Ukrayna da MDB-dən çıxır Qərb bütün təzyiq vasitələrini işə saldı, Rusiya isə tanklarını yenidən Tiflisə doğru yönəltdi «Ukrayna özünü MDB üzvü hesab etmir, buna görə də oradan çıxmağa ehtiyac yoxdur». Ukrayna prezidenti katibliyinin sədrinin müavini Aleksandr Şlapak belə deyib. Onun sözlərinə görə, Ukrayna baza sənədinə imza atmayıb: «Ukrayna özünü MDB üzvü hesab etmir». Xatırladaq ki, Cənubi Osetiya münaqişəsi İə bağlı olaraq Ukraynanın MDB-dən çıxacağı haqda məlumat yayılmışdı. Avqustun 12-də Gürcustan prezidenti Saakşvili ölkəsinin MDB-dən çıxdığını bəyan etdi. Ukrayna rəsmisinin bəyanatı da buna dəstək addımıdır. Onu da deyək ki, Ukpayna MDB-nin Nizamnaməsini ratifikasiya etməyib və formal baxımdan bu qurumun üzvü deyil. Rusiya Tiflisi mühasirəyə almaq istəyir Gürcüstanla Rusiya arasında atəşkəs elan olunduğu bir vaxtda «Associated Press» agentliyi sensasion məlumat yayıb. lent.az-ın xəbərinə görə, Rusiyaya məxsus hərbi texnika Tiflis istiqamətində irəliləyir. «Associated Press» əməkdaşları bildirir ki, Qori şəhərinin 10 kilometrliyində tank və zirehli transportyorlardan ibarət 60 texnikanın Tiflis istiqamətində irəlilədiyini müşahidə ediblər. Texnikanın üzərində olan rus əsgərləri əllərində Rusiya bayrağı «Tiflis, Tiflis» qışqırırmışlar. Bu xəbəri CNN də «Associated Press»ə istinadən yayıb. Daha sonra CNN rus əsgərlərinin gürcülər tərəfindən boşaldılmış hərbi bazaya tərəf yönəldiyini xəbər verib. Rusiya Silahlı Qüvvələrinin Baş Qərargah rəisinin müavini Anatoli Naqovitsın «Reuters»ə xəbəri təkzib edib. Gürcüstan prezidenti Mixail Saakaşvili isə CNN-ə müsahibəsində rusların Tiflisi mühasirəyə almaq istədiyini bildirib: «Ancaq biz öz paytaxtımızı son damla qanımıza qədər qoruyacağıq». Qeyd edək ki, günün birinci yarısında Gürcüstan prezidenti Mixail Saakaşvili rus qoşunlarının yenidən Qoriyə girməsi, evləri və mağazaları qarət etməsi haqda bəyanat verib. Milli Təhlükəsizlik Şurasının katibi Aleksandr Lomaya isə bu gün səhər rusların atəşkəsi pozaraq, Qorini bombaladığını bildirib. «Moskvanın Çeçenistanda hərbi əməliyyatlar keçirmək hüququ var idi» «Rusiya Cənubi Osetiyada öz vətəndaşlarını və sülhməramlılarını qoruyurdu». Bu barədə Rusiyanın Bakıdakı səfiri Vasili İstratov bu gün keçirdiyi mətbuat konfransında Rusiyanın Gürcüstandakı hərbi əməliyyatlarını şərh edərkən bildirib. Onun sözlərinə görə, Rusiya sülhməramlıları beynəlxalq sazişlərə əsasən Cənubi Osetiyada idilər və onlara hücum BMT Nizamnaməsinin 51-ci maddəsinə əsasən, «təcavüzdür». Rusiyanın başqa dövlət sakinlərinə vətəndaşlıq verməsinin beynəlxalq hüquqa nə dərəcədə uyğun olması barədə suala cavabda səfir RF-nin vətəndaşlıq haqqında qanununa istinad edib. «Bu qanun keçmiş SSRİ vətəndaşlarının çox hissəsinin Rusiya vətəndaşlığı almasına imkan verib», deyən səfir əlavə edib ki, elə bu əsasla Rusiya vətəndaşlığı Azərbaycan sakinlərinə də verilib. İstratov Gürcüstanın Cənubi Osetiyadakı əməliyyatları ilə Rusiyanın Çeçenistandakı hərbi əməliyyatlarının müqayisəsini düzgün saymır. Onun sözlərinə görə, Çeçenistanla bağlı orada rus qoşunlarının olmasına mane olacaq