Həmsədrlərin söz oyunu yekunlaşmır "Minsk qrupunun tərkibi dəyişdirilməlidir" Bir iki gün əvvəl Dağlıq Qarabağın statusunun müəyyənləşdirilməsi üçün referendumun keçirilməsinin vacibldiyini bəyanlayan, bununla da Azərbaycan ictimaiyyətinin narahatçılığına səbəb olan ATƏT-in Minsk qrupunun amerikalı həmsədri Metyu Brayza növbəti dəfə sözlərinin təhrif olunduğunu bildirdi. Tural Mütəxəssislərin fikrincə, zaman-zaman öz maraqlarına uyğun bəyantlar verən, sonra isə fikirlərinin təhrif olunduğunu açıqlayan həmsədrlərin söz oyunu yekunlaşmalıdır. Siyasi şərhçi Aydın Quliyev Minsk qrupu həmsədrlərinin tərkibinin dəyişdirilməsini zəruri sayır: "Həmsədrlərin ziddiyyətli bəyanatlarına həmişə rast gəlinib. Belə yanlış bəyanatlar, nə də onun sonradan təhrif olunmasının bildirilməsi və ya hansısa düzəlişin verilməsi Qarabağ probleminin həllinə faktiki olaraq heç bir təsir göstərmir". Ekspertin sözlərinə görə, bu cür ziddiyyətli vəziyyətlər daha çox ondan irəli gəlir ki, danışıqlar masasında konkret olaraq heç bir razılaşma yoxdur: "Ola bilər ki, hansısa prinsipləri özündə əks etdirən sənəd var və hər görüşdə bu sənədin bu və digər maddəsi ətrafında danışıqlar gedir. Amma məsələ burasındadır ki, həmsədrlərin Bakı və İrəvan nümayəndələrilə konkret razılaşmanı ifadə edən bir orta mövqeyi olmadığından, insanlar qarşısına çıxanda hər kəs öz başa düşdüyünü və bildiyini danışır. Nəticədə də bu cür ziddiyyətli vəziyyət əmələ gəlir". Ekspertin fikrincə, nə qədər ki, danışıqlar zamanı konkret prinsiplər üzrə razılıq əldə olunmayacaq, bu cür vəziyyətlərin hələ çox şahidi olacağıq. Belə vəziyyəti aradan qaldırmağın əsas yolu isə ATƏT-in Minsk qrupu həmsədrlərinin ölkələri qarşısında tələb qoymaq lazımdır ki, bu diplomatlar ya danışıqlar prosesinin yaxın perspektivdə mümkün nəticələri barədə konkret mövqe ortaya qoysunlar, ya da istefa versinlər və onlar yeni diplomatlarla əvəzlənsinlər. Fransanın Avropa Birliyilə əvəzlənməsinin real göründüyünü deyən ekspert bunun artıq Minsk qrupu formatının dəyişilməsi anlamı verəcəyini söylədi. Çünki Minsk qrupunun tərkibi on üç dövlətdən və üç həmsədr ölkədən ibarətdir. Əgər hansısa bir beynəlxalq təşkilat prosesə qoşulursa, bu 1992-ci ildə BMT TŞ-də təsdiqlənmiş ATƏT-in Minsk qrupu formatının dəyişilməsi demək olacaq: "14 il ərzində həmsədrlər ortaya ciddi bir nəticə qoya bilmədi. Əksinə, digər narahatlıq doğuran məqamlar ortaya çıxıb. Minsk qrupunun tərkibində guya Dağlıq Qarabağ probleminin həlli missiyasını öz üzərinə götürmüş ölkələrdən biri də Belarusdur. Bu gün Belarus faktiki olaraq bütün sivil dünyaya müharibə elan edib. Bu ölkənin dövlət başçısı başda olmaqla, bir sıra dövlət xadimlərinin də Avropa və ABŞ-a gediş-gəlişilə bağlı viza qadağası qoyulub. Nə qədər məntiqlidir ki, Qarabağ kimi beynəlxalq bir miqyas almış problemin həlli prosesində Belorus nümayəndəsi də iştirak etsin? Fikrimcə, Minsk qrupunun özünü dəyişmək lazımdır və bura yeni dövlətlər, xüsusilə dünyanın nüfüzlu təşkilatlarının nümayəndələri cəlb olunması müsbət ideyadır. Gürcüstan üzləşdiyi separatizm problemlərinin həlli məsələsini bizdən artıq beynəlmiləlləşdirə bilib. Yəni bu prosesə MDB və BMT ilə yanaşı, son vaxtlar aktiv şəkildə Avropa Birliyi və NATO da qatılıb. Münaqişənin həllində nə qədər çox Qərbyönümlü qüvvələr iştirak edəcəksə, o zaman sülh danışıqlarında aydın perspektivlər açıla bilər".