OLİMPİADA BAŞA ÇATDI Azərbaycan dünyanın ən nüfuzlu idman yarışını 39-cu yerdə başa vurub Çinin paytaxtı Pekində təşkil olunan XXIX Yay Olimpiya Oyunları dünən başa çatdı. Dünyanın ən nüfuzlu idman yarışında son olaraq gimnastlarımız mübarizəyə qoşulublar. Təsnifat yarışlarını uğurla başa vuran Aliyə Qarayeva final mərhələsində çıxış etmək hüququ əldə edib. Gimnastımızın yerli və azərbaycanlı azarkeşlərin dəstəyi ilə müşayiət olunan dörd çıxışı kompozisiyaların mürəkkəbliyi ilə seçilib. Amma təmsilçimiz hərəkətləri tam dəqiq yerinə yetirə bilməyib. Nəticədə idmançımız 69,675 bal toplayaraq altıncı yerlə kifayətlənməli olub. Ölkəmizi olimpiadada ilk dəfə təmsil edən bədii gimnastika üzrə Azərbaycanın qrup komandası da final mərhələsinə adlaya bilib. Finalda Azərbaycan yığması iki çıxışın nəticəsinə görə ümumilikdə yeddinci yeri tutub. Komanda hesabında olimpiadanın qalibi adını Çin idmançıları qazanıb. ABŞ 2-ci, Rusiya isə 3-cü yerdə qərarlaşıb. Azərbaycan 1 qızıl, 2 gümüş, 4 bürünc medalla 205 ölkə arasında 39-cu yeri tutub. İranın yegənə qızılını güneyli soydaşımız qazanıb XXIX Pekin Yay Olimpiya Oyunlarında İran yığmasına yeganə qızıl medalı qazandıran taekvandoçu Hadi onu farslaşdırmağa çalışan İran mətbuatına tutarlı cavab verib: “Ümid edirəm ki, Azərbaycan milləti, bostanavalılar və doğulduğum Qara Koyül əhalisi mənim bu hədiyyəmi qəbul edərlər.” Qeyd edək ki, İran televiziyaları onu azərbaycanlı və türk deyil, Reydə doğulmuş bir fars kimi tanıtmağa çalışıblar. İdmançı bu jesti ilə onların iddialarını boşa çıxardıb. Onu da yada salaq ki, Hadi Sai təmsilçimiz Rəşad Əhmədovla eyni çəki dərəcəsində (80 kq) yarışıb. O, R.Əhmədovu yarımfinalda məğlub edib. Güney Azərbaycan sitələri Hadi Sainin qızıl medal almasını belə şərh edirlər: “Bununla da Pekin-2008 olimpiya yarışlarında azərbaycanlıların qazandıqları toplam medal sayı 8-ə çatdı”. Daha bir ukraynalı idmançıda dopinq aşkarlanıb 2004-cü ilin olimpiya oyunlarının gümüş mükafatçısı, Ukrayna ağır atleti İqor Razoryonov dopinqdən istifadə etdiyinə görə Pekin Olimpiadasının iştirakçıları siyahısından çıxarılıb. Beynəlxalq Olimpiya Komitəsinin məlumatına görə, dopinq-testdə ukraynalıda qadağan olunmuş maddə tapılıb. Pekin olimpiadasında 38 yaşlı Razoryonov 105 kiloqram çəki dərəcəsində çıxış edərək, altıncı yeri tutmuşdu. Yada salaq ki, bundan əvvəl ukraynalı atlet Lyudmila Blonskanın orqanizmində dopinq tapılmış və o, gümüş medaldan məhrum olunub. Hazırda Olimpiadada daha dörd idmançı - Mariya İzabel Moreno (İspaniya, velosiped idmanı), Kim Yonq Su (Şimali Koreya, atıcılıq), Do Ti Nqan Tyonq (Vyetnam, gimnastika), Fani Xalkya (Yunanıstan, yüngül atletika) dopinqdən istifadə etməkdə təqsirləndirilir. Vüsal MEHDİOĞLU musavat