Kreml beynəlxalq hüquqa tüpürdü. Medvedyev Cənubi Osetiya və Abxaziyanın "dövlət müstəqillikləri"ni rəsmən tanıdı "2008-ci ilin avqust hadisələrindən sonra Cənubi Osetiya və Abxaziyanın Gürcüstan tərkibində mövcudluğu mümkün deyil. Buna görə də osetin və abxazların bizə müraciətlərini, habelə rusiyalıların mövqelərini nəzərə aldıq. Rusiya başqa dövlətləri də belə addım atmağa çağırır. Bu çətin addım olsa da, insanların həyatını qorumaq üçün yeganə yoldur". Rusiya prezidenti Dmitri Medvedyev dünən bəyan edib ki, Moskva Cənubi Osetiya və Abxaziyanı müstəqil dövlətlər qismində rəsmən tanıyır. Medvedyevin sözlərindən belə çıxıb ki, məhz Gürcüstan Kremlə bu ölkənin ərazi bütövlüyü prinsipindən imtina üçün səbəb verib: "Gürcüstan rəhbərliyi başqa yolu seçdi. Danışıqlar prosesinin pozulması, əldə edilmiş razılaşmaların qulaqardına vurulması, siyasi və silahlı təxribatlar, sülhməramlılara hücumlar - bütün bunlar BMT və ATƏT-in köməyi ilə münaqişə zonalarında bərqərar edilmiş rejimi kobud şəkildə pozurdu. İndi aydındır ki, münaqişənin dinc yolla həlli Tiflisin planlarında olmayıb. Gürcüstan rəhbərliyi aramla savaşa hazırlaşıb. Xaricdəki hamilərin siyasi və maddi dəstəyi isə Gürcüstan rəhbərliyində cəzasızlıq sindromu yaratmışdı". Rusiya Təhlükəsizlik Şurasının iclasından sonra Medvedyev separatçı qurumların tanınması haqqında müvafiq fərman imzalayıb. Daha sonra o, RF XİN-ə Abxaziya və Cənubi Osetiya ilə diplomatik əlaqələr qurmağı tapşırıb. Nazirliyin Sxinvali və Suxumidəki separatçı rejimlərlə ən yaxın vaxtlarda "Dostluq, əməkdaşlıq və qarşılıqlı yardım haqqında" müqavilə imzalayacağı gözlənilir. Bundan başqa, Rusiyanın Cənubi Osetiya və Abxaziyaya yeritdiyi qoşun birləşmələrinin orada "yerli rəhbərliyin xahişi" ilə qalacağı da bildirilir. Gürcüstan Medvedyevin bəyanatına ani reaksiya verib. Rusiya prezidentinin müraciətindən cəmi 15 dəqiqə sonra Gürcüstanın XİN başçısının birinci müavini Giqa Bokeriya bu açıqlamanı gürcü torpaqlarının ilhaqı adlandırıb: "Rusiya bütün dünyanın gözü qarşısında Gürcüstan ərazilərinin bir hissəsinin işğalını qanuniləşdirməyə çalışır". Gürcüstan parlamentinin beynəlxalq əlaqələr komitəsinin sədri Laşa Jvaniya isə hesab eldir ki, Tiflis Moskva ilə bütün diplomatik əlaqələri kəsə bilər. Cənubi Osetiya və Abxaziyada isə separatçı rejimlər bayram edirlər: dünən axşam saatlarında Sxinvali və Suxumidə küçələrə tökülən osetinlərlə abxazlar bir-birlərini "dövlət müstəqilliyi" münasibətilə təbrik edərək içir, əylənirdilər. Almaniya, Böyük Britaniya, ABŞ, İsveç, Fransa və Almaniya isə Moskvanın qərarını qətiyyətlə pisləyiblər. Rəsmi London iki separatçı rejimin "rəsmən tanınması"nı çox təhlükəli qərar adlandırıb. Britaniyanın XİN başçısı Devid Milibend bildirib ki, onun ölkəsi Gürcüstanın ərazi bütövlüyünü daim dəstəkləyib və bundan sonra da dəstəkləyəcək. ABŞ-ın dövlət katibi Kondoliza Rays Rusiya prezidenti Medvedyevin bəyanat və fərmanını "təəssüfə layiq", İsveçin xarici işlər naziri Karl Bildt "beynəlxalq hüququn bilərəkdən, çox kobud şəkildə pozulması" kimi dəyərləndirib. Almaniyanın