ƏBU BƏKİR MƏSCİDİNDƏ PARTLAYIŞ: 2 ÖLÜ, 9 YARALI VAR Bu gün saat 21 radələrində Bakının Nərimanov rayonu ərazisində yerləşən Əbu Bəkir məscidində partlayış baş verib. Partlayış nəticəsində iki nəfər ölüb, 9 nəfər yaralanıb. Yaralılardan birinin 5 saylı şəhər xəstəxanasına, birinin isə Klinik Tibbi Mərkəzə aparaıldığı bəlli olub. Qalan yaralıların hara aparıldığı bilinmir. Əməkdaşımızın şahidlərə istinadən verdiyi məlumata görə, axşam namazı vaxtı 25-30 yaşlarında bir gənc məscidin pəncərəsindən içəri əl qumbarası atıb. Bəzi məlumatlara görə, məscidin imamı Hacı Qamət Süleymanov yüngül xəsarət alıb. Hadisə yerinə Fövqəladə Hallar Nazirliyinin xilasedici dəstələri və 2 təcili tibbi yardım maşını gəlib. Şahidlərin sözlərinə görə, partlayış baş verən zaman məsciddə 500-ə qədər adam olub. Nərimanov rayon prokurorunun müavini Rasim Qurbanov Lent.az-ın əməkdaşına bildirib ki, ən azı 2 nəfər ölüb, 9 nəfər yaralı var. Hadisə nəticəsində məscidə böyük zərər dəyməsə də, içəri divarlarda partlayışın izləri qalıb. R.Qurbanov deyib ki, hazırda hadisə yerinin ekspertizası və başqa zəruri təhqiqat tədbirləri görülür. Media orqanlarından məscidin içərisinə yalnız AzTV-nin əməkdaşları buraxılıb, lakin az sonra onlar da məsciddən uzaqlaşdırılıb. Daxili işlər nazirinin müavini Vilayət Eyvazov da hadisə yerinə gəlib. O, jurnalistlərin suallarını cavablandırmyıb. Qeyd edək ki, Əbu Bəkr vəhhabi təriqətinə mənsub şəxslərin toplaşdığı məscid kimi tanınır. Saat 23.30. Müxbirimizin verdiyi məlumata görə, DİN BMCMİ-nin rəisi, BŞBPİ-nin rəisi Rafiq Abbasov, milli təhlükəsizlik nazirinin müavini Hilal Əsədov və fövqəladə hallar nazirinin müavini Faiq Tağızadə hadisə yerinə gəliblər. Onlardan yalnız F.Tağızadə jurnalistlərin suallarına cavab verib. O deyb ki, yaralılardan ikisi evə buraxılıb, qalan 7 nəfərdən isə üçü ağır durumda olduğu üçün reanimasiyaya yerləşdiriliblər. Nazir müavini də partlayış nəticəsində 2 nəfərin öldüyünü təsdiqləyib. Saat 23.50. Əməkdaşımız xəbər verir ki, bu dəqiqələrdə daxili işlər nziri Ramil Usubov və milli təhlükəsizlik naziri Eldar mahmudov hadisə yerinə gəliblər. Nazirlərdən də heç biri mediaya açəqlama verməyib. İçəridə məscidin rəhbərliyi və başqa şahidlər hadisə ilə bağlı dindirilirlər… Əbu Bəkir məscidi bağlı elan olundu “İstintaq hərəkətlərinin aparılması zərurətindən Əbu Bəkir məscidi qeyri-müəyyən vaxtadək bağlı elan olunur”. Bu məlumatı hazırkı dəqiqələrdə hadisə yerində olan Lent.az-ın müxbirinə Nərimanov rayon prokurorunun müavini Rasim Qurbanov verib. Onun bildirdiyinə görə, bu qərarı hadisəni araşdıran istintaq qrupu verib. Əməkdaşımız xəbər verir ki, gecə saat 1 radələrində güc strukturlarının rəhbərləri hadisə yerini tərk ediblər. Onlar mediaya heç bir açıqlama verməyiblər. versiya