Əhmədinejad gəldi və getdi A. Kərimova Türkiyə hökumətinin dəvəti ilə İran prezidenti Əhmədinejad İstanbula işgüzar səfər adıyla gəldi. Ankaraya gəldiyi təqdirdə Atatürkün qəbrini ziyarət etməyəcəyini bildirdikdən sonra, İran prezidentinin Türkiyəyə gəlişi üçün ölkənin xarici işlər nazirliyi variantlar axtarmağa başladı. Əhmədinejadın rəsmi səfər çərçivəsində Ankaraya deyil- sadəcə iş görüşmələri çərçivəsində İstanbula gəlməsini planladı. Beləliklə də İran dövlət başçısının Anıt qəbiri ziyarət etmə məcburiyyəti aradan qaldırıldı. Əhmədinejad nədən Türkiyəyə çağrıldı? Bu səfərin məqsədi nə idi? Bu suallar mətbuatı əməlli-başlı məşğul etdi. Əslində onun gəlişi bir şou xarakteri daşıdı. Əhmədinejadın görüşlər əsnasında mətbuata atdığı atmacalar, yolların bağlanması-yollarda tıxacların əmələ gəlməsi ilə bağlı "Mən olsaydım İranda yolları bağlamazdım" deməsi istanbulluları çox əsəbiləşdirdi. Hər yönü ilə gərginlik yaradan bu müəmmalı səfərin ardından saysız suallar ortaya çıxdı. Bu səfər ABŞ və İsraildə yaxşı qarşılanmadı. İsraildən Türkiyəyə soyuq rüzgar əsməyə başladı. Gərginlik yaradacağını bilə-bilə rəsmi Ankaranın bu səfəri planlamasında məqsədi nə idi? Analitiklərə görə, ABŞ hökuməti seçkilər öncəsi İranı vuracaq. Buş bunun üçün lazımi hazırlıqları görür. Ankara Vaşinqtondan bu yöndə məlumatlar alır. ABŞ İranı vurmaq üçün Türkiyənin hava sahəsini istəyə bilər. Türkiyə daha əvvəl ABŞ-a İraqı vurmaq üçün hava sahəsini açmamışdı və bu üzdən iki hökumət arasında ciddi problem yaranmışdı. ABŞ-ın bu məsələdə Türkiyəyə inamı sarsılıb. Analitiklərə görə, ABŞ İranı vurmaq üçün Gürcüstan hava sahəsini ehtiyat plan olaraq nəzərdə tuturdu. Bunun üçün Rusiya Gürcüstana girərək buranın etibarlı olmadığını və Gürcüstanın "arxa bağça" rolundan çıxdığı mesajını verdi. Bütün bunlardan sonra Türkiyənin vəziyyəti daha da gərginləşdi. Türkiyə hökuməti eyni problemi təkrar yaşamamaq üçün İranı bu müharibəni önləməsi yönünda dilə tutmağa çalışsa da, heç nə əldə edə bilmədi. Türkiyənin ana müxalifəti - Cümhuriyyət Xalq Partiyasının başqanı Dəniz Baykala görə Türkiyə hökumətinin bu yöndə atdıqları addım boşa çıxdı. Əhmədinejadın İstanbul səfəri ucuz şoudan başqa bir şey olmadı. "AZƏRBAYCANI İNCİTMƏYİN" Dəniz Baykal Türkiyə hökumətinin xarici siyasətdə çox ciddi səhvlərə yol verdiyi iddiasındadır. Əhmədinejadın səfərinin tam bir "fiasko" olduğunu söyləyən Dəniz Baykal Tayyib Ərdoğanın Azərbaycana edəcəyi səfəri könül alma məqsədi daşıdığını bildirib: "Ermənistan, nə soyqırım iddialarından imtina edir, nə də Azərbaycan torpaqlarından çıxır. Buna qarşı Türkiyə yeni addımlar atmaq istəyir. Ermənistan-Türkiyə matçını izləmək üçün Ermənistana getmək, sərhəd qapılarının açılması isitqamətində bünövrə hazırlamaq və bütün bunlar üçün də Azərbaycanın könlünü almaq istəyirlər. Azərbaycan bizim qətiyyən incitməmiz gərəkən qardaş ölkə. Ayrıca ticari münasibətlərimiz qaz ve neft anlaşmaları ilə daha da irəli gedəcəkdir. Ermənistanla yeni münasibətlər düzəninə girilirkən Azərbaycan qətiyyən incitilməməlidir. Ancaq görünən o ki, Ermənistana matça gediləcək və bu üzdən Azərbaycana gedib onların könlünü almaq istəyirlər. Əfsuslar olsun ki, xarici münasibətlərdə çox böyük səhvlərə yol verilir". Ayşə Kərimova GÖNEN gonenay@ hotmail.com 525