Mixail Zabelinin növbəti səhvi Fəzail İrahimli: "İkinci bir dilə dövlət dili statusu verilməsi absurddur" Azərbaycandakı rus icmasının rəhbəri, millət vəkili Mixail Zabelin yenə də danışıb. O hesab edir ki, rus dili Azərbaycanda ikinci dövlət dili, yaxud heç olmazsa, millətlərarası ünsiyyət dili kimi qəbul olunmalıdır. O, indi mümkünsüz görünsə də, gələcəkdə belə bir referendumun keçirilməsinə çalışacaqlarına işarə edib: "Referendum Milli Məclis, ya da vətəndaşların böyük bir qrupu bunu istəyən zaman keçirilə bilər. Yaxşı başa düşürəm ki, bu, indi mümkün deyil". Qeyd edək ki, Azərbaycan telekanallarında rus dilində proqram və verilişlərin dayandırılması barədə Milli Televiziya və Radio Şurası qərar verdiyi dönmdə də Mixail Zabelin açıq rusiyapərəst mövqe sərgiləyib. Ramiz Mikayıloğlu O, Azərbaycan telekanallarının və dilimizdə aparılan proqramları, verilişləri aşağılayan fikirlər dilə gətirib, rus dilinə qadağanın yolverilməz olduğunu söyləyib. Bu da azmış kimi iddia edib ki, Azərbaycandakı azsaylı xalqlar yalnız rus dilində başa düşür və telekanallarda rus dilinə qadağa onların da hüquqlarını pozmaq anlamına gələcək. Məsələylə bağlı fikirlərini öyrəndimiz tarixçi professor Fəzail İbrahimli deyir ki, dünyanın heç yerində bu xarakterli söhbətlər olmur. Məsələn, İngiltərədə ingilis dili dövlət dilidir və həmin ölkədə yaşayan insanlar da o dildə təhsil alır, oxuyurlar. Ölkəmizdə də Azərbaycan dili rəsmi dövlət dilidir. Azərbaycanda yaşayan digər xalqlar üçün də şərait yaradılıb. O cümlədən ingilis, türk, rus dilində təhsil var. Yəni Azərbaycan bu baxımdan dünyaya nümunə bir ölkədir. Onun sözlərinə görə, ikinci bir dilə dövlət dili statusu verilməsi absurddur. Digər tərəfdən, hər hansı dillə bağlı referendum keçirilirsə, həmin dildə danışan insanların rəyi nəzərə alınır: "Azərbaycanda belə insanların sayının neçə faiz olduğunu mən bilmirəm. İkincisi, biz bu məsələlərdə həddindən artıq ifrata varmış oluruq. Məsələn, keçən əsrin 20-ci illərində bolşevik hökuməti gələndən sonra dilimiz unuduldu, ancaq rus dilinə keçildi. Hətta o zaman Talıblı qurultayda çıxış edərkən deyib ki, Azərbaycan dili dövlət dili deyilsə, bu dövlət necə müstəqil ola bilər? Təsəvvür edin ki, bu sözlər keçən əsrin 20-ci illərində deyilib. Sovet Azərbaycanında dilimiz rəsmi dövlət dili olsa da, qeyri-rəsmi rus dili əsas oldu. İdarələrə, müəssisələrə yalnız rus dilli insanları götürürdülər". Tarixçi professor vurğuladı ki, indi müstəqillik dövrüdür, ancaq gənclərimiz hansı yerə iş üçün gedirlərsə, ingilis dilini bilib-bilmədikləri soruşulur: "Artıq rəsmi status verilmədən ingilis dili Azərbaycan dilini çiyinləyib. Bu cür məsələlər haqqında düşünmək lazımdır. İnsan müstəqildir, hansı dildə, hansı ölkədə istəsə, təhsil ala bilər. Ancaq dünyanın heç bir yerində paralel iki dil dövlət dili deyil. Bir dövlətin bir rəsmi dili olur". xalqcebhesi