"Azərbaycanda milli azlıqlarla bağlı problem mövcud deyil" Qənirə Paşayeva: "Ölkədə nə dini, nə də milli zəmində problem yoxdur" Azərbaycanın Avropa Şurası (AŞ) qarşısında götürdüyü öhdəliklər sırasında milli azlıqların dillərinin qorunması barədə konvensiyanın ratifikasiya edilməsi və "Alternativ xidmət haqqında" qanunun qəbulu məsələləri var. Bəs belə bir konvensiyanın ratifikasiya edilməsi nə dərəcədə məqbuldur? Azərbaycanın AŞ Parlament Assambleyasındakı (PA) nümayəndə heyətinin üzvü Qənirə Paşayeva deyir ki, Azərbaycanda nə dini, nə milli, nə etnik zəmində hansısa bir problem var. Azərbaycanda dini baxışlarına, milli mənsubiyyətinə görə heç kimə ayrı-seçkilik, fərq qoyulmur və dini, milli zəmində tam tolerantlıq mühiti mövcuddur. Rəvan Məmmədli Ümumiyyətlə, Azərbaycanda milli azlıqlarla bağlı problem mövcud deyil. Bu ölkədə hamı bərabərhüquqlu vətəndaşı kimi yaşayır, yaradır öz mövcudluğunu, adət-ənənələrini qoruyub saxlayır. Hər kəs Azərbaycanın bərabərhüquqlu vətəndaşı olduğuna görə Konstitusiyayla, qanunlarla təsbit edilən bütün haqlardan eyni səviyyədə istifadə edir, yararlanır. Hətta istər AŞ, istər digər beynəlxalq təşkilatlar Azərbaycanın dini, etnik baxımdan tolerant bir ölkə və bu ölkənin bir sıra digər ölkələrə bu yöndə nümunə, örnək olduğunu etiraf edirlər. İndiyə qədər bu zəmində heç bir qarşıdurma, problem olmayıb. Onun sözlərinə görə, çox təəssüflər olsun ki, Azərbaycanı istəməyən kənar, maraqlı qüvvələr var və bu problemi, məsələni Azərbayanın içərisinə gətirmək, burada problem, qarşıdurma yaratmaq istəyirlər: "Bu qüvvələrə imkan verməməliyik ki, bu kimi məsələləri Azərbaycana daşıyıb gətirə bilsinlər. Biz bu cür qüvvələrə heç cür imkan, fərsət tanıtmamalıyıq". AŞ PA-dakı nümayəndə heyətimizin üzvü söhbətin bəzi mətbuat orqanlarında iddia edildiyi kimi, "Milli azlıqlar haqqında" hansısa qanunun qəbul edilməsi, bununla bağlı hansısa öhdəliyin götürülməsindən getmədiyini də bildirdi. Belə bir öhdəlik yoxdur və ola da bilməz. Söhbət sadəcə, milli azlıqların dilinin qorunması haqqında konvensiyanın ratifikasiya edilməsindən gedir. Qənirə Paşayeva onu da dedi ki, bu gün Avropa Şurasının üzvü olan, ümumiyyətlə, Avropanın ən demokratik, ən qabaqcıl dövlətlərindən sayılan bir neçə ölkəsi bu konvensiyanı hələ də ratifikasiya etməyib. Məsələn, Fransanın adını çəkmək olar: "Ümumiyyətlə, Avropa Şurasının əksər üzvləri indiyə kimi bu konvensiyanı ratifikasiya etməkdən imtina edirlər. Düzdür, Azərbaycan Avropa Şurası qarşısında götürdüyü bütün öhdəlikləri yerinə yetirməyə çalışır və demək olar ki, bu öhdəliklərin böyük əksəriyyətini tam uğurla yerinə yetirib. Ancaq bu heç də o demək deyil ki, biz bu konvensiyanı mütləq ratifikasiya etməliyik. Bir daha qeyd edirəm ki, Azərbaycanda nə milli, nə dini zəmində, nə də milli azlıqların dillərinin qorunması sahəsində problem var. Elə bir problem tarixən müvcud olmayıb və ola da bilməz. İkincisi, Avropanın ən inkişaf etmiş, ən demokratik dövlətləri sayılan ölkələr, konkret olaraq, Fransa belə bir konvensiyanı ratifikasiya etməyibsə, onu nəyə görə biz təsdiq etməliyik? Şəxsən mənə elə gəlir ki, belə bir konvensiyanın ratifikasiya edilməsinə zəruri ehtiyac yoxdur. Bu ölkə hamımızındır, hər bir Azərbaycan vətəndaşınındır və inanmıram