“MİNSK QRUPUNUN TƏKLİFLƏR PAKETİ ZİBİL QUTUSUDUR” Vəfa Quluzadə: “Metyu Brayza söz-söhbət xətrinə ağlına gələni danışır” Azərbaycanla Ermənistan arasındakı münaqişənin həllində vasitəçilik missiyasını yerinə yetirən ATƏT-in Minsk Qrupunun amerikalı həmsədri Metyu Brayza artıq neçənci dəfədir ki, Qarabağ məsələsi ilə bağlı səsləndirdiyi fikirləri təkzib edərək açıqlamalarının təhrif edildiyini bildirib. Sonuncu dəfə də həmçinin. Amma burada maraqlı bir məqam da ortaya çıxır. Metyu Brayza verdiyi açıqlamanı təkzib etsə də bir müddət sonra onun dediklərinin həqiqət olduğu meydana çıxır. Metyu Brayzanın səsləndirdiyi fikirləri absurd adlandıranlar da var, onun açıqlamalarının hər iki dövlət arasında münaqişənin həlli istiqamətində öncədən atılan addım kimi qiymətləndirənlər də. Mövzu ətrafında söhbət etdiyimiz politoloq Vəfa Quluzadə öncə ortada ciddi müzakirələrin olmadığını nəzərə çatdırdı. Müsahibimiz Dağlıq Qarabağ məsələsinin həllində həmsədrlərin heç bir təsir gücünün olmadığını qeyd etməklə yanaşı həlledici tərəflərin Azərbaycan və Ermənistan olduğunu vurğuladı: “Məsələ ondan ibarətdir ki, Metyu Brayza söz-söhbət xətrinə ağlına gələni danışır. Əgər amerikalı həmsədr də bunları deməsə, ümumiyyətlə, ortada danışmağa heç nə olmaz. Amma Metyu Brayza sonuncu açıqlamalarında çox ağıllı bir fikir söylədi. Dedi ki, bizim min cür təkliflərimiz ola bilər, amma o təkliflərdən heç nə asılı deyil. Bu da o deməkdir ki, təkliflərə gərək tərəflər razılıq versin. Əgər həmsədrlərin üçü də bir yerə yığışıb tələb etsələr ki ermənilərin hamısı Dağlıq Qarabağdan və işğal edilmiş 7 rayondan çıxmalıdır, ermənilər yenə çıxmayacaqlar. Çünki ermənilərə əmr verən həmsədrlər deyil, Moskvadır. Həmsədrlərin ermənilərə təsir etmək mexanizmi yoxdur. Həmsədrlərin təmsil etdikləri dövlətlər hansılardır? Biri Rusiyadır. Azərbaycan torpaqlarını işğal etmək məqsədilə Ermənistanı Rusiya silahlandırıb. Digəri Fransadır. Fransanın Dağlıq Qarabağ məsələsinə danışıqlardan başqa heç bir təsiri yoxdur. Fransa sadəcə olaraq siyasi arenada mövcud olduğunu nümayiş etdirməklə məşğuldur. Digəri isə Amerika Birləşmiş Ştatlarıdır. Bunlar arasında prioritet Rusiya və onunla olan əlaqələrdir. Ona görə də ABŞ da Qarabağ məsələsində irəliyə doğru bir addım atmağa tələsmir. Məsələnin mahiyyəti bundan ibarətdir”. V.Quluzadə Metyu Brayzanın bütün səhvlərinin Ermənistanın xeyrinə yönəldiyini söylədi: “Amma onun özünün də dediyi kimi, Minsk Qrupu həmsədrlərinin danışıqlarının heç bir əhəmiyyəti yoxdur. Minsk Qrupu xalaxətrin qalmasın deyə hər iki tərəfin könlündən nə keçirsə, ”götür, sənin malındır" deyir. Yəni ki, ay Azərbaycan, ərazi bütövlüyü istəyirsənsə, həmin paketə bunu daxil edin. Ay ermənilər, müqəddəratınızı təyin etmək hüququnu istəyirsinizsə, bunu da ora yazın. Bir sözlə, Minsk Qrupunun təkliflər paketi zibil qutusudur”. Leyla İLQAR