öz mövqeyini dəqiqləşdirməlidir". Teyyub Qənioğlu dedi ki, MDB-dən çıxmaq barədə düşünmək lazımdır. Artıq balanslaşdırma siyasəti keçmir. Yəqin ki, ABŞ da, Rusiya da birmənalı mövqe tələb edir. Digər tərəfdən, Gürcüstan hava sərhədlərini Rusiyaya bağlayıb, Rusiyadan Ermənistana təyyarələr Azərbaycan üzərindən uçur. Sözsüz ki, Azərbaycanın hava sərhədlərini açması Moskvanın tələbiylə bağlıdır: "Rusiya hər dəfə tələb etdikcə Azərbaycan öz milli maraqlarının ziddinə hərəkət edəcək? Buna son qoymaq lazımdır. Azərbaycan düşünülmüş, qəti addım atmalıdır. Bu da Qərbə inteqrasiyanı sürətləndirmək, münasibətləri gərginləşdirmək şərtiylə Rusiyadan uzaqlaşmaq yolu olmalıdır". Təkamül Partiyasının sədrinin şəxsi qənaətinə görə, baş verənlər sabiq prezident, hazırkı baş nazir Vladimir Putinin oyunudur. Vladimir Putin növbəti 4 ili gözləməmək üçün prezident Dmitri Medvedyevi Gürcüstana hərbi müdaxiləyə, Cənubi Osetiya və Abxaziyanı tanımağa təhrik edib. Beləliklə də, Dmitri Medvedyev Qərbdə nüfuzunu itirir, qarşıdurmadan Rusiya iqtisadiyyatı da zərər görəcək. Belə durumda isə Dmitri Medvedyevin istefa verməsi və Vladimir Putinin yenidən prezident seçilməsi üçün daha münbit zəmin yaranır. xalqcebhesi