3-cü Pakistan-Hindistan müharibəsi? Kəşmirdə vəziyyət yenidən gərginləşdi Hindistanın Cammu və Kəşmir vilayətlərində vəziyyət yenidən gərginləşib. Bu dəfə müsəlmanlarla hindlilər arasında gərginlik hind məbədi ətrafındakı torpaq sahəsi uğrunda başlayıb. Dini icmalar arasında qarşıdurma Hindistanla Pakistan arasında münasibətləri müharibə həddinə gətirib çıxara bilər. Artıq indiyə kimi iki belə müharibə yaşanıb. Rusiyanın "Nezavisimaya qazeta" nəşrinin yaydığı məlumata görə, Hindistanın təhlükəsizlik qüvvələri komendent saatını pozaraq küçələrə çıxan müsəlmanlara qarşı silah tətbiq edib. Nəticədə altı nəfər həlak olub, onlarla şəxs isə müxtəlif dərəcəli bədən xəsarəti alıb. Polis iddia edib ki, komendant saatını nümayişçilərin Kəşmirdə müsəlman və hindlilər arasındakı xətti pozmalarından sonra tətbiq edib. Aksiya iştirakçıları sərhədçiləri və asayiş keşikçilərini daşa basıblar. Nəticədə də əsgərlər onları gülləbaran ediblər. Qarşıdurma zamanı ştatda yarıgizli fəaliyyət göstərən müsəlman təşkilatlarından birinin lideri Şeyx Əbdül Əziz də öldürülüb. Məlumata görə, onun rəhbərlik etdiyi separatçı təşkilat Kəşmirin Hindistandan ayrılmasını tələb edir. Hindistanın mərkəzi hökuməti, eləcə də müsəlmanların çoxluq təşkil etdiyi ştatın rəhbərliyi ehtiyat edir ki, ölkədə baş verən qarşıdurmaların qızğın vaxtında Pakistandakı islamçı qruplaşmalar sərhədi keçsinlər. Lakin əksəriyyət bu qənaətdədir ki, vəziyyəti normallaşdırmaq mümkün olsa belə, vadiləri və dağları ilə zəngin Kəşmir Cənubi Asiyanın ən qaynar nöqtəsi kimi qalacaq. Baş verən son hadisələr sülhün çox kövrək olduğu bu ərazidə vəziyyəti yenidən gərginləşdirə bilər. Budəfəki gərginliyə səbəb ştat rəhbərliyinin may ayının sonunda hindlilərə məxsus ibadətgaha 40 hektar torpaq sahəsi verməsi olub. Lakin bu, müsəlmanları özündən çıxarıb. Onlar bu addımın ştatın demoqrafik vəziyyətinin dəyişilməsinə yönəldiyini iddia ediblər. Bu səbəbdən də etiraz kampaniyalarına başlayıblar. Müsəlmanların çoxluq təşkil etdiyi ştat rəhbərliyi onların tələbi qarşısında geri çəkilərək, əvvəlki qərarını ləğv edib. Lakin yerli hind millətçi qruplaşmaları soydaşlarının köməyinə gəliblər. Onların çağırışı ilə hindlilər yolları bağlamaq qərarına gəliblər. Bu isə yerli kəndlilərə sərf etmir. Belə ki, məhsul yığımının qızğın vaxtıdır və əgər yollar açılmasa, onların məhsulları zay olacaq. Onlar Kəşmirin Pakistan hissəsinə getmək istəsələr də, hindli sərhədçilər onları saxlayıblar. Ekspertlər isə Kəşmirdə baş verən son hadisələrin necə başa çatacağını analiz edirlər. Rusiya Elmlər Akademiyasının Hind tədqiqatları mərkəzinin rəhbəri Tatyana Şaumyan "NQ"yə bildirib ki, qarşıdurmanın hərbi əməliyyatların başlanmasına gətirib çıxaracağı inandırıcı deyil. Belə ki, hazırda Pakistanla Hindistan arasında yüksək səviyyədə danışıqlar gedir. Tərəflər belə olan halda vəziyyətin gərginləşdirilməsini yəqin ki, istəməzlər. Lakin təxribatlar vəziyyəti gərginləşdirə bilər. Artıq belə hallar baş verib. Ötən gün Hindistanın Əhmədabad şəhərində, ardınca da Kabuldakı Hindistan səfirliyi qarşısında partlayışlar törədilib. Rusiyalı ekspert yaranmış vəziyyətin seçki ərəfəsində olan Hindistana təsirsiz ötüşməyəcəyi qənaətindədir. Onun sözlərinə görə, hindli millətçilər yaranmış vəziyyətdən yararlana bilərlər. "Müxalifətdə olan partiya seçicilərin rəğbətini qazanmaq üçün odun üzərinə yağ tökə bilər. Bu isə hökumətin yaranmış münaqişəni kompromisslər yolu ilə həll etmək imkanını heçə endirə bilər" - deyə o bildirib.?> kaspi