beynəlxalq sazişlər olmayıb. Cənubi Osetiyada gürcü qoşunlarının mövcudluğu bir batalyonla məhdudlaşdırılıb. Bu zaman səfir Çeçenistanda humanitar qəzanın miqyası ilə bağlı şərh verməyib. Rusiyanın Gürcüstanın MDB-dən çıxmaq çağırışı ilə bağlı Azərbaycandan hansı addımı gözlədikləri barədə suala cavabda səfir bildirib ki, «hər bir ölkə hansı beynəlxalq birliyin tərkibində olması barədə özü qərar verir». Azərbaycan MDB-dən çıxacaqmı? Hafiz Paşayev: «Hər kəs özü öz qərarını verir» «Hər ölkə özü öz qərarını verir», Azərbaycan xarici işlər nazirinin müavini Hafiz Paşayev «Turan» agentliyinə rəsmi Tiflisin MDB-dən çıxmaq haqqında qərarını və Gürcüstan prezidenti Mixail Saakaşvilinin başqa ölkələrə də eyni addımı atmaq çağırışını belə qısa şərh edib. O, Azərbaycanın Gürcüstanın ərazi bütövlüyünü dəstəklədiyini bildirib. Prezidentlər Gürcüstana Azərbaycandan keçib getdilər Litva, Ukrayna, Polşa və Estoniya prezidentləri avqustun 12-də axşam Azərbaycandan maşınlarla Tiflisə keçiblər. Rusiya aviasiyasının əməliyyatları və münaqişə zonasına yaxınlıq ilə əlaqədar onların Gürcüstana yola düşdüyü xüsusi reysin təhlükəsizlik zəmanəti yox idi. Bu səbəbdən təyyarəni Azərbaycanın Gəncə şəhərində aeroporta endirmək və oradan Tiflisədək yolu maşınlarla davam etdirmək qərara alınıb. Abxaziya və Cənubi Osetiyanın statusu müzakirə edilməyəcək Saakaşvili: «Gürcüstanın ərazi bütövlüyü dəyişməz prinsipdir və bu mövzu üzrə diskussiyalar aparmaq zərurəti yoxdur» Tiflisə gələn Fransa prezidenti Nikolya Sarkozi dünən səhər keçirilən brifinqdə bildirib ki, Gürcüstan hakimiyyəti dünən Moskvada qəbul edilmiş nizamlama prinsipləri ilə razıdır. «Mixail Saakaşvili ilə görüş zamanı mətnə müəyyən dəyişikliklər edilib», deyə Sarkozi bildirib. Aİ XİN rəhbərləri bu sənədi təqdir etdikdən sonra sənəd məcburi hüquqi qüvvəsi olan qətnamə şəklində tərtib ediləcək. O bildirib ki, sənədə edilən dəyişikliklər xüsusilə ona aiddir ki, sənəddən Abxaziya və Cənubi Osetiyanın gələcək siyasi statusunun beynəlxalq müzakirəsi haqqında sözlər çıxarılıb və Gürcüstanın bu regionlarında sabitlik və təhlükəsizliyin təmin edilməsi məqsədilə beynəlxalq danışıqlar xüsusi vurğulanıb». Mixail Saakaşvili, öz növbəsində, atəşkəs haqqında razılıq əldə olunmasından məmnunluğunu bildirib və Cənubi Osetiya münaqişə zonasında təhlükəsizliyin təmin edilməsi prosesinin beynəlmiləlləşdirilməsi zərurətini qeyd edib. O qeyd edib ki, sənədin ilkin mətnindən Abxaziya və Cənubi Osetiyanın statusunun beynəlxalq müzakirəsi məsələləri razılaşdırılaraq çıxarılıb, belə ki, Gürcüstanın ərazi bütövlüyü dəyişməz prinsipdir və bu mövzu üzrə diskussiyalar aparmaq zərurəti yoxdur»(«Turan»). Böhranın çözülməsinə dair razılaşdırılmış prinsiplər aşağıdakılardan ibarətdir: - güc işlədilməməsi, - hərbi əməliyyatların dayandırılması, - hümanitar yardımın maneəsiz çatdırılması, - Gürcüstan silahlı qüvvələrinin daimi yerləşmə yerlərinə qayıtması, - Rusiya qoşunlarının hərbi əməliyyatlara qədər mövqelərə çəkilməsi. Kondoliza Rays: «Rusiya Gürcüstana qarşı müharibəyə görə ciddi ziyana düşəcək» «Rusiyanın etibarı Gürcüstana