“RUSİYA AZƏRBAYCANI İŞĞAL PLANI HAZIRLAYIB” Vəfa Quluzadə: “Qəfildən ağır zərbəyə tuş gəlməməkdən ötrü müttəfiq ölkələrlə ciddi danışıqlar aparmalıyıq” “Rusiyanın Gürcüstana hərbi təcavüzündən sonra Azərbaycanın zəbt olunmuş torpaqlarını hərbi yolla azad etmək niyyətlərini gerçəkləşdirə biləcəyi indiki halda mümkünsüz görünür”. Politoloq Vəfa Quluzadə bu fikirləri ölkə başçısı İlham Əliyevin növbəti dəfə torpaqların azad ediləcəyi ilə bağlı açıqlamasını şərh edərkən bildirdi. V.Quluzadə bununla belə, dövlət başçısının diplomatik bəyanat verdiyini vurğuladı: “İlham Əliyev onu deyib ki, biz əvvəlki mövqeyimizdə qalırıq. Yəni əgər sülh yolu ilə problem həllini tapmasa, hərbi yoldan istifadə edəcəyik”. Ekspert qeyd etdi ki, indiyədək Azərbaycan torpaqlarını azad etməkdən ötrü bəyanatlardan başqa ortaya ciddi heç nə qoymayıb: “Azərbaycanda savadlı adamlar bilirlər ki, bu münaqişədə tərəf Ermənistan yox, Rusiyadır. Rusiya ilə müharibə edib ona qalib gəlməksə, mümkünsüzdür. Fakt budur ki, Azərbaycanın 20 faiz torpağı işğal olunsa da, Ermənisan 100 faiz Rusiya tərəfindən işğal olunub. Azərbaycan Rusiyanın forpostuna yaxınlaşan kimi Rusiya nüvə silahından da istifadə edə bilər. Çünki biz müsəlmanıq. Bizim torpaqları işğal etsələr də, heç yerdə ”Ermənistan təcavüzkardır" deyilmir. Bu mənada müharibə olsa, biz Gürcüstandan qat-qat çətin vəziyyətdə olacağıq". Politoloq bildirdi ki, Rusiya Qafqazdakı iddialarından əl çəkmədiyi üçün Qarabağ probleminin həlli də uzanır: “Qarabağ münaqişəsi ona görə həll olunmur ki, növbəti dəfə münaqişənin partlamaq ehtimalı var. Bu mənada Moskvada hazırlanan xüsusi plan var. Plan ondan ibarətdir ki, Azərbaycanın Ermənistana hücum imitasiyası yaradılır, ondan sonra isə Rusiya ölkəmizə qarşı hücuma keçir. Bu işləri görmək Rusiya üçün çətin məsələ deyil. Kazimirov vaxtilə açıq şəkildə deyirdi ki, Rusiya hücum edib Kürdəmiri də alacaq və Azərbaycan iki yerə böləcək. İndiki məqamda isə əminəm ki, Rusiya XİN-i Ermənistan üçün bəyanatlar çap edib və gizli konvertlərə qoyub. Hücum başlayanda bu konvertlər BMT-yə göndəriləcək. Rusiya bəyan edəcək ki, neft dollarlarından şişmiş Azərbaycan Ermənistanı əzmək istəyir və ona görə də ermənilərə yardım etməyə məcburuq. Sözsüz ki, Ermənistan Silahlı Qüvvələri adı altında rus ordusu Azərbaycanın digər ərazilərini də işğal edəcək”. V.Quluzadə Gürcüstanı bombalayan təyyarələrin Ermənistanın Gümrü şəhərindəki bazalardan qalxdığını da xatırlatdı: “Dünənədək dünya Gürcüstandan çıxarılan bazaların Ermənistanda yerləşməsinə göz yumurdu. İndi təhlükə çox böyüyüb. Fakt budur ki, Ermənistan və Dağlıq Qarabağda külli miqdarda rus silahı yığılıb. Xatırlayıram ki, hələ 90-cı illərin axırlarında Primakov Heydər Əliyevin qəbulunda olanda demişdi ki, Dağlıq Qarabağın ən müasir və güclü ordusu var. O zaman hətta Azərbaycanı Dağlıq Qarabağla birbaşa danışığa çağırırdı. Təbii ki, Primakov bu sözləri deyərkən rus ordusunu nəzərdə tuturdu”. V.Quluzadə Rusiyanın Azərbaycandan çoxdan heyif çıxmağa hazırlaşdığını və bunun üçün məqam gəzdiyini də qeyd etdi: “Rusiya dəfələrlə sərhədlərin qorunmasını, ölkəmizdə havadan müdafiə sistemini yerləşdirməyi, sülhməramlılarını gətirməyi təklif etsə də, Azərbaycan tərəfdən rədd cavabı alıb. Sülh yolu ilə Azərbaycanı fəth edə bilmədiyi üçün indi əsgəri yolla əl atmağa bəhanə gəzir”. Ekspertə görə, hazırkı məqamda nə qədər ehtiyatlı olsaq da, Rusiya lazımi vaxtda müharibəyə başlamağa bəhanə tapacaq: “Deyəcək ki, Azərbaycan həmişə Qarabağ məsələsini hərbi yolla azad etmək istəyir. Ölkəmizə qarşı təcavüzə başlayacaq və ondan sonra bütün erməni lobbisi dünyada hərəkətə keçəcək. Son günlər Rusiya televiziyaları daim belə təbliğat aparırlar ki, Azərbaycanın əsas konsepsiyası Dağlıq Qarabağda gücdən istifadə etməkdir. Rus deputatları da tez-tez bu barədə çıxışlar edirlər. Ona görə də təhlükə realdır”. Politoloqun fikrincə, qəfildən ağır zərbəyə tuş gəlməməkdən ötrü Azərbaycan müttəfiq ölkələrlə ciddi danışıqlar aparmalıdır: “Düzdür, Ərdoğan Bakıda olarkən bizi məyus etdi. Onun Rusiya ilə birgə təhlükəsizlik platformasına daxil olmaq haqqında planı təbii ki, bizim maraqlarımıza uyğun deyil. Bu, o deməkdir ki, biz gedib Rusiyaya təslim olmalıyıq. Gürcüstan artıq bu plana etiraz edib. Azərbaycan da bunu qəbul edə bilməz. Torpağımızın 20 faizini işğal edən Rusiya ilə bir platformada ola bilmərik”. Ancaq politoloq Azərbaycanın öz torpaqlarından imtina etməyəcəyinə də əminliyini bildirdi. Qeyd etdi ki, təslimçi sazişə imza atmaq ölkəmizin intiharı demək olardı. Ona görə də ekspert ordunun gücləndirilməsinə xüsusi diqqət ayırmağı vacib saydı. Cavid TURAN musavat