kansleri Angela Merkel isə hesab edir ki, Rusiyanın davranışı yolverilməzdir. Rəsmi Kiyev də Rusiyanın qərarını pisləyib. Fəqət Moskva dünyanı vecinə belə, almaq niyyətində deyil. NATO ilə əməkdaşlağını dayandıra biləcəyini bəyan edən Rusiyanı düşünülməmiş addımlardan çəkindirməyə çalışan Qərb "əməkdaşlıq hər iki tərəfin maraqlarına cavab verir və davam etdirilməlidir" deyərək Moskvanı radikallıqdan əl çəkməyə çağırsa da, Kreml yürütdüyü kursundan dönməyəcəyini göstərib. Rusiyanın NATO-dakı səfiri Dmitriy Roqozin bildirib ki, onun ölkəsi "Sülh Naminə Tərəfdaşlıq" proqramı çərçivəsində Şimali Atlantika Alyansı ilə əməkdaşlığını dayandırır:"Moskva NATO qüvvələri ilə birgə təlimlərdən imtina edir və NATO gəmilərinin Rusiya limanlarına səfərlərini dayandırır. NATO rəhbərliyinin Rusiyaya səfərləri və rusiyalı zabitlərin NATO-dakı təlim kurslarındakı iştirakına da son qoyula bilər. Bundan başqa, Rusiya NATO-nun Aralıq Dənizində keçirdiyi "Fəal Səylər" birgə əməliyyatında iştirakından imtina etməyi də düşünür". Moskvanın hələlik Əfqanıstanla bağlı NATO ilə əməkdaşlığını dayandırmadığını söyləyən Roqozin Qərbi "yanlış düşüncə və mövqelərdən əl çəkməyə" çağırıb. Dediyinə görə, indiki situsiya Birinci Dünya Müharibəsi ərəfəsindəki vəziyyəti xatırladır: "O vaxt Qavrila Prinsip iki dünya sistemini toqquşdurdu. İndi də dəlisov və absurd Saakaşvili sistemləri toqquşdurmağa çalışır. NATO bizi Gürcüstanda sərt davranmaqda suçlayır. Kimin inəyi böyürsə də, NATO-nun inəyi susmalıdır. Biz deyəndə ki, sabiq terrorçu və bandit Həşim Taçinin rəhbərlik etdiyi Kosovaya yardım edilməməlidir, Kosovo Serbiyanın ayrılmaz hissəsidir - NATO qulaq asmadı. Bəs indi nə olub?! Saakaşvili rusiyalı sülhməramlıları güllələmək, yatan Sxinvalini gecəyarısı atəşə tutmaq əmri verəndə bəlkə NATO standartlarına əməl edirdi? Belə adamın başçılıq etdiyi dövləti NATO-ya qəbul etmək istəyirlərsə, biz həmin təşkilatla əlaqələri kəsməyimizə təəssüflənə bilmərik. Biz həmvətənlərimizi, Rusiya vətəndaşlarını qorumuşuq. NATO isə Yuqoslaviyanın alt-üst edib və orada NATO ölkələrinin vətəndaşları da yoxdu. Budurmu Qərbin demokratiya və beynəlxalq hüquq standartları?". NATO isə Gürcüstana yardımları daha da artırıb. Hərbi Alyansın mütəxəssisləri hazırda Gürcüstandakı aerodromları və səmaya nəzarət elementlərini bərpa edirlər. Bolnisi, Vaziani, Kopitnari və Marneulidəki aerodromlarda təmir işləri gedir. Eyni zamanda, NATO Qara dənizdəki hərbi-dəniz qruplaşmasını gücləndirərək Gürcüstanın ərazi suları və sahillərində Rusiyanın ağalığına son qoymaq niyyətindədir. Hazırda Qara dənizdə Türkiyənin 4, ABŞ-ın 3, Almaniya, Polşa və İspaniyanın hər birinin bir hərbi gəmisi Gürcüstanın ərazi sularına yaxınlaşmaqdadır. NATO bu bölgəyə daha 8 hərbi gəmi yollamağı düşünür. ABŞ prezidentliyinə namizəd, respublikaçı senator Con Makkeynin xanımı Sindi isə dünən Beynəlxalq Humanitar Ərzaq Proqramının nümayəndə heyəti ilə birlikdə Tiflisə yollanıb. "Bu səfərim Gürcüstan xalqına və rəhbərliyinə dəstək məqsədi daşıyır", - Sindi Makkeyn söyləyib. express