Rusiyanın təcavüzkarlığı bütün dünya üçün təhlükədir BAXCP İdarə Heyəti Gürcüstanda baş verən qanlı olaylarla bağlı bəyanat yaydı "Baş verənlər qarşımızda duran ən strateji məsələnin məhz müdafiə imkanlarımızın gücləndirilməsi olduğunu təsdiqləyir" Dünən Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti toplantısı keçirilib. Toplantıda qərarların icrası, ictimai-siyasi vəziyyət və təşkilati məsələlər müzakirə olunub. İdarə Heyətinin diqqət yetirdiyi ilk məsələ BAXCP sədri Qüdrət Həsənquliyevin Azərbaycan Respublikasının prezidentliyinə namizədliyinin müdafiəsi üçün seçici imzalarının toplanılmasıyla bağlı olub. BAXCP-nin Seçki Qəragahından verilən məlumata görə, seçici imzalarının Seçki Məcəlləsinin tələblərinə uyğun və operativ şəkildə toplanılması üçün partiyanın bütün rayon və şəhər təşkilatları imza vərəqələri, müvafiq təlimatlar, həmçinin digər yardımçı sənədlərlə təmin ediliblər. Murad Qeyd olunub ki, öncədən hazırlanmış plan əsasında imzatoplama kampaniyasının ölkə ərazisində mövcud olan bütün seçki dairələrini əhatə etməsi nəzərdə tutulub və bu istiqamətdə fəaliyyətə başlanılıb. Müzakirələr zamanı BAXCP-nin baş katibi, Ali Məclis sədri, müvafiq sahələr üzrə katiblər seçki kampaniyasının daha uğurlu həyata keçirilməsilə bağlı təkliflərini irəli sürüblər. BAXCP sədri Qüdrət Həsənquliyev bir daha partiyanın seçki strategiyasının əsas məqamlarını İdarə Heyəti üzvlərinin nəzərinə çatdırıb. İdarə Heyətinin müzakirəsinə çıxarılan digər məsələ Rusiyanın öz ərazi bütövlüyünü təmin etməyə cəhd göstərən Gürcüstan Respublikasına qarşı aqressiv siyasəti və açıq təcavüzü ilə bağlı olub. Bununla bağlı qəbul olunan bəyanatda deyilir: "Bütöv Azərbaycan Xalq Cəbhəsi Partiyası Rusiyanın Gürcüstana təcavüzünü kəskin şəkildə pisləyir və işğalçı qoşunların suveren dövlətin beynəlxalq hüquq tərəfindən tanınan ərazilərindən çıxarılmasını tələb edir. Rusiyanın öz ərazi bütövlüyünün təmin olunması üçün BMT Nizamnaməsinin və beynəlxalq hüququn təməl prinsiplərindən istifadə edərək, qeyri-qanuni və təcavüzkar hərbi birləşmələrə qarşı əməliyyatlara başlayan Gürcüstan Respublikasına təcavüzü sübuta yetirir ki, postsovet məkanında mövcud olan bütün münaqişə ocaqları məhz Moskva tərəfindən yaradılıb. Kremlin təcavüzkar siyasəti isə təkcə Cənubi Qafqaz, yaxud MDB məkanı üçün deyil, bütün dünyada sülhün və əminamanlığın qorunmasına təhlükə yaradır. Rusiyanın hərbi aqressiyasına münasibətdə BMT Təhlükəsizlik Şurası üzvlərinin qətiyyətsiz və gözləmə mövqeyi nümayiş etdirməsi isə bir daha bu qurumun nüfuzunun heçə endirildiyini və geosiyasi maraqların uzlaşdırıldığı məkana çevrildiyini sübuta yetirir". BAXCP hesab edir ki, Rusiyanın Gürcüstanda qabarıq şəkildə nəzərə çarpan təcavüzkar siyasəti postsovet məkanının müstəqil siyasət yolunu seçmiş bütün dövlətlərini, o cumlədən Azərbaycanı da ciddi düşündürməlidir. Ölkənin müdafiə qabiliyyəti möhkəmləndirilməli, peşəkar ordu quruculuğu prosesində təxirəsalınmaz addımlar atılmalı, silahlı qüvvələrin ən müasir hərbi texnika və silah-sursatla təmin olunması üçün müvafiq tədbirlər planı hazırlanaraq həyata keçirilməlidir: "Baş verənlər qarşımızda duran ən strateji məsələnin məhz müdafiə imkanlarımızın gücləndirilməsilə bağlı olduğunu təsdiqləyir. Bu baxımdan ölkənin hərbi büdcəsi bir neçə artırılmalı, Azərbaycan özünə güclü müttəfiqlər tapmalı, qardaş Türkiyənin də təmsil olunduğu hərbi-siyasi bloka - NATO-ya inteqrasiya istiqamətində qətiyyətli addımlar atmalıdır". Son olaraq, BAXCP Azərbaycan hökumətini Gürcüstanın haqlı mövqeyinin müdafiəsi davam etdirməyə çağırıb. xalqcebhesi