Rusiyanın separatçı Cənubi Osetiya və Abxaziyanın müstəqilliyini tanımasına Azərbaycan politoloqlarının münasibəti - RƏY Bakı. Elnur Məmmədli – APA. “Rusiya səhv addımlar atmaqda davam edir. Rəsmi Moskva Gürcüstanın BMT tərəfindən tanınmış ərazisində mövcud olan qondarma qurumların müstəqilliyini tanıyacaqsa, tam izolyasiyaya düşəcək”. Bu sözləri APA-ya açıqlamasında politoloq Vəfa Quluzadə separatçı Cənubi Osetiya və Abxaziya rejimlərinin müstəqilliyinin Rusiya Federasiya Şurası tərəfindən tanınmasına münasibət bildirərkən deyib. V. Quluzadənin sözlərinə görə, ABŞ-dakı seçkilərdə Con Makkeynin mövqeləri daha da güclənir, o isə Rusiya ilə daha sərt davranmağın tərəfdarıdır. Digər tərəfdən, artıq ABŞ-ın hərbi donanması Qara dənizdədir: “Bu donanma Gürcüstan və Ukraynaya himayədarlıq edəcək və bir daha Qara dənizdən çıxarılmayacaq. Ruslar bunu bilməlidirlər. Sentyabrda Avropa İttifaqı Rusiyanın əleyhinə sanksiyaların tətbiq olunması məsələsini müzakirə edəcək”. Politoloq hesab edir ki, Rusiyanın Cənubi Osetiya və Abxaziyanın müstəqilliyini tanımasının Azərbaycana heç bir təsiri olmayacaq: “Rusiya onsuz da 20 faiz torpağımızı işğal edib, Dağlıq Qarabağı separatçı rejim kimi tanımır. Rusiya onsuz da “de fakto” Dağlıq Qarabağın müstəqilliyini tanıyıb”. Politoloq İlqar Məmmədov isə Federasiya Şurasının bəyanatının Cənubi Osetiya və Abxaziyanın müstəqilliyinin tanınması demək olmadığını bildirir: “Bu, sadəcə, prezidentə müraciətdir, rəsmi tanıma deyil. Digər tərəfdən, Rusiya bu qurumların müstəqilliyini tanısa, beynəlxalq aləmdə tək qalacaq. Kosovonu 30-dan çox ölkə dərhal tanıdı. Cənubi Osetiya və Abxaziyanı isə bir-iki dövlətdən başqa heç kim tanımayacaq. Bu halda da Rusiya beynəlxalq aləmdə təklənəcək. Bunu yəqin ki, özləri də istəməz. Ona görə də onların vəziyyəti qiymətləndirməsi bir qədər vaxt aparacaq”. Politoloq Qabil Hüseynli isə Rusiyanın çox təhlükəli presedentin əsasını qoyduğunu qeyd edib. Onun sözlərinə görə, bu addım beynəlxalq hüquq normalarına uyğun deyil: “Rusiya təcavüz aktından sonra ələ keçirdiyi əraziləri ilhaq etməyə çalışır. Nə Abxaziyanın, nə də Cənubi Osetiyanın müstəqilliyindən danışmaq olmaz. Onsuz da bu proseslərə qədər hər iki ərizədə Rusiya sürünən ilhaq prosesindən istifadə edərək, əhalinin 90-95 faizinə Rusiya vətəndaşlığı verməklə bu yerləri özününküləşdirib. İndi baş verən hadisələrdən sonra həmin proseslərə hüquqi don geyindirməyə çalışır. Rusiya dəfələrlə Gürcüstanın ərazi bütövlüyünə səs verdiyindən bu ölkənin ərazi bütövlüyünü pozmasına hüquqi don geyindirə bilməyəcək”. Politoloq Rasim Musabəyovun fikrincə isə, Rusiya rəhbərliyi yaranmış vəziyyətdən istifadə edib, məsələni Abxaziya və Cənubi Osetiyanın tanınması səviyyəsinə gətirib: “Amma bu, çox risklidir. Belə olacağı halda, məsələnin Rusiyanın özünün başını ağrıdacağı şübhə doğurmur. Ancaq hiss olunur ki, bu qərarı vermək fikrindədirlər. Belə bir qərarın qəbul olunması isə həm də MDB çərçivəsində gərginlik yaradacaq. Digər tərəfdən, düşünürəm ki, Cənubi Osetiyanın və Abxaziyanın müstəqilliyinə 4-5 dövlət - Suriya, Kuba, Belarus, Venesuela dəstək verə bilər. Rusiya bundan böyük dəstək əldə etmək iqtidarında deyil”. R. Musabəyov hesab edir ki, Rusiya bu addımı ilə öz mövqelərini möhkəmləndirmək istəyir. apa