“RUSİYA QORİNİ BAKI-CEYHANA GÖRƏ TUTUB” Britaniyanın nüfuzlu nəşrindən sensasion iddia “Rusiyaya siyasətlə yox, ancaq iqtisadiyyatla təsir etmək olar”. Londonda çıxan gündəlik “İndependent” qəzetində dərc olunmuş məqalə belə adlanır. Məqalənin müəllifi Adrian Hamiltonun fikrincə, indi hamını maraqlandıran sual Gürcüstan münaqişəsindən sonra Rusiya ilə münasibətlərdə ticarəti siyasətdən necə ayırmaq barədədir. “Bu sualın cavabı bp şirkəti, ukraynalılar, Şərqi Avropa və baltiklilər üçün maraqlıdır. Məsələ də burasındadır ki, biznesi siyasətdən ayırmaq nə Afrikada, nə Asiyada, nə də Sovet İttifaqından qopmuş yeni ölkələrdə mümkündür”. Məqalədə deyilir ki, Rusiya dövləti qarışıqlıq içərisində olanda və onun yanacaq sərvətləri oliqarxların ixtiyarına keçəndə, Qərb bir müştəri kimi öz oyun qaydaları ilə oynaya bilirdi. Bütün bunlar Rusiya dövləti xammalı öz əllərində cəmləşdirəndən sonra dəyişdi. Lakin bu hələ,necə deyərlər,“kinonun jurnalı” imiş. Kinonun ən həyəcanlı hissəsi Gürcüstanda münaqişə ilə üzə çıxdı. Qəzet yazır ki, Avropanın çətinliyi bundadır ki, Azərbaycan və Mərkəzi Asiyanın neft və qazı üçün yeganə mümkün marşrut hələlik Gürcüstandan keçir. Məqalədə deyilir ki, ən ağlagələn Rusiyadan yan keçən marşrut İran ola bilərdi. Lakin Tehran Qərbin hazırkı siyasəti tərəfindən bir kənara qoyulub. Odur ki, Xəzər neftinin istehsalçıları üçün iki satış yolu var: ya Gürcüstan vasitəsilə Avropaya, ya da Rusiyadan Avropaya: “Odur ki, Rusiya Bakı-Ceyhan boru kəmərinin üstündə yerləşən Qoridə elə belə oturmayıb, həmçinin Rusiyanın bu regiona Qərbə arxalanmağın əbəs olduğu barədə mesaj göndərməsi təsadüfi deyil”. Qəzetin yazdığına görə, Buş və Sarkozi bilirlər ki, Rusiyanın “Gürcüstan mesajı” Qərbə ünvanlanıb. Lakin ən böyük mesaj Qafqazın və Xəzər hövzəsinin başqa ölkələrinə çatacaq: “İndi biz Moskvanın nüfuz dairəsi uğrunda döyüşünə müdaxilə etməliyikmi. Əlbəttə ki, yox" . Müəllifin fikirncə, Qərb-Şərq qarşıdurması oyunu yenicə müstəqil olmuş bu ölkələrin marağında deyil: “Qazaxıstan kimi onların əksəriyyətində nəzərəçarpacaq rus əhalisi var və onların Moskva ilə uzunmüddətli münasibətləri olub. Onlar Rusiyaya nifrət etsələr belə, böyük qonşularına qarşı mübarizədə hər hansı tərəfi tuta bilməzlər” . “İndependent” in məqaləsində Qərbin səhvlərindən də söz açılır. Bildirilir ki,Qərb əgər Rusiyaya zəncirlənməsi vacib olan ayı kimi yox, ticarət rəqibi kimi baxsaydı daha uzağa gedə bilərdi. Müəllif yazır ki, nəinki siyasət, hətta kommersiya mənasında da Qərb çox şeyi əldən verib: “Biz təklif olunmuş ”Nabukko" qaz kəməri layihəsi də daxil olmaqla, yeni kəmərlər şəbəkəsi planlarını həyata keçirməkdə lənglik göstərmişik. İndi də Avropanın başı Sarkozinin divanə “Aralıq Dənizi İttifaqı layihəsi” nə qarışıb. Avropa İttifaqının hələ də əməlli-başlı vahid enerji siyasəti yoxdur. İttifaqın İran siyasəti isə mənasız və ziyanlıdır". Siyasət şöbəsi musavat