QARA DƏNİZDƏN QAN QOXUSU GƏLİR Birləşmiş Ştatların daha bir hərbi gəmisi Gürcüstan sahillərinə yaxınlaşır, Rusiya isə hərbi gəmisini ora göndərir Rusiya ilə ABŞ arasında Qara dəniz sularında “dəniz döyüşü” təhlükəsi yaranıb. Belə ki, ABŞ Hərbi Dəniz Qüvvələrinin daha iki gəmisi Qara dəniz sahillərinə yan alır, Rusiya isə cəmi bir neçə həftə əvvəl Gürcüstandan çəkdiyi “Moskva” raket kreyserini yenidən geri qaytarır. Xəbər verildiyi kimi, Rusiya qüvvələri Gürcüstanın Qara dəniz sahillərindəki əsas limanı Potiyə nəzarət edir. Ruslar strateji əhəmiyyətli bu limanı tərk etmək niyyətində olmadıqlarını açıq bildiriblər. Silahlı qüvvələrin baş qərargah rəisinin müavini general Aleksandr Noqovitsın bəyan edib ki, onlar limana Amerika gəmilərinin yan almasına imkan vermək niyyətində deyillər. Çünki bu gəmilərin humanitar yardım adı altında Gürcüstana hərbi yardım gətirməsi haqda şübhələr var. Xatırladaq ki, ABŞ-ın Gürcüstana humanitar yardım gətirən “McFaul” gəmisi avqustun 24-də Batumi limanına yan alıb. Gəminin Potiyə yan alması gözlənilirdi, lakin liman rusların nəzarətində olduğuna və minalandığına görə ora yan almaq təhlükəli hesab edilib. “McFaul” müxtəlif tipli silahlarla, o cümlədən nüvə başlığı daşıya bilən “Tomoqavk” qanadlı raketləri ilə təchiz olunub. Gəmi nüvə silahı daşıya bilir, ancaq bu cür silahın Amerika hərbi gəmilərində olub-olmadığı məxfi saxlanılır və hərbi sirdir. “McFaul”un ardınca Amerika hərbi donanmasının “Dallas” keşikçi kateri Bosfor boğazını keçərək Qara dənizə daxil olub. Onun vəzifəsi Gürcüstana yardım gətirən Amerika hərbi gəmilərinin mühafizəni təmin etməkdir. “Dallas”ın ardınca Amerika donanmasının “Erli Berk” adlı gəmisi Qara dəniz sularına daxil olub və Gürcüstan sahillərinə yaxınlaşır. Bu gəmi də nüvə silahı daşıya bilir, müxtəlif silahlarla, o cümlədən “Tomoqavk” raketləri ilə təchiz olunub. Amerikanın Tiflisdəki səfirliyinin sözçüsü deyib ki, Amerika gəmisinin göyərtəsindəki gürcü hökumətinin xahişi ilə humanitar yardım göndərilib. Amerika nümayəndəsinin dediyinə görə, Potiyə doğru irəliləyən gəmini, ola bilsin ki, Amerikanın “USS McFaul” adlı hərbi gəmisi müşaiyət etsin. “USS McFaul” ötən bazar günü Batumiyə gəlib. Bildirilir ki, “Erli Berk” daha kiçik gəmiləri qəbul etmək üçün nəzərdə tutulan Batumiyə yan ala bilməz, ona görə də gəmi Potiyə üz tutub. Rusiya isə Gürcüstan sahillərinə doğru Qara dəniz donanmasının ən iri gəmilərindən olan “Moskva” raket kreyserini göndərir. Yenidən Gürcüstan sahillərinə göndərilən “Moskva” kreyserinin qarşısında hansı vəzifələrin qoyulduğu açıqlanmır. Lakin şübhə yoxdur ki, Rusiya bu gəmiləri Amerika gəmilərinin Gürcüstana yan almasına və NATO-nun Qara dənizdə təlim keçirməsinə cavab olaraq göndərir. Beləliklə, istisna deyil ki, Gürcüstan sahillərində Amerika və Rusiya hərbi gəmiləri arasında qarşıdurma yaranacaq. Əgər belə qarşıdurma yaransa, Rusiya gəmisinin heç bir şansı yoxdur, çünki Amerika gəmiləri daha müasir silahlarla təchiz olunub və “Moskva” kreyserini asanlıqla batıra bilər. Amerikadan gəmilərdən əlavə Gürcüstana respublikaçı prezidentliyə namizəd Con Makkeynin xanımı da gəlib. Bildirilir ki, Sindi Makkeyn humanitar missiya ilə Tiflisdədir və mətbuatla ünsiyyətdən qaçır. Sindi Makkeyn Rusiyanın təcavüzünün nəticələri ilə tanış olacaq və zərər çəkmiş əhaliyə yardım göstərəcək. Bu arada ABŞ-ın Respublikaçılar Partiyasının keçmiş tanınmış siyasi xadimi Patrik Bukenen deyib ki, ABŞ-ın Gürcüstanı Rusiyanın caynağından xilas etmək üçün heç bir şansı yoxdur. Onun fikrincə, Gürcüstanın NATO-ya üzv olmaması ABŞ-ı Rusiya ilə birbaşa qarşıdurmadan xilas edib. “Əgər Gürcüstan NATO-ya üzv olsaydı, indi ABŞ Qafqazda Rusiya ilə müharibəyə girməli olardı. Hansı ki, bu müharibədə ABŞ-ın heç bir şansı yoxdur, bu bölgədə Rusiyanın üstünlüyü şübhəsizdir. ABŞ Əfqanıstan və İraqda müharibəyə cəlb olunduğu bir vaxtda Qafqaza qoşun göndərmək imkanında deyil, ona görə də Amerika xalqı Gürcüstanın NATO-ya üzvlüyünə mane olan Avropaya minnətdar olmalıdır.” Byukenen hesab edir ki, Gürcüstan prezidenti Mixail Saakaşvilinin sayılı günləri qalıb, Rusiya tezliklə onu devirəcək. Gürcüstanda özünə sadiq hakimiyyət yaradacaq. Siyasət şöbəsi musavat