Türkiyə Ermənistanla münasibətlərə nədən can atır? Rauf Mirqədirov: «Türkiyə Ermənistanla olan problemlərini maraqlarına uyğun həll etsə, Ankara Qarabağ probleminin həllinə də pozitiv təsir edə bilər» Son zamanlar Irəvan-Ankara münasibətlərində yaşanan müəyyən yaxınlaşma bir sıra suallar doğurmamış deyil. Ermənistan prezidentinin Abdulla Gülü Irəvana dəvət etməsi, onun öz növbəsində dövlət başçısı seçilməsi münasibətiylə Serj Sarkisyanı təbrik etməsi, daha sonra iki ölkə arasında XIN səviyyəsində müəyyən danışıqlara başlanması kimi məqamlara bu günlərdə biri də əlavə olundu. Bu, Türkiyənin baş naziri Rəcəb Tayyib Ərdoğanın “Qafqaz evi”nin yaradılmasıyla bağlı ideyasıdır. Ideyanın mahiyyəti isə Azərbaycan, Ermənistan, Gürcüstan və Rusiyanın birləşdiyi vahid bir qurumun yaradılmasından ibarətdir. Hazırda Azərbaycan cəmiyyətində sorulan suallardan biri Türkiyənin Ermənistanla münasibətləri normallaşdırma cəhdinin arxasında nə dayanmasıdır. Siyasi şərhçi Rauf Mirqədirovun fikrincə, ümumiyyətlə Azərbaycan-Ermənistan münasibətlərini, Türkiyə-Ermənistan münasibətlərindən ayırmağın vaxtı çatıb. Türkiyənin Ermənistanla indiyə qədər yaxşı münasibətlərinin olmamasının səbəbinin yalnız Qarabağ münaqişəsiylə əlaqədar olmadığını deyən R.Mirqədirov bildirdi ki, Azərbaycan hakimiyyəti neçə illərdir Türkiyənin məhz Azərbaycana görə Ermənistanla normal əlaqələr qurmadığını təlqin etməyə çalışır. Amma bu, belə deyil: “Türkiyə və Ermənistan arasında kifayət qədər problem mövcuddur. Bu problemlər içərisində ilk olaraq ”erməni genosidi" və Ermənistanın Türkiyənin ərazi bütövlüyünü tanımamasını göstərmək olar. Digər tərəfdən Türkiyə Azərbaycanda baş verən hadisələrdən Ermənistana təsir vasitəsi kimi istifadə edirdi. Əgər Türkiyə Ermənistanla arasında olan problemləri öz maraqlarına uyğun həll etməyə nail olsa, hətta Ankara-Irəvan münasibətləri normalaşandan sonra belə Türkiyə Ermənistana təsir edərək Qarabağ probleminin həllində də pozitiv rol oyna bilər". Hazırda regionda siyasi situasiyanın 5 il əvvəlkindən fərqli olduğunu deyən R.Mirqədirov bildirdi ki, Ermənistan rəhbərliyi də Ankara ilə aralarında olan problemləri tam da olmasa da, türklər üçün ağrısız həllinə hazırdır. Hazırda Ermənistan hakimiyyətinin legitimliyinin böyük şübhə altında olduğunu deyən şərhçi hesab edir ki, S.Sərkisyanın seçkidən sonrakı zorakı addımları iqtidar üçün əlavə problemlər yaradıb: “Ermənistan hakimiyyəti fəal siyasət yürütmək məcburiyyətindədir. Ermənistan hakimiyyəti bu cür siyasətiylə özünə xarici dəstək qazanmağa çalışır. Eyni zamanda Ərdoğan hökumətinin ciddi problemləri var. Ona görə bu baxımdan Ankara ilə Irəvanın maraqları üst-üstə də düşə bilər. Mən həmişə ”bir xalq iki dövlət" şüarının əleyhinə olmuşam. Iki dövlət və iki xalq var. Türkiyə ilə Azərbaycanın hərəsinin öz maraqları olduğu Kosovanın müstəqiliyinə münasibətdə ortaya çıxdı. Türkiyə və Azərbaycan bir-birinə yaxın olsalar da, dövlət kimi ayrı maraqları var". Ermənistan-Türkiyə münasibətlərinin inkişafının Türkiyə-Azərbaycan münasibətlərinə təsirinə gəlincə, R.Mirqədirov hesab edir ki, Türkiyənin Ermənistanla münasibətlər qurmasına xəyanat kimi baxmaq lazım deyil. Amma Türkiyə də öz növbəsində bu münasibətləri qurarkən müəyyən nüansları da nəzərə almalıdır. Xəyal azadliq