Rus əsgərləri jurnalistlərin düşmənidir "Rusiya təcavüzkar siyasətində heç zaman müharibənin qanun-qaydalarına riayət etməyib" Rusiyanın Gürcüstana təcavüzü başlayandan keçən bir həftə ərzində münaqişə bölgəsində 3 jurnalist öldürülüb, 12 jurnalist isə yaralanıb. İstanbuldan Cənubi Osetiyaya gedən iki türk jurnalisti isə yaralı vəziyyətdə Türkiyəyə aparılıb. "Kanaltürk"ün əməkdaşları Güray Ervinle, Levent Öztürk gürcü qoşunlarının Cənubi Osetiyadan çəkildikləri xəbərini alandan sonra, NTV-nin iki müxbiri ilə birgə Tiflisdən kirayə götürdükləri avtomobillə geri hərəkət etdiklərini, Sxinvali yaxınlığında rus əsgərlərinin atəşinə məruz qalduqlarını bildiriblər. Tural Rasimoğlu Qeyd edək ki, artıq ABŞ-dakı Jurnalistləri Müdafiə Mərkəzi də Rusiya və Gürcüstana müraciət edərək, jurnalistlərin münaqişə bölgəsində olmaq hüququnu xatırladıb. Onların təhlükəsizlik şəraitində işləməsinə şərait yaratmağa çağırıb. Hazırda Gürcüstanda olan Rusiyadakı Ekstremal Jurnalisitika Mərkəzinin rəhbəri Oleq Panfilov isə bəyanat yayıb ki, rus hərbçiləri jurnalistlərlə çox kobud davranırlar və bir neçə türk jurnalistini döyərək, onların avadanlıqlarını əllərindən alıb məhv ediblər. Rusiya-Gürcüstan müharibəsində 3 jurnalistin ölməsi və 12 jurnalistin isə yaralanması Azərbaycanın siyasət və mətbuat dairələrində naraşatçılıqla qarşılanıb. Qısa müddət ərzində bu qədər jurnalistin ölməsi və yaralanması qərəzli məqsədyönlü iş sayılır. Xüsusi qeyd olunur ki, ümumiyyətlə, müharibə həqiqətlərini dünyaya çatdıran jurnalistlər münaqişələrdə ən çox zərərçəkənlərdən sayılırlar. Yəqin ki, bölgədə baş verən həqiqətləri dünyanın diqqətinə çatdıran jurnalistlərin fəaliyyəti rus hərbi dairələrinin qəzəbinə səbəb olur. Vətəndaş və İnkişaf Partiyası sədrinin müavini Billur Hümbətov münaqişədə zamanı jurnalistlərin ölməsini təkcə onların ekstremal şəraitdə çalışmalarıyla əlaqələndirmir. Bir çox hallarda jurnalistlər rus hərbçilərinin təzyiqlərinə, işgəncələrinə məruz qalırlar: "Müharibədə ən təsirli hadisələr jurnalistlərin gülləyə tuş gəlməsidir. Yəni jurnalistlərin ölümlərinin bu qədər ajiotaj yaratmasının səbəbi odur ki, onlar fədakarlıq göstərərək baş verənləri beynəlxalq ictimaiyyətin diqqətinə çatdırırlar. Həlak olan jurnalistlər də imperialist Rusiyanın Gürcüstana hücumunu dünyaya çatdırdılar". Demokrat Partiyası sədrinin müavini Taliyət Əliyev Rusiya-Gürcüstan müharibəsində digər münaqişə zonalarında olduğu kimi təcili tibbi yardım və mətbuat nümayəndələrinin işləməsinə imkan verilmədiyini söylədi: "Bu, birinci hal deyil. Rusiya təcavüzkar siyasətində müharibənin qanun-qaydalarına riayət etməyib. 20 Yanvar hadisələri zamanı rus əsgərləri təcili yardım maşınlarına və mətbuat nümayəndələrinə atəş açıdı. Bu rus generallarının tapşırıqları idi. Çeçenistan müharibələrində də dəfələrlə jurnalistlərə atəş açılıb və humanitar yardımların çatdırılmasına əngəllər yaradılıb. Rusiya müharibənin belə qaydalarına heç vaxt əhəmiyyət vermir. Gürcüstana hücum zamanı dünya bir daha bunun əyani şahidi oldu. Moskva qəddar siyasətilə bir daha separatçı rejimləri dəstəklədiyini təsdiqlədi və dünyaya göstərdi ki, onun üçün jurnalistlərin, sadə insanların, etnik azlıqların, müstəqil dövlətlərin taleyi heç nədir". Milli İstiqlal Partiyasının (AMİP) mətbuat katibi Əli Orucov jurnalistlərə atəş açılmasının məqsədli şəkildə olduğunu deyərək, Rusiyanın müharibə qanunlarına ən çox riayət etməyən dövlət olduğunu bildirdi: "Jurnalistlərin döyüş bölgələrində həlak olması faktlarına tez-tez rast gəlirik. Baxmayaraq ki, bunun qarşısını almaq üçün müəyyən beynəlxalq konvensiyalar da qəbul olunub, amma Rusiya heç zaman bu sənədlərə əməl etmir. Çünki təcavüzkar çox hallarda öz cinayətlərini və qanlı əməllərini ört-basdır etmək üçün mediaya hücum edir ki, onları həqiqətləri dünyaya çatdırmaqdan çəkinsin, və ya ümumiyyətlə çatdırmasın". xalqcebhesi