ƏRƏSTUN ORUCLU: «AZƏRBAYCANIN MANEVR İMKANLARI QAT-QAT AZALIB» Avqustun 20-də ABŞ dövlət katibi Kondoliza Rays və Polşa xarici işlər naziri Radoslav Sikorski Varşavada Amerika raketdən müdafiə sisteminin Polşa ərazisində yerləşdirilməsinə dair yekun müqavilə imzalayıblar. Ərəstun Oruclu «Media forum» saytı xəbər verir ki, «Bi-Bi-Si» Teleradio Şirkəti imzalanma mərasimini birbaşa yayımlayıb. İki ölkə arasında ön razılaşma avqustun 14-də imzalanıb. Müqaviləyə görə, ABŞ 2013-cü ilə qədər Polşa ərazisində 10 ədəd raketdən müdafiə sistemi, Çexiya ərazisində radar quraşdıracaq. Çexiya ilə müqavilə iyulun 8-də imzalanıb. «Şərq-Qərb» Araşdırmalar Mərkəzinin rəhbəri Ərəstun Oruclu «Media forum» saytına deyib ki, Gürcüstanda baş verən son olaylar ABŞ-la Polşa arasında bugünkü müqaviləni birbaşa sürətləndirib: «Rusiyanın Gürcüstana qarşı təcavüzü göstərdi ki, Moskva Qərbpərəst siyasət aparan dövlətlərə təzyiqə baş vurub və Qərbin, ilk növbədə ABŞ-ın müttəfiqlərini sıradan çıxararaq onları öz nəzarətinə keçirmək yolu seçib. Polşa Rusiyanın Avropa siyasətində xüsusi yeri olan bir dövlətdir. Tarix boyu da Rusiya Avropaya qarşı təcavüzünü Polşadan başlayıb. Rusiyanın Gürcüstana qarşı aqressiv siyasəti bunadək müəyyən tərəddüdlər keçirən Polşanı ABŞ-ın şərtləri ilə razılaşmağa məcbur etdi. Bu həm də ABŞ-ın Polşanın şərtlərini qəbul etməsinə şərait yaratdı». Çexiya və Polşa ərazilərində raketdən müdafiə sistemlərinin yerləşdirilməsi gündəmə gələndə Rusiya ABŞ-ı niyyətindən vaz keçib Qəbələ RLS-dən birgə istifadəni təklif etmişdi. «Hər iki ölkənin ərazisində sistemlərin quraşdırılıması haqda sazişlərin imzalanması Rusiyanın təklifinin qüvvədən tam düşməsi deməkdirmi» sualına cavabında politoloq deyib ki, bu məsələnin tamamilə arxa plana keçməsini qeyd etmək mümkündür: «Qəbələ RLS köhnəlib, onun saxlanması olduqca baha başa gələrdi. Digər tərəfdən, Rusiya Gürcüstana təcavüzlə etibarlı müttəfiq olmadığını göstərdi. Qlobal təhlükəsizliyin təminatı üçün nəzərdə tutulan hər hansı hərbi obyektin Rusiya ilə birgə işlədilməsi mümkün deyil». Qəbələ RLS-lə bağlı Rusiyanın ABŞ-a təklifi Azərbaycan hakimiyyətinə də manevr imkanları verirdi. ABŞ-ın Rusiyanın təklifinə ciddi yanaşmaması Azərbaycanın manevr imkanlarını məhdudlaşdırırmı? Ə.Oruclunun fikrincə, Azərbaycan hakimiyyəti balanslaşdırılmış siyasət aparmağa maraqlı kimi görünür: «Təbii ki, Bakıda da yaxşı başa düşürlər ki, bu, perspektivsiz məsələdir. Bununla belə, Azərbaycan hakimiyyəti yenə hansısa manevrlər etməkdə maraqlıdır. Amma bu gün regionda baş verən hadisələr və bunun Azərbaycana birbaşa neqativ təsiri göstərir ki, hakimiyyət konkret xarici siyasət kursu müəyyənləşdirməlidir. İndi Azərbaycanın manevr imkanları qat-qat azalıb». «Media forum»