Azərbaycan Cənubi Qafqazda mühüm əhəmiyyətə malikdir Trayan Basesku: "Azərbaycanın bu əhəmiyyəti regional proseslərdə tutduğu çox düzgün mövqeyindən irəli gəlir" Rumıniya prezidenti Trayan Basesku Bakıda birgünlük işgüzar səfərdə olub. Heydər Əliyev adına beynəlxalq hava limanında Trayan Baseskunu xarici işlər naziri Elmar Məmmədyarov və digər rəsmi şəxslər qarşılayıblar. Hava limanının ali qonaqlar üçün salonunda Trayan Basesku və Elmar Məmmədyarov arasında qısa protokol söhbəti olub. Dünən prezident İlham Əliyevin və Trayan Baseskunun təkbətək işçi səhər yeməyi olub. Söhbət zamanı bildirilib ki, Azərbaycanla Rumıniya arasında ikitərəfli münasibətlər uğurla inkişaf edir və əlaqələrin möhkəmlənməsi, eyni zamanda, regional əməkdaşlığın genişlənməsinə xidmət edir. Qarşılıqlı münasibətlərin bundan sonra da möhkəmlənəcəyinə əminlik ifadə olunub. Daha sonra İlham Əliyevin və Trayan Baseskunun nümayəndə heyətlərinin iştirakı ilə geniş tərkibdə görüşü keçirilib. "Sizin səfəriniz bizə imkan verdi ki, ikitərəfli münasibətləri və bölgədə gedən prosesləri geniş şəkildə müzakirə edək. Rumıniya ilə Azərbaycan arasında mövcud olan yaxın və dostluq əlaqələrini nəzərə alaraq, təbii ki, biz çox səmimi fikir mübadiləsi aparmışıq" - deyə İlham Əliyev görüşdə etdiyi çıxışı zamanı deyib. O vurğulayıb ki, ikitərəfli münasibətlər çox sürətlə inkişaf edir və yüksək səviyyəli qarşılıqlı səfərlər bunun əyani sübutudur: "Gündəliyimiz çox genişdir, buna həm siyasi, həm iqtisadi, həm mədəni, həm də eneryi sahəsindəki əməkdaşlıq daxildir və biz yaxın tərəfdaşlar kimi bütün istiqamətlərdə fəaliyyət göstəririk. Əlbəttə ki, bütün birgə layihələrimizi, xüsusilə eneryi sahəsində uğurla davam etdirmək və başa çatdırmaq üçün bölgədə sabitlik olmalıdır. Bölgədə yaşanan gərginlik bizi çox narahat edir. Bu baxımdan sizin səfəriniz həm ikitərəfli münasibətlərin gələcək inkişafı, həm də bu bölgədə gələcəkdə əməkdaşlığın, təhlükəsizliyin möhkəmlənməsi üçün çox önəmlidir". Prezident İlham Əliyev ikitərəfli dostluq münasibətlərinin sürətlə inkişaf etdiyini, siyasi, iqtisadi, mədəni, eneryi sahəsində ölkələrimizin yaxın tərəfdaş olduğunu və regional əməkdaşlığın uğurla həyata keçirildiyini bildirib: "Rumıniya prezidentinin bu səfəri bölgədə gələcək əməkdaşlığın, təhlükəsizliyin möhkəmlənməsi baxımından çox önəmlidir. Bölgədə sabitlik olmalıdır və hazırda yaşanan gərginlik bizi çox narahat edir". Rumıniya prezidenti isə qəbula görə İlham Əliyevə təşəkkür edib: "Bu, olduqca çox mühüm bir vaxt çərçivəsində məni qəbul etdiyinizə görə, ölkənizə işgüzar səfərə gəldiyimə görə sizə minnətdaram. Cənab prezident, mənim Bakıya gəlməyim, sizinlə görüşmək istəyim məhz onunla bağlıdır ki, Azərbaycan bu regionda mühüm əhəmiyyətə malikdir. Azərbaycanın bu əhəmiyyəti regional proseslərdə tutduğu çox düzgün mövqeyindən irəli gəlir. Bu, həmçinin onunla bağlıdır ki, Azərbaycan bu gün bütün Avropa İttifaqının, o cümlədən Rumıniyanın eneryi siyasətində vacib rol oynayır. Əminəm ki, bu meyarları, eyni zamanda, ikitərəfli münasibətlərimizin olduqca yüksək səviyyədə olmasını nəzərə alaraq, biz belə vacib məsələlər üzrə bu görüşümüzü mütləq keçirməli idik". Trayan Basesku Azərbaycan prezidenti ilə apardığı danışıqlara da toxunub: "Cənab prezident, bu gün səhər sizinlə apardığımız danışıqlar bir daha onu göstərdi ki, biz bir çox mühüm məsələlər üzrə - təhlükəsizlik və eneryi sahəsində eyni, oxşar mövqeyə malikik". Trayan Basesku bölgədə baş verən hadisələrə, eyni zamanda, Ermənistan-Azərbaycan, Dağlıq Qarabağ münaqişəsinə toxunaraq deyib ki, Rumıniya bütün qarşıdurmaların, münaqişələrin ölkələrin ərazi bütövlüyü çərçivəsində həllinin tərəfdarıdır. Qeyd edək ki, dünən Rumıniya prezidentinin Azərbaycana səfəri başa çatıb. Trayan Basesku Bakıdan Gürcüstana səfərə gedib. Elman BABAYEV kaspi