KREML ERMƏNİLƏRİN AÇIQ MÜDAFİƏSİNƏ QALXDI İrəvanda Ermənistanı “təcavüzdən qorumaq” üçün hərbi planlar müzakirə olunacaq Rusiyanın Cənubi Osetiyadan sonra Dağlıq Qarabağ münaqişəsini də alovlandırmaq və bununla da bütün Qafqazı öz hərbi nəzarəti altına almaq planları haqda narahatlıqlar günbəgün artır. “İnterfaks” agentliyinin məlumatına görə, avqustun 21-də İrəvanda Kollektiv Təhlükəsizlik Müqaviləsi Təşkilatının “Rubej” birgə təlimlərinin növbəti mərhələsi başlayacaq. Həmin gün İrəvanda sözügedən hərbi bloka daxil olan ölkələrin müdafiə nazirlərinin iclası da olacaq. Təlimlərin bu mərhələsində Ermənistanın təcavüzə məruz qalması halında bu ölkəyə hərbi və hərbi-texniki yardımın göstərilməsi sınaqdan keçiriləcək. Təlimlərin ssenarisinə görə, Cənubi Qafqaz regionunda hərbi-siyasi və strateji vəziyyətin kəskinləşməsi fonunda Ermənistana qonşu olan ölkələrdən biri ona hücum edir, bu zaman bloka daxil olan ölkələr Rusiya başda olmaqla, Ermənistana təcili hərbi yardım göstərir və təcavüzkarın hücumunu dəf edərək onu öz ərazilərinə geri oturdur, hücuma keçərək hərbi infrastrukturunu məhv edir və müttəfiq ölkəyə qarşı yeni təcavüz imkanlarını aradan qaldırıb regionda vəziyyəti nəzarət altına alır. Bundan əvvəl Kollektiv Təhlükəsizlik Müqaviləsi Təşkilatının nümayəndələri bildiriblər ki, təlimlərin ssenarisi şərti xarakter daşıyır. Lakin cəmi bir neçə həftə bundan əvvəl, Gürcüstana hərbi müdaxilə ərəfəsində Rusiya Şimali Qafqazda “Qafqaz-2008" adı altında hərbi təlimlər keçirmişdi. Bu təlimlərin ssenarisinə görə, təhlükə Rusiyaya cənubdan gəlirdi və onu önləmək üçün 58-ci ordunun hissələri, o cümlədən desant qüvvələri, hərbi aviasiya səfərbər olunmuşdu. Bilavasitə Gürücstan sərhədləri yaxınlığında keçirilən təlimlər zamanı rus desantçıları iki ölkə sərhədindəki tunelləri də nəzarətə götürmüşdü. Həmin manevrlərdən sonra Cənubi Osetiya münaqişəsi ətrafında vəziyyət daha da kəskinləşdi, nəticədə Gürcüstan ordusu Sxinvalini tutdu və dərhal yüksək hazırlıq vəziyyətində qalan 58-ci ordunun hissələri ”Rusiya vətəndaşlarını qorumaq" adı altında bu ölkəyə yeridildi. Qeyd edək ki, Ermənistanın qonşuları arasında ona “hücum edə biləcək” yeganə ölkə varsa, o da Azərbaycandır. Çünki Ermənistanın cənub qonşusu İranla yaxın dost və müttəfiqdir, İranın nəinki Ermənistana hücum etmək, hətta onunla münasibətlərini az da olsa korlamaq ehtimalı mövcud deyil. Erməistanın digər qonşusu Türkiyədir, Türkiyə isə heç vaxt Ermənistanı hərbi baxımdan təhdid etməyib, əksinə, son vaxtlar İrəvana bir-birinin ardınca dostluq mesajları göndərir. Nəhayət, Gürcüstan özü hazırda Rusiyanın işğalı altındadır və Ermənistanı təhdid etmək iqtidarında deyil. Doğrudur, Gürcüstan ərazisində yaşayan ermənilər arasında separatçılıq meylləri getdikcə qızışır, lakin Rusiya artıq Gürcüstanı sarsıdıb və ərazilərinin üçdə birini tutub. Deməli, Rusiya başda olmaqla, Ermənistanla hərbi müttəfiq olan ölkələrin keçirdiyi təlimlərdə hədəf məhz Azərbaycandır. Rusiya Gürcüstana münasibətdə “Qafqaz-2008" təlimlərinin ssenarisini tam reallaşdırdı, təhlükə var ki, Moskva ermənilərin əliylə Dağlıq Qarabağda da vəziyyəti kəskinləşdirərək bütün regionu öz nəzarətinə almaq planlarını davam etdirəcək. Xəbər verildiyi kimi, Rusiyanın Gürcüstana qoşun yeritməsinin ardınca Ermənistanın müdafiə naziri Seyran Ohanyan da Dağlıq Qarabağa gəlib və cəbhə xəttinə baş çəkib. Dağlıq Qarabağdakı separatçı rejimin başında Rusiya xüsusi xxidmət orqanları ilə əlaqələri olan adamlar dayanır, “prezident” Bako Saakyan isə Rusiya xüsusi xidmət orqanlarının adamı kimi tanınır. Bu baxımdan təhlükə var ki, Rusiya öz planlarını həyata keçirmək üçün onlardan istifadə edəcək. Hadisələrin mümkün inkişaf ssenarisi isə aşağıdakı şəkildə ola bilər: erməni qüvvələri intensiv şəkildə atəşkəsi pozmağa başlayır və bu ilin yazında olduğu kimi lokal hücumlar edərək Azərbaycan ordusunun mövqelərini tutmağa çalışır. Azərbaycan isə buna cavab vermək məcburiyyətində qalaraq erməni qüvvələrini geri oturdub onların mövqelərini tutur. Nəticədə vəziyyət gərginləşir və ermənilər Azərbaycanla sərhədboyu ərazilərdə təxribatçı hərəkətlər edərək Azərbaycan ordusunu Ermənistan ərazilərinə cavab zərbələri endirməyə təhrik edirlər. Bu zaman Kollektiv Təhlükəsizlik Müqaviləsi Təşkilatının nizamnaməsinə görə formal olaraq Ermənistana hərbi yardımın göstərilməsinə əsas verən situasiya yaranır və Rusiya öz planlarının icrasına başlayır. Qeyd edək ki, Rusiyanın Gürcüstana qarşı təcavüzü artıq Azərbaycana qarşı istiqamət götürüb - hərbi olmasa da - iqtisadi baxımdan. Rusiya Bakı-Tiflis-Ceyhan və Bakı-Supsa kəmərlərinin yaxınlığına raket-bomba zərbələri endirib, Poti limanından neft daşınmasını dayandırıb, Azərbaycana aid Kulevi terminalında işi dayandırıb və nəhayət, neft qatarlarının keçdiyi dəmiryol körpüsünü bağlayıb. Rusiyaya yaxşı bələd olan ekspertlər səviyyəsində belə narahatlıqlar var ki, Gürcüstandan sonra növbə Azərbaycana çata bilər. Siyasət şöbəsi musavat