ki, özünü azərbaycanlı, vətəndaş sayan hər hansı bir şəxs bu ölkədə kənar qüvvələrin təsirilə milli, dini, etnik zəmində hansısa problemin, qarşıdurmanın yaranmasına imkan versin. Azərbaycan dini, etnik, milli tolerantlıq səviyyəsinə görə ən azı ətrafındakı dövlətlərə və eləcə də bir sıra qabaqcıl dünya, Avropa ölkələrinə çox gözəl bir nümunədir". Azərbaycan cəmiyyətində birmənalı qarşılanmayan "Alternativ xidmət haqqında" qanunun qəbuluna gəlincə, Qənirə Paşayeva dedi ki, bu gün ölkəmiz Ermənistanın təcavüzünə məruz qalıb. Torpaqlarımızın 20 faizindən çoxu ermənilərin işğalı altındadır. Bir milyondan artıq qaçqın, köçkünümüz var. Ölkəmiz hələ də müharibə vəziyyətindədir: "Belə olan vəziyyətdə Azərbaycanın bu cür öhdəliyi yerinə yetirməsi və qanunu qəbul etməsi nə dərəcədə düzgündür? Şəxsən mən indiki vəziyyətdə belə bir qanunun qəbul edilməsinin tamamilə əleyhinəyəm. Açığını desəm, mən bu qanunun gələcəkdə də qəbuluna tərəfdar deyiləm. Qoy, bizi başqalarıyla eyniləşdirməsinlər, bərabər tutmasınlar və səhv salmasınlar. Azərbaycanı bu məsələdə Avropa Şurasının üzvü olan başqa ölkələrlə müqayisə etmək olmaz". Millət vəkili bu gün Almaniyanın, Fransanın, Danimarkanın, Avropa Şurasının üzvü olan əksər dövlətlərin Azərbaycan kimi işğal olunmuş ərazilər, ərazi bütövlüyü problemi olmadığını söylədi. Azərbaycan işğaldan əziyyət çəkən bir ölkədir, həm də işğalın səbəbkarı elə həmin AŞ-ın bərabərhüquqlu üzvü olan Ermənistandır: "Ona görə də müharibə başa çatmayana, öz ədalətli həllini tapmayana, torpaqlarımız işğaldan qurtarmayana qədər belə bir qanunu qəbul etmək heç cür mümkün deyil. Eyni zamanda, mənim bildiyim qədər bu qanun üzərində iş gedir, o ekspertizadadır və həmin işlər, ekspertiza başa çatdıqdan sonra qanun layihəsinin parlamentin gələcək sessiyalarından birinin müzakirələrinə çıxarılması gözlənilir. Biz də, bir millət vəkili olaraq, bu qanun layihəsini gözləyirik. Onunla daha müfəssəl tanış olmaq istəyirik. Yəni, bu tanışlıqdan sonra qanun layihəsi ilə bağlı daha konkret fikir söyləmək mümkündür. Ancaq bununla belə, mən yenə də indiki məqamda belə bir qanunun qəbulunun qəti əleyhinəyəm və o parlament müzakirələrinə çıxarılarsa, yəqin ki, bu müzakirələr çox gərgin keçəcək və mən şəxsən onun əleyhinə səs verəcəm". Belə fikirlər də səslənir ki, həmin qanunun qəbulu gələcəkdə həm də ölkədə missionerlik fəaliyyətinin güclənməsinə, ölkəmizin milli maraqlarına təhlükə yaranmasına gətirib çıxara bilər. Qənirə Paşayevaya görə, bu cür fikirlər də əsassız deyil. Məsələn, bəzi dini icmalar, sektalar, təriqətlər - xüsusilə də Azərbaycanın maraqlarına zidd olan dini cərəyanlar ələ silah götürməni, müharibədə iştirakı yasaq edirlər. Bu baxımdan bir çoxları hərbi xidmətdən, ordudan, müharibədən yayınmaq üçün həmin zərərli dini cərəyanlara üz tuta bilərlər. Ümumiyyətlə, bu qanununun qəbulu hərbi xidmətdən, ordudan yayınmada bir "münbit şərait", "baza" rolunu oynaya bilər: "Bu isə bizim üçün hər bir halda arzuolunan deyil. Odur ki, mən əvvəldən belə bir qanunun qəbulunun əleyhdarlarından olmuşam və bu gün də öz mövqeyimdə qalıram. Eyni zamanda inanmıram ki, Azərbaycan parlamenti gələcəkdə Azərbaycanın maraqlarına zidd ola biləcək məqamların əks olunduğu bir qanun layihəsini qəbul etsin". xalqcebhesi