PAKİSTANDA MÜXALİFƏT PREZİDENTƏ QARŞI İMPİÇMENT ELAN EDİR Pərviz Müşərrəf Pekinə səfərini təxirə saldı Pakistanda müxalifət partiyalarının koalisiyası prezident Pərviz Müşərrəfə qarşı impiçment barədə razılığa gəlib. Razılığa görə, koalisiya gələn həftə parlamentə müraciət edəcək. Pakistanın İnformasiya Nazirliyindən verilən məlumata görə, koalisiya liderləri impiçment barədə təklifin layihəsini avqustun 7-də tam təsdiqləyəcəklər. Pakistanda keçirilən son parlament seçkilərində müxalifət qalib gəlib və iqtidar partiyası sarsıdıcı məğlubiyyətə uğrayıb. İki iri müxalifət partiyası - sabiq baş nazir Nəvaz Şərifin başçılıq etdiyi Pakistan Müsəlman Liqası və mərhum Bənazir Bhuttonun Xalq Partiyası səslərin təxminən üçdə ikisini toplayıblar. Onların səsləri prezidentə qarşı impiçment təşəbbüsü qaldırmağa imkan verir. Müşərrəfin səlahiyyətlərinə isə Ali Məhkəmə xitam verə bilər. Bildirilir ki, prezident Müşərrəf ölkədə yaranmış vəziyyətlə bağlı Çində keçirilən Olimpiya oyunlarının açılış mərasminə qatılmaq planlarından imtina edib. BUŞ QONAQ GETMƏZDƏN ƏVVƏL ÇİNİ TƏNQİD ETDİ ABŞ prezidenti Corc Buş Çində keçirilən Yay Olimpiya Oyunlarına yollanmazdan əvvəl Pekini öz xalqına daha böyük azadlıqlar verməyə çağırıb. O deyib ki, Çin yalnız bu yolla özünün tam potensialına yetişə bilər. Bu, prezident Buşun Asiyaya son səfəridir və buna görə də onun çağırışı bir növ vidasayağı səslənib. Buş Asiyanın bu regionundakı iqtisadi inkişafı təqdir edib və buradakı bir sıra hökumətlərlə Amerika arasındakı fikir ixtilaflarını malalamağa çalışıb. Lakin Buş ən güclü tənqidi Çinə münasibətdə işə salıb. Bununla belə, müşahidəçilər Buşun bu çıxışının insan haqlarına dair əvvəlki çıxışlarından xeyli zəif olduğu qənaətindədirlər. Digər tərəfdən çıxışın Tailandda edilməsi, Buşu eyni tənqidi qonaq getdiyi Çində səsləndirmək narahatlığından azad edib. Çünki o Pekində Çin rəhbərliyini insan haqlarına görə tənqid etməyə çətin ki, risk edərdi. BİN LADENİN SÜRÜCÜSÜNƏ ÖMÜRLÜK HƏBS CƏZASI VERİLDİ Quantanamoda ABŞ hərbi qüvvələrinin zabitlərindən ibarət münsiflər məhkəməsi “əl-Qaidə” lideri Üsəma bin Ladenin keçmiş sürücüsü Səlim Həmdanı terrorizmə dəstək verməkdə günahkar tanıyıb. Qərar ABŞ-ın Kubada Quantanamoda hərbi bazasında saxlanılan məhbuslar üzərində başa çatan ilk məhkəmə prosesindən sonra elan edilib. Məlumata görə, Həmdan ömürlük həbs cəzasına məhkum olunub. ÿAğ Ev bildirib ki, Həmdanın hərbi məhkəməsi ədalətli keçib. Ağ Evin mətbuat katibi Toni Fratto bildirib ki, Həmdana özünü müdaifə etmək imkanı verilib. ÿİki həftə sürən məhkəmə zamanı prokurorlar Həmdanın əl-Qaidənin fəal üzvü olaraq, terror qruplarına silah çatdırdığını və bin Ladeni qorumağa kömək etdiyini bildiriblər. Lakin müdafiə tərəfi yəmənli Həmdanın “əl-Qaidə” üzvü olmadığını bildirib. Həmdan 2002-ci ildə həbsxana açıldıqdan sonra Quantanamoda məhkəməsi keçirilən ilk məhbusdur. O, ifadəsində deyib ki, bin Ladendən sürücü kimi ayda cəmi 300 dollar maaş alıb və terror hücumlarında iştirak etməyib. Lakin Amerika hərbçiləri Həmdan həbs edilərkən onun avtomobilində daşınan zenit raket qurğusu aşkar ediblər. Siyasət şöbəsi musavat