NATO Rusiyayla əməkdaşlığı dayandırmadı Tiflis üçün Şimali Atlantika Alyansının qapısı açıldı NATO ölkələri Xarici İşlər Nazirləri Şurasının dünən Brüsseldə keçirilən fövqəladə iclasında ABŞ-ın Rusiyayla əməkdaşlığı dayandırmaq təklifi dəstəklənməyib. Böyük Britaniyanın xarici işlər naziri Devid Miliband müzakirələr haqda danışarkən Rusiyayla işləməyin indiki formatda, eləcə də Rusiya-NATO Şurası çərçivəsində davam etdirilməsinin vacib olduğunu söyləyib. Onun sözlərinə görə, Rusiya beynəlxalq arenada vacib oyunçudur: "Ona görə də Rusiyayla işləmək lazımdır. Rusiyanın təcrid olunması yaxşı addım deyil". Bununla belə, Britaniyanın xarici siyasət idarəsinin başçısı vurğulayıb kit, NATO ölkələri Rusiyanın etibarlı beynəlxalq tərəfdaş olmasına şübhə ilə yanaşırlar. Rəvan Məmmədli Alyans üzvləri Moskvanın Gürcüstandakı davranışları ilə beynəlxalq hüququ pozması fikrində həmrəydirlər: "Rusiyanı ordusunu ləngimədən Gürcüstan ərazisindən çıxarmağa və bu ölkənin ərazi bütövlüyünü tanımağa çağırırıq. Hərbi əməliyyatlar çıxış yolu deyil". NATO-nun baş katibi Yaap de Hoop Sxeffer sammitdə NATO-Gürcüstan komissiyasının yaradılmasına qərar verildiyini açıqlayıb. Komissiyanın məramı Gürcüstanın Şimali Atlantika Alyansına inteqrasiyasını sürətləndirməkdir. Xatırladaq ki, Brüsseldə keçirilən iclas ərəfəsində ABŞ-ın dövlət katibi Kondoliza Rays iddialı bəyanatlar verib. O demişdi ki, NATO Rusiyanın Gürcüstandaki strateji məqsədlərinə çatmağa əngəl olacaq, Avropada yeni bir "dəmir pərdə" çəkilməsinə izn verilməyəcək: "Gürcüstandakı işğalçı əməllərinə görə Rusiya mütləq cəzalandırılacaq. Gürcüstan və digər Şərqi Avropa ölkələrində demokratiyanın yenidən inşasına dəstək veriləcək, Rusiyanın səyləri boşa çıxacaq". Dövlət katibi bildirib ki, NATO Rusiyanın Gürcüstandakı demokratiyanı zəiflətmə, hərbi əməliyyatlarla iqtisadiyyatını dağıtma, gürcü dövlətini zəiflətmə yönündə strateji planlarını boşa çıxarmalıdır: "Rusiyanın bu strateji məqsədlərinə çatağa maneə olmaqda qərarlıyıq. Moskvanın keçmiş SSRİ ölkələrinin gözlərini qorxudaraq təslim olmağa məcbur etmək səyləri uğursuz olacaq. Alyavns ölkələri Avropada yeni xətləri qəbul etməyəcəklər". O, Rusiyanın Alyaskada, ABŞ sərhəddində strateji bombardımançı təyyarələrin uçuşlarını 6 ay əvvəl yenidən bərpa etdiyini də söyləyib: "Bu ölkə Alyaskada, Gürcüstanda ve başqa yerlərdə "əzələ göstərirlər". Moskva bununla çox böyük riskə gedir. Rus strateji təyyarələrinin Amerika sahillərində uçmasına kimsənin ehtiyacı yoxdur". Kondaliza Raysın qənaətinə görə, Rusiya prezidenti Dmitri Medvedyev sabiq prezident, hazırkı baş nazir Vladimir Putinin kölgəsində qalır, yaxud rus ordusuna qarşı dura bilmir. Rusların Gürcüstana qısa bir zamanda girdiklərini söyləyən dövlət katibi səmimi istək olarsa, onların çıxmalarının da çox vaxt almayacağını dilə gətirib. Qeyd edək ki, Xarici İşlər Nazirləri Şurasının dünən Brüsseldə keçirilən fövqəladə iclasından əvvəl Gürcüstanın xarici işlər naziri Yekatrina Tkeşelaşvili də bəyanat verib. O bildirib ki, Tiflis Gürcüstan və Ukraynanın Alyansa üzvlüyü ilə bağlı NATO-dan birmənalı mövqe gözləyir. Alyansın baş katibinin verdiyi açıqlamadan belə qənaətə gəlmək olar ki, artıq NATO-nun qapıları Gürcüstan üçün açılıb. xalqcebhesi