Rusiya yenidən Ukraynanı qarışdıracaq Moskva Ukraynanı özünə qaytarmaq üçün gələn ilki prezident seçkisindən yararlanacaq Vəfa Quluzadə: “Ukrayna ilə bağlı Rusiyanın planlarına Qərbin necə reaksiya verəcəyindən çox şey asılıdır” Əksər ekspertlər Rusiyanın Gürcüstandan sonra məhz Ukraynanı hədəfə alacağını proqnozlaşdırırlar. Əslində Rusiyanın Ukraynadakı demokratik hakimiyyət üçün problem yaratması üçün əlinə əlverişli fürsət də düşüb. Bu imkan gələn il Ukraynada keçiriləcək prezident seçkiləridir. Artıq siyasi kluarlarda belə fikir səslənir ki, Rusiya “narıncıların” sıralarını dağıtmaq üçün baş nazir Yuliya Timoşenkonun namizədliyini dəstəkləyə bilər. Heç şübhəsiz seçki dövründə Viktor Yuşşenkoya qarşı Rusiyanın Ukraynadakı əvvəlki dayağı Viktor Yanukoviçdən də istifadə edəcəyi gözlənilir. Belədə onsuz da Yanukoviçin timsalında güclü müxalifətə sahib olan Yuşşenkoya qarşı Timoşenkonun da qarşı çıxması Ukraynaya nə vəd edir? Ukrayna ilə yanaşı Azərbaycanın da Rusiyanın növbəti hədəfinə çevrilə biləcəyini istisna etməyən politoloq Vəfa Quluzadənin fikrincə, əslində Gürcüstan olayları Rusiyanın postsovet məkanında yaxın perspektivdə hansı siyasət yürütmək niyyətində olduğunu ortaya qoydu. Rusiyanın həqiqətən də Ukraynanı zəiflətmək üçün qarşıdan gələn prezident seçkisindən yararlanacağını istisna etməyən politoloqun fikrincə, Rusiya yenə də Ukraynanı yenidən özünə qaytarmaq üçün bütün vasitələrə əl atması gözləniləndir. Bu istiqamətdə Rusiyanın Y.Timoşenkodan istifadə edib-etməyəcəyinə gəlincə isə V.Quluzadə bunu real görür: “Yuliya Timoşenkonun əri milliyətcə ermənidir. Və hazırda tez-tez səslənən fikir bundan ibarətdir ki, Yuliya Timoşenko Rusiyanın ”narıncıların" içərisinə yerləşdirdiyi agentdir. ÇünkiÿUkraynadakı dəyişikliklərdən sonra bu dövlətdəki qarışıqlıqda daha çox məhz onun adı hallanır". V.Quluzadə hesab edir ki, Qərb də Rusiyanın Ukrayna ilə bağlı planlarına biganə qalmayacaq: “Rusiyanın Gürcüstandakı addımlarına baxın. Rusiya birmənalı şəkildə əldə olunan razılaşmanı pozur. Rus qoşunları hələ də Gürcüstan ərazisindədir və Gürcüstan faktiki olaraq Rusiyanın işğalı altındadır. Qərb isə baş verənlərə hələ də sərt reaksiya vermir. Ukrayna ilə bağlı Rusiyanın planlarına Qərbin necə reaksiya verəcəyindən çox şey asılıdır. Çünki Qərb Ukraynada Rusiyaya qarşı çıxmazsa, Kiyevin Moskvanın hücumları qarşısında nə vəziyyətə düşəcəyi bilinmir. Ona görə Qərb öz mütəfiqləriylə bağlı məsələlərdə çevik tərpənməlidir”. Eyni zamanda Rusiyanın təzyiqləri qarşısında V.Yuşşenkonun bir qədər sərt addımlar atmasını da istisna etməyən V.Quluzadə hesab edir ki, hətta demokratik ölkələrin rəhbərləri öz sivil qurluşlarını Rusiya qarşısında saxlamaq üçün anti-demokratik hərəkətlərə keçməlidirlər: “Timoşenkonun demokratik qurluşu təhlükə altına alan addımlarının qarşısı qətiyyətlə alınmalıdır. Çünki demokratik üsullarla demokratik qurluşlara problem yaratmağı Rusiya çox gözəl bilir. Rusiyanın bu dəfə Yanukoviçlə yanaşı, Timoşenkonun da xidmətlərindən istifadə etməsi Ukraynaya ciddi təhlükələr yarada bilər. Ona görə həm Qərb, həm də Ukrayna hökuməti bir qədər qətiyyətli addımlar atmağa hazır olmalıdır”. Xəyal azadliq