qarşı hərbi əməliyyatlara görə ciddi sarsılacaq». Bu barədə ABC telekanalına müsahibəsində ABŞ dövlət katibi Kondoliza Rays bildirib. «Mən ümid edirəm ki, Rusiya dayanacaq və etdiklərinə diqqətlə baxacaq», deyə Rays bildirib. Onun sözlərinə görə, Moskva dünya ictimaiyyətinin bir hissəsi olmaq qabiliyyətini xeyli itirib. ABŞ prezidenti, vitse prezidenti və dövlət katibi tərəfindən kəskin tənqidlərdən başqa, Qərbdə Rusiya üçün həyəcan siqnalları meydana gəlib. Belə ki, bir çox diplomatlar bildirirlər ki, Rusiyanı «Böyük Səkkizlik»dən çıxarmaq lazımdır. Rusiyanın ÜTT-yə qəbulu prosesini dayandırmağa israrlı çağırışlar da səslənir. NATO baş katibi Yaap de Hoop Sxeffer bildirib ki, Rusiyanın Gürcüstanla münaqişəsi nəticəsiz ötüşməyəcək. ABŞ isə dünən FRUKUS beynəlxalq hərbi-dəniz təlimlərini təxirə salıb. Bu təlimlərdə Rusiya da iştirak etməli idi. Respublikaçılar partiyasından ABŞ prezidentliyinə namizəd Jon Makkeyn qələbə qazanacağı təqdirdə Gürcüstanın NATO-ya qəbulunu dəstəkləməyi vəd edib. «Bizim Gürcüstan xalqına zəruri köməyi göstərmək imkanımız yoxdur», deyən Makkeyn Gürcüstan NATO üzvü olsaydı, münaqişəyə hərbi müdaxilənin mümkün ola biləcəyinə işarə edib. Öz növbəsində, Gürcüstanın NATO-da daimi nümayəndəsi Revaz Beşidze Alyansı Gürcüstana hərbi yardım göstərməyə çağırıb. İlk öncə bombardman nəticəsində dağıdılmış radar sistemini bərpa etmək lazımdır. Eyni zamanda, Gürcüstan beynəlxalq partnyorlarla danışıqlarda iştirak etmək üçün NATO-nun yüksək vəzifəli nümayəndəsinin Tiflisə göndərilməsini xahiş edir. Gürcüstanda üç jurnalist ölüb, 12-si yaralanıb Rusiya ilə Gürcüstan arasında silahlı qarşıdurmanın başlamasından keçən bir həftədə münaqişə bölgəsində üç jurnalist öldürülüb, 12 jurnalist isə yaralanıb. Öldürülənlər Gürcüstanın yeganə foto informasiya agentliyi «Caucasus Press Images»in rəhbəri və eyni zamanda Rusiyanın İTAR-TASS Agentliyi ilə əməkdaşlıq edən Aleksandr Klimçuk, «Russian Newsweek» jurnalı ilə əməkdaşlıq edən gürcü jurnalist Qriqol Çikladze və Hollandiyanın «RTL News» telekanalının əməkdaşı Stan Storimansdır. Gürcü jurnalistlər Cənubi Osetiyaya - münaqişə bölgəsinə girmək istəyərkən öldürülüblər. Hollandiyalı jurnalist isə Gürcüstanın Qori şəhəri bombalanarkən həlak olub. Yaralananlar isə Rusiyadan, Gürcüstandan, Türkiyədən, İsraildən, Yunanıstandan olan jurnalistlərdir. Moskvadakı «Expert» adlı sayt isə özünün iki jurnalistinin - Vyaçeslav Koçetkov və İqor Naidenovun itkin düşdüyünü xəbər verib. Ermənistandan Gürcüstana gələndən bəri onlarla əlaqə kəsilib. Ərdoğan Rusiyaya, oradan isə Gürcüstana gedəcək Türkiyənin baş naziri Rəcəb Tayyib Ərdoğan Moskvaya gedir. lent.az-ın Türkiyə mətbuatına istinadən xəbərinə görə, bu barədə baş nazirin mətbuat xidməti açıqlama yayıb. Ərdoğan Moskvada Rusiyanın baş naziri Vladimir Putinlə görüşəcək. Sabah isə Türkiyənin baş naziri Tiflisə gedərək, Gürcüstan prezidenti Mixail Saakaşvili ilə görüş keçirəcək. Görüşlərdə iki ölkə arasında yaranmış münaqişənin həlli yolları müzakirə olunacaq. Səfər zamanı Ərdoğanı xarici işlər naziri Əli Babacan müşayiət edəcək. bizimyol