Rusiya neft və qazımızı istəyir "Azərbaycana Qərb, Türkiyə lazımi dəstəyi verməsə, Rusiya istədiyini alacaq" Bakı-Tiflis-Ceyhan (BTC) neft kəmərinin Türkiyədən keçən hissəsində partlayışın baş verməsinə görə iki həftədir ki, bu xətlə neftin nəqli dayandırıb. Azərbaycan və beynəlxalq şirkətlər alternativ marşurut olaraq Bakı-Supsa kəməri və dəmiryolu ilə neft daşımalarını həyata keçirirdi. Ancaq Rusiyanın Gürcüstana hücumu Bakı-Supsa kəmərinin də fəaliyyətinin dayandırılmasına gətirib çıxardı. Bir neçə gün əvvəlcə neft daşınmalarının də həyata keçirildiyi dəmiryolunun Kaspi şəhəri yaxınlığından keçdiyi körpü partladıldı. Ötən gün Rusiya hərbi donanması Xəzərdə hərbi təlimlərə başlayıb. Moskva Gürcüstanla bərabər Azərbaycandan da Rusiyaya xaricilərin keçməsini qadağan edib, yəni sərhədlərini qismən bağlayıb. Ramiz Mikayıloğlu Avqustun 19-da gürcü mediası BTC-ni rusların minaladığı barədə də məlumat yayıblar. Rusiya hərbi komandanlığı bu məlumatı təkzib edib. Ancaq fakt budur ki, Moskva Bakıya nə isə deməyə, mesaj verməyə, istədiyini çatdırmağa və almağa çalışır. Qeyd edək ki, atəşkəs müqaviləsinin imzalanmasına baxmayaraq rus hərbi qüvvələri hələ də Gürcüstanı tərk etməyə həvəsli görünmürlər. Qori şəhəri hələ də işğal altındadır, üstəgəl, ötən gün Poti limanında da post qurulub, 20 gürcü əsgəri əsir alınıb. Politoloq Hikmət Hacızadə deyir ki, Rusiya ümumiyyətlə, Cənubi Qafqazda möhkəmlənmək istəyir. Məsələn, ruslar I Qarabağ müharibəsində Azərbaycanın 7 rayonunu işğal ediblər. Moskva Gürcüstanda da elə mövqelər əldə etmək istəyir ki, müharibə qurtarandan sonra danışıqlarda təsiredici imkanları olsun. Eyni zamanda Rusiya geri çəkilmək şərtləri sırasına Gürcüstanın NATO-ya daxil olmayacağı ilə bağlı təminatı da əlavə etmək niyyətindədir. Əslində Gürcüstanda Moskvanın mövqelərini gücləndirmək niyyətinin arxasında həm də Xəzər hövzəsinin, Azərbaycanın karbohidrogen ehtiyatlarının Avropaya nəqlini dayandırmaq, ixrac marşrutlarını inhisara almaqdır: "Bir müddət əvvəl prezident Dmitri Medvedyev Azərbaycana gəlmiş, qazımızın "Qazprom" vasitəsiylə nəqlini təklif etmişdi. Amma söhbət tək "Şahdəniz" qazından getmir. Moskva ümumiyyətlə, Xəzərin neft və təbii qazının Avropa bazarına Rusiyanın nəzarəti altında çıxmasını istəyir. Beləliklə də, ürəkləri istəyəndə, neftin və qazın nəqlini dayandırsınlar, hansısa istəklərinin yerinə yetirilməsinə nail olsunlar, istəyəndə neft və qazın qiymətini qaldırsınlar və s. Söhbət bundan gedir". Rəsmi Bakının Rusiyanın mesajlarına hansı cavab verəcəyinə gəlincə, Hikmət Hacızadə Azərbaycanın imkanlarının çox aşağı olduğunu söyləyir: "Qərbin, Türkiyənin nə deyəcəyini gözləyək. Əfsus ki, vəziyyət belədir. Azərbaycana Qərb, Türkiyə lazımi dəstəyi verməsə, Rusiya istədiyini alacaq". Digər politoloq Rasim Musabəyovun Türkiyənin proseslərə yanaşması barədə də mülahizəsi maraqlıdır: "Türkiyəylə Rusiyanın ticarət dövriyyəsi yenicə 20 milyard dollara çatıb. Ankara ticarət əlaqələrini risk altında qoymaq istəmir. Türkiyə Moskvayla münasibətləri elə nizamlamağa çalışır ki, nə özünə, nə də Azərbaycana risklər olmasın". xalqcebhesi